Jirimiạ 2 - সান্তালী বাইবেল

Isor do Israelko lạgitʼe dandokʼkan

^1-2 Probhu Isor do Jerusalemteye idikedińa ar onḍenko hoṛ ṭhen niạ katha lại lạgitʼe metadińa: “Amakʼ juạn jokhecʼ reakʼ pạtiạrtetʼ iń disạyetʼtama. Am do baplakʼkan bạhu kuṛi lekam dulạṛedeń tahẽkana ar oka disạmre bako casetʼkan tahẽkan onkan hahaṅkar jaegakore hõm pańja baṛaledeńa.

³ Israel do Probhu Isor lạgitʼ sonoticʼgeye tahẽkana; uniyakʼ pạhil phosol reakʼ gelege. Ar okoe onako jomketʼko onko do jotoge dusiko hoyena, ar onko sanamko cetanrege muhin do hecʼ paṛaoena. Iń Probhu Isorge noa katha doń meneda.”

⁴ E Jakob bõsrenko, ar Israelren sanam gusṭirenko, ape do Probhu Isorakʼ katha ańjomtaepe.

⁵ Probhu Isore meneda, “Aperen hapṛamko do cetʼ ińakʼ dosko ńamletʼa, ar onate iń khonko sạṅgińlena? Onko do ạuṛiyakʼren boṅgako pańjaketʼkote apnartetʼ hõko ạuṛiyakʼena.

⁶ Onko do bako menleda, ‘okare menaea uni Probhu Isor do? One uni Misor disạm khone rakapʼ ạguketʼle, one uni hahaṅkarreye ạyurketʼle; khaṅkar ar khorloṅ reakʼ disạmre khaṅgoṭ ar moron dhund reakʼ disạmrege? Mitʼṭecʼ disạmre one ona secʼte celege bako dãṛãnkan, ar one onare cele hoṛge bako tahenkan?’

⁷ “Iń do mitʼṭecʼ asecʼ tasecʼ hoyokʼ disạmtegeń ạguletʼpea jemon onḍenakʼ jo ar bhage bhage jiniskope jom daṛeakʼ; menkhan ape do hecʼkate ińakʼ disạmpe bhonḍ akada, ar ińakʼ ạidạriyakʼko do kurudanakʼ jinisgepe hoyocoakada.

⁸ Naekeko hõ bako kuliyana, ‘Probhu do okare menaea mente?’ Okoeyakʼ tire ạn-ạri tahẽkan onko hõ bako oromledeńa; onko do iń upạrteko hulkeda. Nạbiko hõ ạuṛiyakʼren boṅgako tayomte senkate Bakʼal debota ńutumteko nạbiyetʼ tahẽkana.

⁹ “Ona iạte iń do ape ar aperen hoponko artetʼgeń dusipea.

¹⁰ Ape do parom hecʼkate Kuprus doreão ḍhip aṛe teakʼ disạmkote parom senkate ńelpe, ar Kedarte hoṛ kolkate mońjte ạribạndhipe. Onḍepe ńela nonkan jãhãnakʼ do tishõ baṅ hoyakana.

¹¹ Jạtkoren debota do Isorko baṅkanre hõ enhõ jãhãe jạtrenkoge akoren debota do bako bodol akatʼkoa; menkhan ińren hoṛ do akoren ṭhonokren Isor bodolte ạuṛiyakʼren debotako aṅgocetʼkoa.

¹² E sermako, niạ ńelte ṭhak utạrokʼpe ar botorte thar tharaokʼpe,

¹³ Ente ińren hoṛ do bareako ghạṭ akada. Jion dakʼ reakʼ bhumbuk doń ińkangea, onko do ińgeko bạgi giḍi akadińạ, ar apnar lạgitʼ nonkan dakʼ ḍạḍiko benao akada one onakore do dakʼge baṅ tahenkan.

¹⁴ Israel do cetʼ golam kanae? Uni do cetʼ janam khongeye guti kana? Cedakʼ uni do luṭ ocokʼicʼe hoyakana?

¹⁵ Dhạcri kul doko hạnḍrạukʼ kana: uni upạrteko hạnḍrạukʼ kana. Onko do uniyakʼ disạmko ujạṛakada; ar uniyakʼ nagrahako doko ḍahao marao akada, onate onare do celege bạnukʼkoa.

¹⁶ Ona chaḍa Noph ar Tahaphones nagraharen hoṛko hõ am akʼ bohokʼ khạpriko posakʼ akatʼtama.

¹⁷ Amren Probhu Isor do ṭhik horteye idiyetʼme tahẽkanre unim bạgiyadete amtege cetʼ noako do bam ạgu akawana?

¹⁸ Ar ńitokʼ do nil gaḍa reakʼ dakʼ ńũi lạgitʼ cedakʼ Misorte dom calakʼ kana? Phurạt gaḍa reakʼ dakʼ ńũi lạgitʼ hõ Ạsurte do cedakʼem calakʼkana?

¹⁹ Am do amakʼ bạṛicʼakʼgeye sạjạimea; ar bạṛicʼ hortem calao akante uni do ame dusimea. Enḍekhan baḍaekakʼme ar hudiskate ńelme, amren Probhu Isorem bạgi giḍiyae ar uni bam botorae ona do am lạgitʼ tinạkʼ bạṛicʼakʼ ar haṛhatʼakʼge hoyokʼa. Noa katha do iń phạdkoren Probhu Isorgeń meneda.

