Jirimiạ 23 - সান্তালী বাইবেল

Darakan din lạgitʼ as

¹ Probhu Isore meneda, “Hae, onko gukʼpiko do, one okoe do ińakʼ gupi ṭạnḍiren bhiḍikoko maraoetʼko arko chirchạtur cabayetʼkotiń.”

² Ona iạte okoe do ińren hoṛko gupiyetʼko onko gukʼpiko upạrte Israelren Probhu Isor doe meneda, “Ape do ińakʼ palren bhiḍikope chirchạtur akatʼkoa arpe laga ńir akatʼkoa, onko do bape joton akatʼkoa; onate iń do apeakʼ behok iạteń sạjạipea.

³ Okako disạmre ińren pal bhiḍikoń laga ńirletʼko onḍe khon ińge onkoren sarecʼko do akoakʼ ạtiń ṭạnḍiteń ruạṛ ạgukoa; onḍe onko doko bạḍokʼa arko saṅge idikʼa.

⁴ Onko cetanre nonkan gukʼpikoń bahalkoa okoe do onkoko ńel todarot daṛeako; unre ińren bhiḍiko bako botorokʼa, bako asokʼ ṭayogokʼa ar okoeṭakʼge bako adokʼa. Iń Probhu Isorge niạ kathań meneda.”

⁵ Probhu Isore meneda, “Ona dinko hijukʼkana tinre iń do Dạudakʼ bõsre mitʼṭecʼ dhorom reakʼ kahleń omon ocoya; uni do raj lekate ạkil salakʼ rajosṭiye calaoa ar disạmre hok ar dhorom reakʼe kạmiya.

⁶ Unre Jihudạ do rukhiyại ńama ar Israelko do khạtirjomako girobasokʼa. Ar uni do noa ńutumgeye hoho ocokʼa ‘Probhu Isorge aboakʼ dhorom do.’

⁷ “Onate nonkan dinko hijukʼkana tinre hoṛ do ar bako mena, ‘Misor disạm khon okoe do Israelkoe oḍok ạguletʼko uni jiwetʼ Probhu Isor ńutumte kiriạkateń meneda,’

⁸ bickomko mena, ‘okoe do Israelko utạr ar eṭakʼ disạmteye sạṅgińletʼko ar onḍe khone ạguketʼko uni jiwetʼ Probhu Isor ńutumte kiriạkateń meneda.’ Onate onko do akoakʼ disạmreko girobasokʼa.”

Eṛe nạbiko reaṅ

⁹ Noa tayom nạbiko babotre Probhu Isorakʼ katha ańjomkate iń do ontorreń rạputʼ gejer akana ar ińakʼ sanam jaṅko do lewe lewe akana. Probhu Isor ar uniyakʼ sonot katha iạte iń do bul hoṛ leka, darkha rasa ńũkate bul bhuteṛ hoṛ lekań hoyakana.

¹⁰ Laṭghaṭkote disạm do perecʼ akana; sarap iạte disạm doe hińjrạukʼkana ar hahaṅkar reakʼ ạtiń ṭạnḍiko do rohoṛ akana. Hoṛko do bạṛicʼ horteko sen akana ar onkoakʼ ektiạri do behokakʼteko boeharetʼa.

¹¹ Probhu Isore meneda, “Nạbi ar naeke do Isor bako botorae kana; ińakʼ oṛakʼre hõ onkoakʼ dusṭạmiń ńel akatʼtakoa.

¹² Ona iạte onkoakʼ hor do leńjedokʼ reakʼ horge hoyakana; ńut doe laga baṛakoa ar onko do onḍegeko bhindạṛokʼa. Ar sạjại emako jokhecʼ iń do onko cetanre muhiniń paṛao ocoya.

¹³ “Samariạren nạbiko talare iń do niạkoń ńel akada, onko do Bakʼal debota ńutumte nạbi lekate katha roṛkate ińren Israel hoṛko bạṛicʼ horteko idiakatʼkoa.

