Jirimiạ 22 - সান্তালী বাইবেল

Dusṭạmi rapajkoakʼ bicạr

¹ Probhu Isor do Jihudạ reakʼ raj oṛakʼte senkate noa sombat lại jạhir lạgitʼe metadińạ,

² “Dạudakʼ siṅghạsonrem duṛupʼ akan E Jihudạren raj, am do, amren kạmiyạko ar amren okoeko hoṛ do niạ phaṭok duạrteko bolokʼkan, ape sanamkoge Probhu Isorakʼ katha ańjompe.

³ Probhu Isore meneda, ‘oka hok reakʼkan ar oka ṭhikakʼ kan ona onkaepe. Okoeye luṭ ocokʼkan uni do acʼren sasantaoicʼ khon rukhiyạyepe. Bidisiạko, ṭũạr amako ar rạnḍi maejiuko jãhãnakʼ alope behoktakoa se alope santaokoa ar niạ ṭhạ̃ire miridoskoakʼ mãyãm alope joro ocoytakoa.

⁴ Ape do niạ hukumpe bataotae enḍekhan aperen rapajko do Dạudakʼ siṅghạsonreko duṛupʼa ar onkoren rajkạmiyạko ar hoṛko do rãt gạḍi ar sadomre decʼkate niạ raj oṛakʼ reakʼ phaṭok duạrte bhitriteko bolokʼa.

⁵ Menkhan niạko hukum bape manao enḍekhan iń Probhu Isor do ińakʼ ńutumte kiriạkateń meneda, niạ raj oṛakʼ do jarkharokʼa.’ ”

⁶ Jihudạ raj oṛakʼ reakʼ sanam ṭhạ̃i reaṅ Probhu Isore meneda, “Am do iń ṭhen Gileadrenko leka ar Lebanon reakʼ buru muthni leka kanrehõm khạṭige am do hahaṅkar ṭoṭha reakʼ ujạṛakʼ nagraha lekań hoyocomea.

⁷ Iń do am upạrte nonosṭokoń kolkoa; onko mimitʼkoakʼ tire do khanḍa bhanḍa tahena. Onko do amakʼ bhage bhage debdạru dareko maga ar seṅgelreko khadle giḍikakʼa.

⁸ “Ar eṭakʼ eṭakʼ jạtren hoṛko do niạ nagraha aṛeteko parom calakʼ jokhecʼ am ińko kulikʼa, ‘Probhu Isor do noa maraṅ nagraha cedakʼe nonkakeda?’

⁹ Unre onkoko roṛ ruạṛa, ‘ona reakʼ karon do hoyokʼkana onko do Probhu Isorakʼ bondobosko bạgi akada ar debotakoko sewawako kan tahẽkana.’ ”

Salum reaṅ Jirimiạwakʼ katha

¹⁰ Gocʼ akan raj lạgitʼ do alope rakʼ homora; ona khon bickom bondikate okoe sạṅgińteye idi ocoakan uni lạgitʼ rakʼ homorpe, ente uni do tishõ ar bae ruạṛ hijukʼa se acʼakʼ janam disạm hõ ar bae ńelńama.

¹¹ Uni doe hoyokʼ kana Josiạ hopon Salum, okoe do acʼren apat tayom Jihudạren raje hoylena menkhan uni do noa ṭhạ̃i bạgikateye calaoena. Probhu Isor do uni reaṅe meneda, “Uni do tishõ ar bae ruạṛ hijukʼa.

¹² Okare bondikateye idi ocoakan uni do onḍegeye gujukʼa; uni do noa disạm ar bae ńelńama.”

Jehoyakim reaṅ Jirimiạwakʼ katha

¹³ Probhu Isore meneda, “Hae uni do, one okoe bedhoromakʼte acʼakʼ oṛakʼe benaoetʼkan ar behokakʼkote acʼakʼ koṭha kandhakoe tearetʼtae. Hae uni do, okoe hoṛ jãhãnakʼ baṅ emkate acʼakʼ disạmren hoṛkoe khaṭaoetʼko ar onkoakʼ khaṭaoakʼ reakʼ kuṛại bae emako kan.

¹⁴ Hae uni do, okoeye menetʼ, ‘iń lạgitʼ mitʼṭecʼ maraṅ okocʼ oṛakʼ iń benaoa ar cetan koṭhare do maraṅ maraṅ kandhakoń teara. Ar onare maraṅ maraṅ jalnakoń benaoa ar ona reakʼ toktako do debdạru reakʼ kaṭte ar arakʼ roṅteń sajaoa.’

