Jirimiạ 25 - সান্তালী বাইবেল

Eaegel bochor reakʼ bondi dosa

¹ Josiạren hopon Jihudạren raj Jehoyakimakʼ rajokʼ ponakʼ bochorre, metakʼme, Babel raj Nebukadnesarakʼ rajokʼ pạhil bochorre Jihudạren sanam hoṛko reaṅ Isorakʼ katha do Jirimiạ ṭhen sodorena.

² Ona iạte Jirimiạ nạbi do Jihudạren sanam hoṛko ar Jerusalemreko tahẽnkan sanam hoṛkoe jạhiratʼkoa,

³ “Josiạren hopon Jihudạren raj Amonakʼ rajokʼ gelpe bochor khon ńit hạbicʼ, metakʼme noa bargel pe bochor Probhu Isorakʼ katha do iń ṭhen sodor akana ar iń do aema dhao onań lạiyakatʼpea, menkhan ape do bape lutur akawatʼtińạ.

⁴ “Probhu Isor do acʼren sanam gutiko, metakʼme nạbiko jaoge ape ṭhene kolletʼkore hõ ape do bape ańjomletʼtakoa ar mone hõ bape moneyada.

⁵ Onko do Probhu Isorakʼ noa kathako metatʼko tahẽkana, ‘Ape do ńitokʼ apeakʼ bạṛicʼ hor ar bạṛicʼ kạmiko khon ruạṛokʼpe, enḍekhan oka disạm aperen hapṛamkoń ematʼko tahẽkan ona disạmre ape do jaejug hạbicʼpe tahẽdaṛeakʼa.

⁶ Ape do debotako alope pańjakoa ar sewa hõ alope sewawakoa; apeakʼ tite benaokʼ jiniskote iń do alope edre ocoyińạ. Ar baṅkhan bạń bhạlạipea.’

⁷ “Ńitokʼ Probhu Isor doe meneda, ‘menkhan ape do ińakʼ katha bape ańjomletʼtińạ. Ar ona bodolte apeakʼ tite benaoakʼ jiniskote iń edre ocoakadińte apnar cetanre muhinpe ạguakawana.’

⁸ “Ona iạte phạdkoren Probhu Isore meneda, ‘ape do ińakʼ katha bape ańjomletʼtińạ.

⁹ Iń do utạrren sanam jạtrenko ar ińren golam Babelren Nebukadnesar rajiń hoho ạguiyea. Noa disạm ar onaren hoṛko upạrte ar beṛhaeten sanam jạtrenko upạrte onkoń ạgukoa. Iń do purạte onko hoṛkoń maraokoa ar onko do botoran ar landa-dhutʼan jạtrenkoń hoyocokoa; onkoakʼ disạm do jaejug lạgitʼ iń ḍahao maraoa.

¹⁰ Onko tala khon rạskạ ar hulạs reakʼ aṛaṅ, jãwãe ar bạhu kuṛiyakʼ aṛaṅ, jante reakʼ saḍe ar diuhe reakʼ marsal doń sạṅgiń giḍikakʼa.

¹¹ Niạ disạm do jarkhar ar potit jumige hoyokʼa ar noko jạtrenko do eaegel bochor hạbicʼ Babel rajren golam akanko tahena.

¹² Menkhan eaegel bochor purạulen khan iń do Babelren raj ar uniyakʼ jạtrenko do onkoakʼ behokakʼ iạteń sạjạikoa ar Babel disạm do jaejug lạgitʼ iń ḍahao maraoa.

¹³ Iń do onako sanam disạm upạrte okako kathań roṛletʼ okaṭakʼ do noa puthire ol menakʼ, metakʼme sanam jạtrenko upạrte Jirimiạ nạbi oka kathae nạbiyakatʼ ona disạmre iń do onakoń paṛao ocoya.

¹⁴ Babelrenko do aema jạtrenko ar maraṅ maraṅ rajkoren golamko hoyokʼa; onkoakʼ kạmiko lekatege iń do kuṛạiyiń emakoa.’ ”

Isorakʼ edre reakʼ bạṭi

¹⁵ Israelren Probhu Isor do ińe metadińạ, “Ińakʼ ti khon darkha rasa, metakʼme ińakʼ edrete perecʼ noa bạṭi hataome ar okoe jạtrenko ṭheniń kolme onko onam ńũ ocokoa.

¹⁶ Onko do ona ńũkateko konḍe manḍekʼa ar okaṭakʼ lạṛhại onko talareń kol ona iạteko lelha cabakʼa.

¹⁷ Unre iń do Probhu Isorakʼ ti khon ona bạṭiń hataokeda ar okoe jạtrenko ṭhene kolkedeń onkoń ńũ ocoketʼkoa.

¹⁸ Iń do Jerusalem ar Jihudạ reakʼ nagrahako ar onaren rapajko ar rajkạmiyạkoń ńũ ocoketʼkoa, jemon teheń cetʼ leka menakʼko onkage jarkharakʼ, ujạṛakʼ, cigạri ar sarapan hoṛko hoyokʼ.

