Jirimiạ 21 - সান্তালী বাইবেল

Jerusalem bhagao ocokʼa mente roṛ laha katha

¹ Tayomte Probhu Isorakʼ katha do Jirimiạ ṭhen sodorena. Ona jokhecʼ Sedekiạ raj do Malkiạ hopon Pashur ar Maseya hopon naeke Sephaniạ do Jirimiạ ṭhen niạ kathakin roṛ gotʼkada,

² “Babelren Nebukadnesar raj do abo sãoteye lạṛhại kana; onate abo ńutumte Probhu Isor ṭhen nehõrokʼ me jemon uni do abo ṭhene ruạṛ hijukʼ. Hoedaṛeakʼa Probhu Isor do lahate leka abo lạgitʼ hahaṛawakʼe kạmiya.”

³ Jirimiạ do onkoe metatʼkoa, “Ape do Sedekiạ raj metaepe,

⁴ Israelren Probhu Isor do niạ kathae meneda, ‘Babelren raj ar okoe Babelrenko do pạcri bahreteko gherao esetʼ akatʼme onko upạrte lạṛhại lạgitʼ amakʼ tire okako khanḍa bhanḍa menakʼ onako doń ạcur ruạṛtapea ar nagraha talareń samṭao jarwaea.

⁵ Ińge ape upạrteń lạṛhạiya ińiń tiyạr akatʼ ti ar keṭecʼ sopote, edre raṅgao ar maraṅ kurkurạukʼtege.

⁶ Niạ nagrahare okoeko girobasokʼkan baṅ do manwa baṅ do janwar, onko jotoge mahamạriteń ńẽtʼkoa, ar onate onko doko gujukʼa.

⁷ Ona tayom iń do mahamạri, lạṛhại ar akal khon bańcao tahen Jihudạren Sedekiạ raj, uniren rajkạmiyạko ar niạ nagraharen sanam hoṛ do Babelren raj Nebukadnesar rajakʼ tire ar okoe onkoakʼ gujukʼko khojkan onko bạirikoakʼ tireń soprotkoa. Nebukadnesar do onkoe gocʼkoa; uni do jãhãn daya ar mãyãge onkore bae dohoya. Iń Probhu Isorge noa katha doń meneda.’ ”

⁸ Probhu Isor do Jirimiại metadea, “Am do hoṛkom metakoa, Probhu Isor do noa kathae meneda, ‘ńelpe, ape samaṅre iń do jion reakʼ hor ar gujukʼ reakʼ hor iń dohoakada.

⁹ Jãhãege niạ nagrahareye tahen uni do tarwaṛe, akal ar mahamạriteye gujukʼa; menkhan jãhãege bahrete oḍok senkate acʼren khekedkoakʼ tire apnartetʼe jimạkʼ uni doe bańcaokʼa; ar acʼakʼ jiwiye bańcaotaea.

¹⁰ Iń do niạ nagraharen bhalạiyicʼ doń baṅkana menkhan loksan lạgitʼge monreń goṭa dohoakada. Babelren rajakʼ tire noa do emogokʼa, uni do seṅgelteye ḍahao maraoa.’

¹¹ Ona chaḍa Jihudạ reakʼ raj bõsrenko hõ niạ katha ańjom lạgitʼem metakoa,

¹² ‘E Dạud bõsrenko, Iń Probhu Isorgeń meneda, ape do din hilokʼ setakʼ jokhecʼ hok reakʼ bicạrtakope. Luṭ ocoakanicʼ do uniren sasantaoicʼ khonpe rukhiyạyea; ar baṅkhan apeakʼ bạṛicʼ kạmiko khạṭirte ińakʼ edre do seṅgel leka oḍokokʼte jolokʼa, ona do okoehõ bako ĩṛĩcʼ daṛeakʼa.

¹³ E Jerusalem, buru nala otetre tahenkanicʼ iń do enhõ am upạrte minạńa. Am dom meneda, ape upạrte do okoege bako hecʼdaṛeakʼa, ar apeakʼ tahen ṭhạ̃ire okoehõ bako bolo daṛeakʼa;

¹⁴ Menkhan iń do amakʼ kạmi reakʼ kuṛại lekateń sạjạimea. Amakʼ birkore seṅgeliń lagaoa; ona seṅgel do am beṛhaete jotowakʼe jom cabaea. Iń Probhu Isorge noa katha doń meneda.’ ”