²⁰ “Ḍher din laharege am do amakʼ arãṛem rạputʼ giḍi akada ar amakʼ tonolem topakʼ akada; arem meneda, ‘am do bạń sapʼ sorama.’ Am do mimitʼ usul buru ar hạṛiạṛ dare buṭạkore kusumbi leka ombakʼkatem laṭghaṭetʼ kana.

²¹ Iń do bachao akatʼ itạ khon janamakʼ bhage darkha reakʼ cara lekań rohoeketʼmea; enḍekhan cekate am do bạṛicʼ bir darkha nạ̃ṛĩ dom hoyena?

²² Am do sạji dakʼtem ạrupʼlenre hõ ar ḍher sạbuntem sạbunlenre hõ enhõ amakʼ ghạṭko reakʼ gabao do iń samaṅre tahengetama. Iń Probhu Isorge noa katha doń meneda.

²³ Ar cekatem meneda, iń do bạń bhõnḍ akana, am do cetʼ Bakʼal debota tayomte bam ńir sen akana? Buru nalakore amakʼ horko beṅgetʼatam; ar am okam ceka akatʼ ona hõ hudisokʼme. Am do mecka mecki baṛaekan phẽṭaṛ ũṭ leka hante natem piḍgạu baṛaekana.

²⁴ Am do hahaṅkarren mitʼṭen bir gadha eṅga leka kanam, okoe do otoṅokʼ lạgitʼ hoeye ji baṛayetʼ. Uniyakʼ ritiạṅ do okoeye khento daṛeketaea? Uni ńam bakʼṛako do laṅga haronokʼ baṅ jạruṛtakoa; otoṅokʼ jokhecʼ uni doe ńamokʼgea.

²⁵ Menkhan am do sontor akae tahenme, ar baṅkhan jaṅga reakʼ panahe hõ nosṭokʼtama ar amakʼ nạnḍri hõ rohoṛokʼ tama. Menkhan amem men akada, ‘jãhãn porhoge bạnukʼa. Iń do debotageń dulạṛetʼkoa, onkogeń pańjakoa.’

²⁶ “Kombṛoe sapʼ ocolenre cetʼ lekae lajao ocokʼ onkage Israel bõsrenko hõko lajao ocokʼa. Onko do apnarte, akoren rapajko ar kạmiyạko, onkoren naekeko ar nạbiko jotogeko lajao ocokʼa

²⁷ Onko do kaṭko metakʼa, ‘amgem ińren ạpuń kana,’ ‘ar amgem ińren eṅgạń kana.’ Onko do iń secʼ khon deako ạcur akatʼtakoa mẽtʼãhã do baṅa; enhõ muhinre doko mena, ‘dela hijukʼme, ale bańcaoleme.”

²⁸ E Jihudạ, apnar lạgitʼ okoe debotakom benao akawan onko do unre okareko tahenkana? Muhinrem paṛaolenre amko bańcao daṛeam khan doko hecʼocoge, ente aema nagrahako menakʼtama ar debotako hõko ḍhergetama.

²⁹ Probhu Isore meneda, “Cedakʼpe dusiyedeń kana? Ape sanamkoge coṅ iń upạrtepe hul akatʼ.

³⁰ Iń do ạuṛiyakʼgeń sạjại akatʼpea; ińakʼ cehaona do bape moneyada. Jom ukʼjạṛkan dhạcri kul leka apeakʼ tarwaṛe do aperen nạbikoe gocʼ akatʼkoa.

³¹ “Niạ piṛhiren hoṛko, ińakʼ katha ańjompe. Israelko ṭhen iń do cetʼ hahaṅkar iń hoyakana? Iń do cetʼ kaṛaṅ ńut reakʼ disạmiń hoyakana? Ińren hoṛ do cedakʼko mena, ‘ale do sạdhintegele dãṛãbaṛa daṛeakʼa; ar am ṭhen do bale hijukʼa?’

³² Jãhãe kuṛige cetʼ acʼakʼ abhrankoe hiṛiń daṛekea? Jãhãe baplakʼkan bạhu kuṛi do cetʼ bapla reakʼ abhrane hiṛiń daṛekea? Menkhan ińren hoṛko do ḍher din khon ińko hiṛiń akadińạ.

³³ “E Jihudạ, am do dulạṛ khudạurem gạkhuṛgea! Bạṛicʼ utạricʼ maejiu hõ amakʼ hor doe ńeleda arem cetʼaekana.

^34-35 Amakʼ tire do miridos reṅgecʼ orecʼkoakʼ jiwi reakʼ mãyãmge ńamokʼkana, onko do sind bhugạkʼ ṭhen bam ńamletʼkoa. Ar niạko tayom hõm meneda, ‘iń doń miridosgea; Probhu Isor do ińre jãhãn edre bạnukʼtaea.’ Menkhan iń do bicạrkateń sạjạimea, ente am dom meneda, ‘iń do bạń kại akada.’

³⁶ Amakʼ hor pheraotam lạgitʼ do cedakʼem ạcur baṛae kana? Ạsur babotre cetʼlekam lajao ocolen onkage Misor iạte hõm lajao ocokʼa.

³⁷ Am do bohokʼre ti capokate ona ṭhạ̃iyem bạgiyakʼa, ente okoe cetanrem bhorsalen onko do iń Probhu Isorgeń nihạ̃t giḍi akatʼkoa; onko hotete jãhãn porho do baṅ hoyokʼtama.”