Jirimiạ 20 - সান্তালী বাইবেল

Jirimiạ ar Pashur naeke

¹ Jirimiạ do tinre nạbi lekate noako kathae galmaraoako kan tahẽkana unre Probhu Isorakʼ oṛakʼren mukhiyạ sordar Emerren hopon naeke Pashur do ona kathae ańjomkeda.

² Uni do Jirimiạ nạbiye dalkedete Probhu Isorakʼ oṛakʼ sor reakʼ cetan ṭhạ̃ire Benjamin phaṭok duạr ṭhen haṛi paṭakateye dohokadea.

³ Ona dosar hilokʼ Pashur do ona hạṛipaṭa khon Jirimiại raṛakedea. Unre Jirimiạ do uniye metadea, “Probhu Isore em akatʼme amakʼ ńutum Pashur do baṅ bickom Magor-Misabibge hoyokʼa (mane do ‘beṛhaeten botoric’),

⁴ Ente Probhu Isore meneda, ‘apnar lạgitʼ ar ar amren gateko lạgitʼ mitʼṭecʼ torasgeń hoyocomea. Onko do am ńeńel tulucʼge akoren bạirikoakʼ tarwaṛeteko gocʼ ocokʼa. Iń do goṭa Jihudạ Babelren rajakʼ tireń soprota. Uni do onkoren ḍher hoṛge Babelteye bondi idikoa ar sarecʼ hoṛ do tarwaṛeteye gocʼkoa.

⁵ Iń do noa nagraha reakʼ sanam dhon-durib, metakʼme onkoakʼ khet baṛge reakʼ anajko ar sanam damanakʼ jinisko ar Jihudạ rapajkoakʼ sanam murạiko onkoren bạirikoakʼ tireń soprota. Onko do ona luṭkate Babelteko idiya.

⁶ Ar E Pashur, am ar am gharońjren sanam hoṛ do bondikate Babeltepe idi ocokʼa. Onḍe do amem gujukʼa arko topamea; ar amren okoeko gateko ṭhen nạbi lekate eṛe katham roṛakatʼ onko jotokoakʼ dosa hõ onkage hoyokʼtakoa.”

Jirimiạwakʼ mambla

⁷ E Probhu Isor, am dom bulạu kedeńte ińakʼ nonka dosa do hoyakantińạ; ar iń khonem daṛegete am dom jitạu akana. Iń do goṭa dinge landa-dhutʼạń kan hoṛgeń hoyakana; ar sanam hoṛge ińko siṛogạń kana.

⁸ Iń do tinạkʼ dhao kathań roṛetʼkan unạkʼ dhaoge maraokʼ reakʼ kathageń porcaretʼ kana. Onate Probhu Isorakʼ katha iạte iń do goṭa dinge opoman ariń cigạri ocokʼkana.

⁹ Ińiń menkhan, “Uniyakʼ katha do bạń lạiya se uniyakʼ ńutumte ar cetʼge bạń roṛa,” enḍekhan uniyakʼ katha do ińakʼ ontorre lokʼkan bursi seṅgel leka jaṅ bhitri hạbicʼ bond akange tahẽnkana. Iń do bhitrire doho dohoteń laṅga cabakʼkana; sạrige ona do ar bạń doho daṛeakʼkana.

¹⁰ Iń beṛhaete do ạḍitetʼge botorgea, ente niạko katha do ḍher hoṛge khae khoyetʼ kaniń ańjometʼkoa, “Uni ńutumte mamblae me; dela, uni ńutumte bon mamblae ma.” Ińren sanam gateko do ińiń leńjetʼ bhindạṛokʼ reakʼ ńel horrege menakʼkoa, “Hoedaṛeakʼa uni bon ṭhoka daṛeaea, ar uni cetanre bon jitạukʼa arbon hala hạli daṛeakʼa.”

¹¹ Menkhan Probhu Isor do daṛeanicʼ bir banṭa leka iń são sãote menaea, onate iń khedeńko doko tohodokʼa ar bako jitạu daṛeakʼa. Onko do bako jo baha daṛeakʼa ar lajaoreko paṛaokʼa; onkoakʼ bemanot ocokʼ reakʼ do okoehõ tisge bako hiṛiń daṛeakʼa.

¹² E phạdkoren Probhu Isor, am do dhorom hoṛkom biḍạu aṭkaretʼko kana ar mimitʼkoakʼ ontor ar mon reakʼ katham baḍaekana. Ińren bạiriko cetanre onem hala hạliyetʼkan ona baṛe ńel ocoyińme, ente ińakʼ mambla do amgeń baḍae ocoakatʼmea.

¹³ Ape do Probhu Isor ńutumte sereńpe. Probhu Isorge õṛhẽyepe. Uni do dusṭạmi hoṛkoakʼ ti khon reṅgecʼ orecʼkoakʼ jiwiye rukhiyạyetʼtakoa.

¹⁴ Ińakʼ janam din do sarapanakʼge hoyokʼma. Oka hilokʼ ińren eṅgạńe janamlediń enhilokʼ do bhoranakʼ alo hoyokʼma.

¹⁵ “Amren do mitʼṭen koṛa hopone hoyakana,” Niạ sombat iạte ińren ạpuń okoeye rạskạ ocolede uni do sarapanicʼe hoyokʼma.

¹⁶ Probhu Isor do daya baṅkate one sanam nagrahae maraoletʼ uni hoṛ do onka baṛeye hoyokʼma. Uni do setakʼ jokhecʼ guhere ańjomma ar tikin do lạṛhại reakʼ andoṛge;

¹⁷ ente eṅgatakʼ kukhireń tahẽkanre uni do bae gocʼledińa. Enḍekhan ińren eṅgạńge ińakʼ topae hoekokʼa, ar uniyakʼ kukhi do jaejug bhurtiyakʼge hoekokʼa.

¹⁸ Kosṭo ar duk ńel lạgitʼ ar lajaote ińakʼ okteko khemao lạgitʼ cedakʼ kukhi khon doń oḍok hecʼena?