¹⁴ Ona chaḍa Jerusalemren nạbiko talare do noa botoranakʼ jinisgeń ńelakada, onko do laṭghaṭ ar eṛeyakʼre jionko khemaokana. Onko do sasantaokoakʼ tiko keṭecʼetʼtakoa jemon dusṭạmi khon okoe hõ aloko ruạṛ daṛeakʼ. Onko sanamkoge iń ṭhen do Sodom ar Gomoraren hoṛ lekako hoyakana.

¹⁵ “Ona iạte iń do phạdkoren Probhu Isorren nạbiko reakʼ iń roṛeda, iń do haṛhatʼakʼ jomakʼ ar bis dakʼgeń ńũ ocokoa, ente Jerusalemren nạbiko ṭhen khon do besonotakʼge goṭa disạmre oḍok akana.”

¹⁶ Phạdkoren Probhu Isore meneda, “Nạbiko okaṭakʼ kathako menetʼkan ona do alope ańjoma; onko do apeakʼ monre eṛe asko janam ocoyeda. Ar Probhu Isorakʼ moca khon ańjomakʼ katha do bako roṛeda bickom akoakʼ benaoakʼ dorson reakʼ kathageko roṛetʼkana.

¹⁷ Okoe ińko nihạ̃t edeńkan onko ṭhen nạbiko do niạ kathako roṛa, ‘Probhu Isore meneda, suluk hoyokʼtapea,’ ar okoe akoakʼ ontor reakʼ keṭecʼakʼteko senokʼkan onko doko mena, ‘jãhãn muskil do baṅ hoyokʼtapea.’

¹⁸ Menkhan ape modre ińakʼ katha ańjom ar bujhạu lạgitʼ iń samaṅre do okoeye teṅgona? Okoe ińakʼ katha doe lutur akawada se onae moneakawada?

¹⁹ Ńelpe, ińakʼ edre do birbão hoe leka ar dusṭạmikoakʼ bohokʼ cetanre do hoe bharḍo leka ạcurokʼkana.

²⁰ Ińakʼ edre do ińakʼ ontor ńutumte purạte ạuri perejokʼ hạbicʼ baṅ ruạṛa. Ar ape do tayom daram din pusṭạute onape bujhạu daṛeakʼa.

²¹ Noko nạbiko do bạń kol akatʼkoa, enhõ onko do ahkaokʼ seletʼ akoakʼ sombat do hoṛko baḍae ocoakatʼkoa; menkhan iń do cetʼ kathage bạń lạiyakatʼkoa, enhõ onko do kathako roṛeda.

²² Menkhan iń samaṅreko teṅgolen khan onko do ińren hoṛko ṭhen ińakʼ kathako lại jạhirkea ar bạṛicʼ hor ar bạṛicʼ kạmi khon onkoko ruạṛkekoa.”

²³ Probhu Isore meneda, “Iń do cetʼ eken sorren Isor kạnạń, ar sạṅgińren Isor doń baṅkana?

²⁴ Jãhãege cetʼ nonkan danaṅ jaegareye oko daṛeakʼa okare bạń ńelńam daṛeae? Iń do serma ar ot reakʼ sanam ṭhạ̃irege cetʼ bạń tahẽnkana?”

²⁵ “Okoeko nạbi iń ńutumte eṛe kathako roṛetʼkan onkoakʼ katha doń ańjom akatʼgea. Onko doko meneda, ‘iń do mitʼṭecʼ kukmũń ńelakada, mitʼṭecʼ kukmũgeń ńelakada.’

²⁶ Noko nạbiko do ar tinạkʼ din akoakʼ ontorre eṛe khon eṛeteakʼko roṛa?