¹⁵ Aema Aema debdạru dareko tahẽlen khan ona do cetʼ raje benao daṛeama? Amren ạpum do bhage bhageye jom-ńũiyetʼ tahẽkanre hõ okaṭakʼ ṭhikakʼ ar hok reakʼakʼ kan onageye onkayetʼ tahẽkante un jokhecʼ jotowakʼ do bhagege tahẽkana.

¹⁶ Uni do reṅgecʼ orecʼko ar dukhạliạkoakʼ mamblae chinḍạuetʼtako tahẽkana. Probhu Isor baḍaeye do ona sanamakʼ kạmikoge.

¹⁷ Menkhan amakʼ mẽtʼ ar mon do eken behokakʼ hameṭjoṅ, miridoskoakʼ mãyãm ar santao ar julum reakʼge menakʼa.”

¹⁸ Onatege Probhu Isor do Jihudạ raj Josiạren hopon Jehoyakim reaṅe meneda, “Uni lạgitʼ do okoehõ bae ‘hae haeyokʼa.’ Hoṛko do uni lạgitʼ ‘hae ińren kisạ̃ṛ! Hae uniyakʼ ṭhonok,’ onka do bako homor halaṅa.

¹⁹ Gadha cetʼ lekae topa ocokʼ onkage uni hõe topa ocokʼa; uni do Jerusalem reakʼ phaṭok duạr bahrete or idikateko giḍikaea.”

Jerusalem reakʼ sạjại

²⁰ Probhu Isore meneda, “E Jerusalem, am do Lebanonte senkate hohoeme, ar Basonre amakʼ aṛaṅ ańjom ocoytam. Am do Abarim khon kikiạume, ente amren dulạṛiạko doko chirchạtur akana.

²¹ Iń do amakʼ bhạlại jokhecʼ iń sontorletʼmea, menkhan amem metadiń tahẽkana, ‘iń do bạń ańjomtama.’ Pạhil khonge amakʼ beohar do nonkage tahẽkana; am do bam batao letʼtińạ.

²² Hoe do amren sanam gukʼpikoe oṭaṅ idikoa ar amren dulạṛiạko do bondikate sạṅgińteko idi ocokʼa. Unre amakʼ sanam dusṭạmi iạte lajao arem opoman ocokʼa.

²³ E Lebanon reakʼ debdạru kaṭte benaoakʼ oṛakʼren tahen kạnicʼ, maejiu hoṛakʼ bedon leka tinre haso rakapʼama unre am dom geraṅa!”

Koniawakʼ, metakʼme Jehoyakimakʼ sạjại

²⁴ Probhu Isore meneda, “E Jihudạ rajren Jehoyakimren hopon Konia, iń ńutumte kiriạkateń meneda, ińakʼ jojom ti reakʼ chapakʼ mundạmem hoylenre hõ enhõ iń do amiń or totʼ giḍikama.

²⁵ Okoe amakʼ jiwi hataoko menetʼ, ar okoeyem botoraekan uni Babel raj Nebukadneser ar kạldikoakʼ tireń soprotmea.

²⁶ Iń do am ar okoeye janam akatʼme uni eṅgam hõ eṭakʼ disạmte, one onḍe okoeyakʼ hõ janam baṅ hoyakantape ona disạmreń lebda giḍikapea, ar aben bana hoṛge onḍeben gujukʼa.

²⁷ Ar okaṭakʼ disạmte ruạṛ hijukʼpe khojkan onḍe do tishõ bape ruạṛ hecʼ daṛeakʼa.”

²⁸ Nui Konia do nonkan mitʼṭecʼ nihạ̃t giḍiyicʼ rạputʼ bhajan kanae one okoehõ bako khoje? Cedakʼ uni ar uniren hoponko do bin opromakʼ disạmreko lebda giḍi ocokʼa?

²⁹ E disạm, E disạm, E disạm, am do Probhu Isorakʼ katha ańjome.

³⁰ Probhu Isore meneda, “Am do olme, nui hoṛren cele gidrạge bạnukʼkotaea. Uni do bae jo baha daṛeakʼa ar uniren hoponko hõ bako jo bahakʼa. Onkoren okoehõ Dạudakʼ siṅghạsonre do bako duṛupʼa se Jihudạ disạmre bako rajokʼa.”