Jirimiạ 18 - সান্তালী বাইবেল

Kuṅkạlakʼ oṛakʼre Jirimiạ

¹ Probhu do Jirimiạ ṭhen noa kathae sodorkeda,

² “Kuṅkạlakʼ oṛakʼte calakʼme, onḍege iń do am sãote kathań roṛa.”

³ Ona iạte iń do kuṅkạlakʼ oṛakʼteń senena ar unre uni do acʼakʼ oṛakʼreye kạmikan tahẽkana.

⁴ Uni do hasa reakʼe bekʼnaokan tahẽkana. Uniyakʼ tire bhajanko jãhãtinre bạṛijokʼkan khan, uni do ona reakʼ eṭakʼ bhajane benaoetʼ tahẽkana, acʼ, metakʼme, kuṅkạl bese bujhạuetʼ tahẽkan leka.

⁵ Unre Probhu Isor do ińe metadińạ,

⁶ “Ińiń meneda, ‘E Israelren hoṛko, iń do cetʼ uni kuṅkạl leka ape sãote bạń beohar daṛekea? E Israelren hoṛko, ape do ińakʼ tire kuṅkạlakʼ hasa leka kanape.

^7-8 Jãhãtis jãhã jạtrenko se jãhã rajosṭirenko rehetʼ sudhạń totʼ giḍikako, ariń rạputʼ giḍikako se marao giḍikako reakʼ iń lại sodor lekhan ar onko jạtrenko ona sontor katha ańjomkate bạṛicʼ khonko ruạṛokʼ, enḍekhan oka muhin ạgui reakʼ iń goṭaletʼ ona do ar bạń paṛao ocoya.

^9-10 Ar jãhãtis jãhã jạtrenko se jãhã rajosṭiń benao ruạṛ ar rohoe reakʼ kathań lại jạhir lekhan ar onko jạtrenko do ińakʼ mẽtʼre bạṛicʼakʼko kạmi ar ińakʼ kathako bako ańjom, enḍekhan onko oka bhạlạiko reakʼ iń hudisletʼ ona bhạlại iạteń kastaokʼa.’

¹¹ “Ona iạte am do Jihudạ ar Jerusalemren hoṛkom metakoa, Probhu Isore meneda, ‘ńelpe, ape lạgitʼ muhin reakʼ iń hudis akada ar ape upạrte mitʼṭecʼ iń goṭa akada. Onate ape do apeakʼ bạṛicʼ hor khon ruạṛokʼte bhageakʼ colonpe ar bhageakʼko kạmipe.’

¹² Menkhan onko doko roṛ ruạṛkeda, ‘jãhãn labge bạnukʼa. Ale do aleakʼ bundisakʼko leka gele calakʼa; ale mimitʼko do aleakʼ bạṛicʼ mon reakʼ kạṭhuạtetʼ lekagele kạmiya.’ ”

¹³ Ona iạte Probhu Isore meneda, “Jạt jạtrenko talare ḍunḍhạukate ńelme, noa lahare nonkan katha do okoeye ańjomakada? Kũạri kuṛi Israel do mitʼṭecʼ hirkhạwakʼe kạmiakada.

¹⁴ Lebanon reakʼ him do cetʼ jãhãtis buru reakʼ dhasna khon le cabakʼa? Ar sạṅgiń khon ạtu ãṛgonkan reaṛ dakʼ do cetʼ jãhãtisokʼ cabakʼa?

¹⁵ Menkhan ińren hoṛ do iń hiṛińkate ạuṛiyakʼren boṅga ṭhen dhupko jeretʼeda. Onko do akoakʼ ḍaharreko tohotʼ gurakana. Ar iń sabeń lạgitʼ khạyũkʼko la akada, ona sedae reakʼ soṛok korege. Onko do bhage hor bạgikate bạṛicʼ secʼko ghańjeṛ akana.

¹⁶ Ona iạte onkoakʼ disạm do potit jumi ar mitʼṭecʼ hirkhạwanakʼ jinis lekage hoyokʼtakoa; ar jãhãege ona aṛeteko parom senokʼ onko do hahaṛa tulucʼ bohokʼko rukuiytakoa.

¹⁷ Onkoren bạiriko samaṅre onko do purub reakʼ hoe lekań chirchạturkoa; ar onkoakʼ muhin hilokʼ doń dea giḍikoa.”

Jirimiạ upạrte soṛojontro

¹⁸ Hoṛko menkeda, “Dela, abo do Jirimiạ upạrte phundi bon aṭaoa; ente naeke ṭhen ạn-ạri reakʼ cecetʼakʼ, ạkilanko ṭhen sopolha ar nạbiko ṭhen Isorakʼ katha ma menakʼge. Onate dela, aboakʼ moca kathate uni bon dusiyea ar uniyakʼ katha do babo moneyakʼa.

¹⁹ E Probhu Isor, ińakʼ katha ańjomme; iń upạrte okam menakatʼ ona moneyakʼme.

²⁰ Bhageakʼ bodolte cetʼ bạṛicʼakʼko halaea? Menkhan onko do iń lạgitʼ ghaḍlakʼko la akada. Disạime, amakʼ edre onkore jemon ruạṛ calakʼ onate am samaṅre teṅgokate onkoakʼ kathań roṛetʼkana.

²¹ Onate onkoren hoponko do akal ar tarwaṛere baṛe soprotkom. Onkoren bạhuko do bạńjhi arko rạnḍikʼtakoma; onkoren herel hoṛ do mahamạriteko gujukʼma, ar onkoren juạnko hõ lạṛhạire tarwaṛetege.

²² Onko upạrte ackage hạ̃hạ̃nkom ạgukote onkoakʼ oṛakʼ khon rakʼko ańjomokʼma, ente iń sabeń lạgitʼ onko do ghaḍlakʼko la akada ar ińakʼ jaṅga lạgitʼ pạsiko oḍaoakada.

²³ Menkhan E Probhu Isor, iń gojeń lạgitʼ noako soṛojontro reakʼ katha dom baḍaegea. Onkoakʼ noa behok do alom ikạitakoa se amakʼ mẽtʼãhã samaṅ khon onkoakʼ kại do alom meṭaotakoa. Onko do samaṅregeko tohotʼ gurokʼma; ar amem edrekokʼ jokhecʼge halawakome.