¹⁹ Ona chaḍa Misorren Pharao raj ar uniren rajkạmiyạko, uniyakʼ disạmren mukhiyạko ar uniren sanam hoṛko;

²⁰ onḍe tahenkan sanam bidisiạko; Kus disạmren sanam rapajko; Philisṭiren sanam rapajko, metakʼme Askelon, Gasa, Ekron ar Asdodren sarecʼkoren rapajko;

²¹ Edomrenko, Moabrenko ar Amonren hoṛko;

²² Tur ar Sidonren sanam rapajko; doreão hanasaren rapajko;

²³ Dedan, Tema, Bus disạmren hoṛko; bohokʼ upʼ gegetʼ hoṛko;

²⁴ Arabren sanam rapajko; hahaṅkarre girobasokʼ kan sanam bidisiạ rapajko;

²⁵ Simri, Elam ar Madaeren sanam rapajko;

²⁶ sor ar sạṅgińren mitʼke mitʼ utạrren sanam rapajko. Metakʼme, dhạrtiren sanam jạtrenko onań ńũ ocoketʼkoa. Onko sanamko tayom do Sesakren, metakʼme Babelren raj hõ onae ńũiya.

²⁷ Ona tayom Probhu Isor do ińe metadińa, “Onkom metakoa, Israelkoren Isor phạdkoren Probhui meneda, ‘ape talare iń do lạṛhạiyiń koleda; ape do ińakʼ edreteakʼ bạṭi khon ńũiype, bul bhuteṛokʼpe, bejpe, sombodokʼpe ar alope beretʼa.’

²⁸ Menkhan amakʼ ti khon ona bạṭi reakʼ okoe ńũńũ bako reben onkom metakoa, phạdkoren Probhu Isore meneda, ‘noa do ńũńũtege hoyokʼtapea.

²⁹ Ńelpe, ińakʼ nagrahage pạhilteń marao giḍikakʼ lạgidokʼ kana, enḍekhan ape do cetʼ begor sạjạitepe tahena? Sạjại dope ńamgea, ente dhạrtiren sanam hoṛko upạrte iń do lạṛhạiyiń ạguakada. Iń phạdkoren Probhu Isorge noa katha doń meneda.’

³⁰ “Ńitokʼ am do onko upạrte nạbi lekate noako katha roṛme, ‘Probhu Isor do cetan khone hạnḍrạua; ar acʼakʼ sonot ṭhạ̃i khon acʼakʼ aṛaṅe ańjom ocoytaea ar uniyakʼ disạm upạrte ãṭteye hạnḍrạua. Ar darkha joko len leka uni do dhạrtireko girobasokʼkan sanamko upạrteye hohoea.

³¹ Dhạrti reakʼ ses simạnako hạbicʼ ona reakʼ saḍe do ańjomokʼa, ente Probhu Isor do jạt jạtrenko upạrte mamblae ạguiya. Uni do sanam manwae bicạrkoa ar dusṭạmi hoṛ do tarwaṛeteye gocʼkoa.’ ”

³² Phạdkoren Probhu Isore meneda, “Ńelme, mitʼ jạtrenko khon ar mitʼ jạtrenko cetanre muhin do pasnao akana; dhạrti reakʼ ses simạnako khon mitʼṭecʼ birbão hoe do rakapʼakana.”

³³ Unre Probhu Isor okoekoe gocʼko onko do dhạrti reakʼ mitʼ simạ khon eṭakʼ simạ hạbicʼ sanam ṭhạ̃ire sombhotʼ bhinḍạṛ akanko tahena. Onko lạgitʼ do celege bako halaṅ homora se onko do celehõ bako jarwakoa se topa hõ bako topakoa, menkhan onko do ot cetanre guricʼ lekako hoyokʼa.

³⁴ E gukʼpiko, ape do ragpe, homor halaṅpe; E gukʼpikoren mukhiyạko, ape do dhuṛire guṛdạukʼpe, ente ape gurpe reakʼ okte do seṭer akana; ape do mońj mitʼṭecʼ hasa reakʼ bhajan lekape rạputʼ gejer ocokʼa.

³⁵ Gukʼpiko do dạṛ reakʼ upạige baṅ tahentakoa; gupikoren mukhiyạko hõ okatehõ bako sen daṛeakʼa.

³⁶ Gukʼpikoakʼ rakʼ ar palren mukhiyạkoakʼ homor halaṅ ańjompe, ente Probhu Isor do onkoakʼ ạtiń ṭạnḍikoe nosṭo caba akatʼtakoa.

³⁷ Probhuakʼ jolokʼkan edre iạte sulukte perecʼ ṭạnḍiko do potit jumi leka tahena.

³⁸ Uni do dhạcri kul leka acʼakʼ ṭhạ̃i bạgikateye oḍok hijukʼa; onate sasantaokoakʼ raṅgao iạte ar Probhu Isorakʼ jolokʼkan edre iạte onkoakʼ disạm do jarkhar cabakʼa.