Jirimiạ 26 - সান্তালী বাইবেল

Jirimiại bicạr ocokʼkan

¹ Josiạ hopon Jihudạren raj Jehoyakimakʼ rajokʼ pạhil secʼ Probhu Isor do Jirimiại metadea,

² “Iń Probhu Isorgeń meneda, am do senkate ińakʼ racare teṅgokʼme ar Jihudạ reakʼ nagrahako khon okoeko hoṛ do koejoṅ lạgitʼ ińakʼ oṛakʼteko hijukʼ onko sanamko ṭhen okaṭakʼ katha galmaraoakoń hukum akatʼme ona reakʼ mitʼke mitʼ katham lạiyakoa, mitʼṭecʼ hõ alom bad oṭokakʼa.

³ Hoedaṛeakʼa onko do onako ańjoma ar akoakʼ bạṛicʼ hor khonko ruạṛ hijukʼa. Ar onkoakʼ behokakʼ iạte onko cetanre okaṭakʼ muhin ạgui lạgitʼ iń goṭa akatʼ ona do ar bạń paṛao ocoya.

⁴ Am do noa katham jạhirakoa, Probhu Isore meneda, ‘unạkʼ din ińakʼ katha do bape ańjomleda ar ape samaṅre okaṭakʼ ạn-ạriń dohoakatʼ ona hõ bape manao akada;

⁵ ona chaḍa aema dhao ińren golamko, metakʼme nạbiko ape ṭheniń kolletʼkoa menkhan ape do onkoakʼ katha hõ bape ańjomletʼtakoa.

⁶ Onate niạ oṛakʼ do Silo lekań hoeocoya ar nonkań hoeocoya jemon dhạrtiren sanam jạtrenko niạ nagrahako sarapakʼ.’ ”

⁷ Probhu Isorakʼ oṛakʼre Jirimiạ do tinre noako kathae galmaraoako kan tahẽkana unre naekeko, nạbiko ar sanam hoṛko do onako ańjomkeda.

⁸ Menkhan Probhu Isorakʼ hukum leka Jirimiạ do sanamakʼe lại sạtketʼ khan naekeko, nạbiko ar sanam hoṛko do uni sapʼkedeteko metadea, “Am do gujukʼtege hoyokʼtama.

⁹ Cedakʼ am do Probhu Isor ńutumte nonkam nạbi akada, “Baṅma noa oṛakʼ do Silo leka hoyokʼa ar nagraha do ḍahao maraokʼte ujạṛokʼa?” Noa menkate sanam hoṛ do Probhu Isorakʼ oṛakʼre Jirimiạko esetʼ ạcurkedea.

¹⁰ Jihudạren rajkạmiyạko do noa kathako ańjomketʼ khan raj oṛakʼ khon Probhu Isorakʼ oṛakʼteko hecʼena ar Probhu Isorakʼ oṛakʼ reakʼ nãwã phaṭok duạrte bolokʼ hor ṭhenko duṛupʼena.

¹¹ Unre naekeko, nạbiko, rajkạmiyạko ar sanam hoṛko menkeda, “Nui hoṛ do gujukʼ sạjại ńam lek kanae, ente uni do noa nagraha upạrteye nạbi akada; ar ona do apeakʼ luturtegepe ańjomakada.”

¹² Unre Jirimiạ do sanam hoṛko ar rajkạmiyạkoe metatʼkoa, “Ape do niạ oṛakʼ ar nagraha upạrte okape ańjomketʼ ona lạlại lạgitʼge Probhu Isor do ińe kol akadińa.

¹³ Ńitokʼ ape do apeakʼ colon ar kạmiko sudhrạutape ar aperen Isor Probhuakʼ katha ańjomtaepe. Enḍekhan Probhu Isor do ape upạrte okaṭakʼ muhin kol reakʼe goṭa akatʼ ona do ar bae kola.

¹⁴ Ńelpe, iń do apeakʼ tirege minạńa; okaṭakʼ bhage ar hok reakʼ mentepe hudisetʼ onage ińre kạmipe.

¹⁵ Tobe noa do khạṭige baḍaekakʼpe, ińpe gocʼ giḍikạńre hõ miridosicʼakʼ mãyãm reakʼ dạyi do ape cetanrege ar niạ nagraha cetanre ar okoe nonḍeko tahenkan onko cetanrege paṛaokʼa; ente noako katha baḍae ocope lạgitʼge Probhu Isor doe kol akadińạ.”

¹⁶ Unre rajkạmiyạko ar sanam hoṛko do naekeko ar nạbikoko metatʼkoa, “Nui do gujukʼ sạjại lek doe baṅkana. Uni do aboren Probhu Isor ńutumte abo ṭhen kathae roṛakada.”

¹⁷ Inạ tayom disạmren murubbiko modre adomko do samaṅ secʼ hecʼente jarwa akan sanam hoṛko metatʼkoa,

¹⁸ “Jihudạren Hiskiạ raj oktere Moresetren Mikạ do nạbi lekate kathae roṛetʼ tahẽkana. Uni do Jihudạren hoṛkoe metatʼko tahẽkana, ‘phạdkoren Probhu Isore meneda, Sion do khet baṛge lekae cas ocokʼa, Jerusalem do dhaṅ dhaserakʼ ḍhipi leka hoyokʼa ar koejoṅ oṛakʼ reakʼ buru do jhạuạkote dapal esedokʼa.’

¹⁹ Jihudạren raj Hiskiạ se Jihudạren eṭakʼ jãhãe do cetʼ Mikại gocʼledea? Hiskiạ do cetʼ Probhu Isor bae botorae kan tahẽkana ar uniyakʼ daya do cetʼ bae khojletʼa? Onate Probhu Isor do hoṛko cetanre oka muhin paṛao ocoy reakʼ kathae roṛletʼ ona do ar bae kolleda. Menkhan abo do apnarte mitʼṭecʼ maraṅ botor bon ạgujoṅkana. ”

²⁰ Kiriyat-Jearimren Semaya hopon Uriạ do ar mitʼ nạbi hoṛe tahẽkana, uni do Probhu Isor ńutumteye nạbiyetʼ tahẽkana. Uni hõ Jirimiạ lekage noa nagraha ar noa disạm upạrte onkageye nạbileda.

²¹ Jehoyakim raj ar uniren sanam subedarko ar rajkạmiyạko tinre Uriạwakʼ kathako ańjomkeda unre raj do uni goje reakʼe kurumuṭukeda. Menkhan ona katha ańjomkate Uriạ do botorte Misor disạmteye dạṛkeda.

²² Jehoyakim raj do unre Akbor hopon Elnathan ar uni sãoten arhõ thoṛa hoṛ Misorteye kolketʼkoa.

²³ Onko do Misor khon Uriạko hoho ạgukedete Jehoyakim raj ṭhenko idikedea; ar raj do tarwaṛete uniye gocʼkedea ar hoṛkoakʼ topa ṭhen uniyakʼ mạ̃ṛĩye giḍikatʼtaea.

²⁴ Menkhan Saphanren hopon Ahikam do Jirimiại goṛowadea, onate Jirimiạ goje lạgitʼ hoṛkoakʼ tire bae soprotledea.