²⁷ Onko doko hudiseda akoren hapṛamko cetʼleka Bakʼal debotako sewawade tahẽkante ińko hiṛińledeń onkage akoakʼ kukmũ reakʼ katha sanam ṭhenko roṛte ińren hoṛko ińakʼ ńutumko hiṛiń ocokoa.

²⁸ Okoe nạbi kukmũe ńeletʼ uni do acʼakʼ kukmũ reakʼ katha do kukmũ lekageye roṛma, menkhan okoe ińakʼ kathae ńamakatʼ uni do pạtiạr salakʼ onae lại jạhirma; ente guhum jaṅ ṭhen bhusạ reakʼ do jãhãn damge bạnukʼa.

²⁹ Ińakʼ kathako do cetʼ seṅgel leka do baṅkana? Okaṭakʼ hạtuṛ dhiriye kuṭạm gejeretʼkan ińakʼ katha do cetʼ ona hạtuṛ leka do baṅkana?

³⁰ “Ona iạte okoe nạbiko eṭakʼko ṭhen khon ińakʼ kathako kombṛoe iń do onko upạrte minạńa.

³¹ Hẽ, iń do onko nạbi upạrtege minạńa okoe do akoakʼ alaṅko laṛaoetʼkan arko lại jạhiretʼkan, ‘Probhu Isore meneda.’

³² Sạrige iń do onko nạbi upạrte minạńa okoe eṛe kathako roṛetʼkan. Onko do onageko roṛeda ar onkoakʼ bạḍạite perecʼ kathate ińren hoṛko bạṛicʼ horteko idiyetʼkoa. Menkhan onko do bạń kol akatʼkoa se hukum hõ bạń hukum akatʼkoa. Onko do noko hoṛkoakʼ thoṛa hõ bako upkạr daṛeakʼa. Iń Probhu Isorge noa katha doń meneda.”

Eṛe nạbiko ar onkoakʼ eṛe katha

³³ Probhu Isor do ińe metadińạ, “Noko hoṛ se jãhãe nạbi se naekeko tinre amko kulimea, ‘Probhu Isorakʼ katha do cetʼ kana mente?’ Unre onkom lạiyakoa, Probhu Isore meneda, ‘ape do ińren bojhako kanape ar iń doń giḍikapegea.’

³⁴ Jãhãe nạbi se naeke se eṭakʼ jãhãeye men, ‘Probhu Isorakʼ katha do noa kana,’ enḍekhan uni hoṛ ar uniyakʼ gharońjren doń sạjạikoa.

³⁵ “E ińren hoṛko, ape mimitʼko do aperen gate se peṛako ṭhen kulijoṅpe, ‘Probhu Isor do cetʼe roṛ ruạṛ akada mente?’ Se ‘Probhu Isor do cetʼe menakada?’

³⁶ Menkhan ape do tishõ jemon alope men, ‘Probhu Isorakʼ katha do noa kana,’ ente mimitʼ hoṛ do akoakʼ kathage Isorakʼ katha menteko benaoeda. Nonkate ape do jiwetʼ Isorakʼ, aperen phạdkoren Probhu Isorakʼ kathape konḍeayetʼkana.”

³⁷ Ona tayom Probhu Isor do ińe metadińa, “Onko modre tinre jãhãege nạbi lekate kathae roṛ unre unipe kuliyea, ‘am do cetʼ Probhu Isore roṛ ruạṛ akatʼmea? Se ‘Probhu Isor do cetʼe menakada?’

³⁸ “E ińren hoṛko, ińakʼ katha bape manao arpe men, ‘Probhu Isorakʼ katha do noa kana,’

³⁹ enḍekhan khạṭigiń uṭhạupea ar iń samaṅ khoniń giḍikapea ar okaṭakʼ nagraha do ape ar aperen hapṛamkoń ematʼko tahẽkan ona nagraha hõ iń samaṅ khoniń lebda giḍikakʼa.

⁴⁰ Ape do jaejug henosta ar lajaogeń ladeapea ar ona do baṅ hiṛińokʼa.”