Jirimiạ 24 - সান্তালী বাইবেল

Bar khạclạkʼ loa jo

¹ Babelren raj Nebukadnesar do Jehoyakim hopon Jekoniạ Jihudạren raj, Jihudạren mukhiyạko, kạrigolko ar kamarko do Jerusalem khon Babelteko bondi idi ocoyen tayom Probhu Isor do acʼakʼ oṛakʼ samaṅre dohoakan bar khạclạkʼ loa joe ńel ocokedińa.

² Mitʼṭecʼ khạclạkʼre do pạhil beleakʼ loa leka bhage loa tahẽkana, ar eṭakʼ khạclạkʼre do ạḍi bạṛicʼ loa jo tahẽkana, ona do nunạkʼ bạṛicʼ tahẽkana je, okoege bako jom daṛeakʼa.

³ Probhu Isor do ińe kulikedińa, “E Jirimiạ, cetʼ em ńeleda?” Iń doń roṛ ruạṛadea, “Loa jo; mońjakʼ do ạḍige mońj, menkhan bạṛicʼakʼ do nunạkʼge bạṛicʼ, one okoehõ ohoko jomdaṛele.”

⁴ Probhu Isor do ińe metadińạ,

⁵ “Iń Israelkoren Probhu Isorgeń meneda, Jihudạren okoe do nonḍe khon Babel disạmte bondikateń kol akatʼko onko do noa bhage loa lekageń bujhạuetʼkoa.

⁶ Iń do bhạlạiko lạgitʼge onkoń ńel todarotkoa ar noa disạmteń ạgu ruạṛkoa. Onko doń benao rakapʼkoa, ar bạń dhaṅdhaserkoa; onko doń rohoekoa, ar bạń or totʼ giḍikoa.

⁷ Ar iń do noa baḍae lạgitʼ moniń emakoa je, ińkangeạń Probhu Isor do. Onko do ińren hoṛko hoyokʼa ar iń do onkoren Isorgeń hoyokʼa, ente goṭa ontortege iń ṭhenko ruạṛ hijukʼa.

⁸ “Menkhan noa bạṛicʼ loa, okaṭakʼ do ạḍi bạṛicʼge, one oka baṅ jomogokʼ, onako leka Jihudạren raj Sedekiạ, uniren kạmiyạko ar Jerusalemren okoeko hoṛ do disạmre menakʼko ar Misorre okoeko tahenkan onko sãote do bạṛicʼ iń beohara.

⁹ Ar jãhãrege onkoń sạṅgiń giḍikako onḍege onko do botorankoń hoyocokoa, dhạrtiren sanam jạtrenko ṭhen hirkhạwanko, landa-dhutʼanko, henostako ar kạhtukgeń hoyocokoa. Ar onkoakʼ ńutum iạte hoṛko do onkoko sarapakoa.

¹⁰ Ar onkoren hapṛamko okaṭakʼ disạmiń emakawatʼko ona disạmre tin hạbicʼ bako marao utạrokʼ un hạbicʼ onko talare lạṛhại, mahamạri ar akal iń kola.”