Jirimiạ 19 - সান্তালী বাইবেল

Rạputʼ akan bhajan

¹ Probhu Isore meneda, “Am do senkate kuṅkạl ṭhen khon mitʼṭecʼ hasa reakʼ bhajan kiriń ạguiyme. Ar am sãote mitʼ bar murubbiko ar naekeko hõ iditorakom.

² Ona tayom kelhatʼ phaṭok reakʼ bolokʼ hor ṭhen Bin-hinom reakʼ buru nalate calakʼme. Ar okaṭakʼ kathań lạiyam onḍe senkate ona jạhirme.

³ Ona katha do hoyokʼkana, ‘E Jihudạren rapajko ar Jerusalemren hoṛko, iń Israelren Isor phạdkoren Probhu okaṭakʼ kathań roṛetʼkan ona ańjompe. Iń do niạ ṭhạ̃i cetanre nonkan ghoṭnań paṛao ocoya, ona ańjomkate onko mimitʼkoakʼ lutur do tiṅgitʼ utạrokʼtakoa.

⁴ Ente onko do ińko bạgi giḍi akadińa ar niạ ṭhạ̃i do debotakoakʼ ṭhạ̃iko benao akada; onko do nonkan debotako ṭhen dhupko jeretʼeda one onkoakʼ katha do akoren hapṛamko se Jihudạren rapajko hõ tisge bako baḍaekan tahẽkan. Ona chaḍa niạ ṭhạ̃i do miridoskoakʼ mãyãmteko perecʼ akada.

⁵ Onko do Bakʼal ńutumte jeredokʼ samaṅokʼakʼko menkate akoren hoponko seṅgelre atar giḍiko lạgitʼ Bakʼal boṭkocʼ thankoko benao akada, menkhan iń do bạń hukum akada se bạń menakada ar ona do ińakʼ monre tishõ baṅ rakapʼakana.

⁶ Onate nonkan dinko hijukʼkana tinre hoṛko do niạ ṭhạ̃i Tophet se Bin-hinom buru nala bako metakʼa, menkhan ona do gogocʼ buru lodamgeko metakʼa.

⁷ “ ‘Niạ ṭhạ̃ire iń do Jihudạ ar Jerusalemren hoṛkoakʼ goṭawakʼ iń ạuṛiyakʼ ocoytakoa. Ar okoe onkoakʼ jiwi hataoko khoj onko do onkoren bạiriko hotete lạṛhạireń gocʼkoa ar onkoakʼ mạ̃ṛĩ do coṭren cẽṛẽ ar bir janwarkoń jom ocokoa.

⁸ Niạ nagraha doń jarkhara ar landa-dhutʼakʼgeń hoeocoya; ar okoe ona aṛeteko parom calakʼ onko do ona reakʼ duk ńelte botor caṛhaoakoa arko land-dhutʼakʼa.

⁹ Onkoren bạiriko, metakʼme onkoakʼ jiwi sendrako do tinre onkoko gherao esetʼkoa un reakʼ ona kosṭokʼ oktere iń do onkoren hopon ar hoponerakoakʼ jeliń jom ocokoa ar mitʼke mitʼ hoṛ do ako aḍepaseren hoṛkoakʼ jelko joma.’

^10-11 “Ona tayom okoe am sãoteko calakʼ onko hoṛ samaṅre hasa reakʼ ona bhajanem rạpuda arem metakoa, phạdkoren Probhu Isore meneda, ‘kuṅkạlakʼ noa bhajan rạputʼ lekhan cetʼleka baṅ joṛaokʼ ṭhik onkage iń hõ noko jạtrenko ar nagrahań rạputʼ gejera. Hoṛko do Tophetreko topakoa, topako lạgitʼ eṭakʼ ṭhạ̃i baṅ tahen iạte.

¹² Iń do niạ ṭhạ̃ire ar nonḍenko hoṛko lạgitʼ okań cekae ona do noage; noa nagraha do Tophet lekań hoeocoya;

¹³ Jerusalem reakʼ oṛakʼ-duạr ar Jihudạ reakʼ rapajkoakʼ oṛakʼ-duạr, metakʼme okako oṛakʼ-duạr reakʼ chat cetanre siń cando, ńindạ cando ar ipilko ńutumte dhupko jeretʼetʼ tahẽkan ar debotako ńutumte coḍorakʼ samaṅokʼakʼko samaṅetʼ tahẽkan onako oṛakʼ-duạr do Tophet lekań bhonḍ ocoya.”

¹⁴ Ona tayom Jirimiạ do Tophet khone ruạṛ hecʼena. Probhu Isorge acʼakʼ katha lại jạhir lạgitʼ onḍeye kolledea. Uni do Probhu Isorakʼ oṛakʼ reakʼ racare teṅgokate sanam hoṛkoe galmaraoatʼkoa,

¹⁵ “Israelren Isor phạdkoren Probhu Isore meneda, ‘ańjompe, iń do niạ nagraha ar ona aḍepase reakʼ atoko cetanre oka ghoṭna paṛao ocoe reakʼ kathań menakatʼ ona do onko cetanreń paṛao ocoya, ente onko do hoṭokʼko keṭecʼ akatʼtakoa ar ińakʼ katha hõ bako ańjomleda.’ ”