Jirimiạ 17 - সান্তালী বাইবেল

¹ Probhu Isore meneda, “Jihudạ reakʼ kại do mẽṛhẽtʼ kolomte ol akana, hirạ reakʼ surshạtege onkoakʼ ontorre, onkoakʼ pinḍ reakʼ dereńre ol gạḍiạu akana.

² Aperen hopon ar hoponerako do mimitʼ hạṛiạṛ dare buṭạkore ar usul buruko reakʼ than boṭkocʼko ar Asera khunṭiko disạyetʼkana.

³ E Jihudạ, amakʼ kại gunạkʼte disạm talare ińakʼ burure amakʼ dhonko ar amakʼ murạiko ar goṭa disạm reakʼ amakʼ than boṭkocʼko do luṭ reakʼ jinis lekateń soprota.

⁴ Okaṭakʼ ạidạriyiń ematʼme tahẽkan, ona do amakʼ dostegem ada. Ar okaṭakʼ disạm reakʼ katha bam baḍaeakatʼ ona disạmre amren bạirikoren golamiń hoyocomea, ente am do ińakʼ edre seṅgelem salgao akatʼtińạ ona do jaejug hạbicʼ jolokʼa.”

⁵ Probhu Isore meneda, “Okoe hoṛ manwa cetanreye bhorsakʼkan ar acʼakʼ daṛere pạtiạue dohoyetʼte ińre mon bạnukʼtae uni doe sarapanicʼ kana.

⁶ Uni do potit jumire mitʼṭecʼ jhạuạ lekanae; bhage okte hecʼlen khan ona do bae ńela. Uni do hahaṅkarre lolo ṭhạ̃ire, metakʼme okare celege bako girobasokʼ nonkan reḍha ṭhạ̃ireye girobasokʼa.

⁷ “Menkhan bhạgangea uni hoṛ do, okoe do Probhu Isorreye bhorsakʼkan ar uniyakʼ pạtiạuren rehetʼ doe Probhu Isorkan.

⁸ Uni do dakʼ aṛere rohoe akan dare lekanae one ona reakʼ rehetʼ do gaḍa hạbicʼ ạtiń senokʼkan. Setoṅ din hecʼlenre uni do bae botorokʼa; uniyakʼ sakam do jao okte hạriạṛge tahentaea. Akal bochorre hõ bae dạndikʼa ar jao oktegeye jo bahakʼa.

⁹ “Mon do sanamakʼ khon ṭhokgea, ona do oka lekate hõ baṅ bogekʼa. Manwa ontor do okoe hõ bae bujhạu daṛeakʼa.

¹⁰ Iń do Probhu Isorakʼ ontoriń ḍunḍhạueda ar moniń biḍạu aṭkareda; iń do manwawakʼ dãṛãn ar uniyakʼ kạmi lekate kuṛạiyiń emaekana.

¹¹ “Uni hoṛ do chitri cẽṛẽ lekanae, okoe acʼ bae obor akatʼ beleren hoponkoe jarwayetʼko; uni do bạṛicʼ lekate dhone hameṭjoṅa. Uni do acʼakʼ adha dinkorege ona doe bạgiyakʼ kana, ar mucạtʼre uni do lelha lekae sạbudokʼa.”

¹² Ona pạhil khon bạisạu akatʼ ṭhonokanakʼ siṅghạsonge aboakʼ koejoṅ oṛakʼ reakʼ ṭhạ̃i do.

¹³ E Probhu, Israelkoakʼ as, okoe amko bạgi akatʼme onko sanam do lajaoreko paṛao ocokʼa. Am ṭhen khon okoeko ruạṛ senakan onkoakʼ ńutum do dhuṛire olokʼtakoa, ente onko do jiwetʼ dakʼren jharna Probhuko bạgi akadea.

¹⁴ E Probhu, bogeyińme, enḍekhaniń bogekʼa; bańcao ińme, enḍekhaniń bańcaokʼa, ente amkangeam ińren sarhaoanicʼ do.

¹⁵ Ńelme, onko doko mitạń kana, “Probhuakʼ katha do okayena? Ona do ńitokʼ purạukʼma.”

¹⁶ Amren hoṛ gupiko khon iń do bạń ńir pharak akana; am dom baḍaegea muhin do bạń khojkana. Ińakʼ moca khon oka oḍokokʼ ona do am ṭhen baṅ okoya.

¹⁷ Iń lạgitʼ toras do alom hoyokʼa; muhinren hirlạ dom amkangea.

¹⁸ Iń khedeńkanko do lajaoreko paṛaokʼma, menkhan iń do alom lajao ocoyińạ. Onko doko torasokʼma, menkhan iń do alom toras ocoyińạ. Onko cetanre muhin reakʼ din ạguiyme; ar dobṛa nosṭote jarkharkom!

Jirạukʼ mãhã manao

¹⁹ Okaṭakʼ phaṭok duạrte Jihudạkoren rapajko bolo oḍokokʼ kan tahẽkan Probhu Isor do ona phaṭok duạr ṭhen ar Jerusalem reakʼ eṭakʼ phaṭok duạrko ṭhen senkate teṅgokʼ lạgitʼe metadińạ.

²⁰ Uni do noa kathae metadińạ, “E Jihudạren rapajko ar sanam hoṛko ar Jerusalemre girobasokʼkan hoṛko, ape okoe do noa phaṭok duạrtepe bolo oḍokokʼkan, Probhu Isorakʼ katha baṛe ańjompe.

²¹ Probhu Isore meneda, ‘sontor akae tahenpe; jirạukʼ mãhãre jãhãn bojha alope idi ạguiya se Jerusalem reakʼ phaṭok bhitrite alope adera.

²² Cetʼ leka aperen hapṛamkoń hukumatʼko tahẽkan onkage jirạukʼ mãhãre ape do apeakʼ oṛakʼ khon jãhãn bojha alope oḍoka se jãhãnakʼ alope kạmiya, bickom jirạukʼ mãhã do iń ńutumte begar dohokakʼpe.

²³ Aperen hapṛamko ona kathako ańjomletʼre hõ, bako moneyada. Onko do hoṭokʼko keṭecʼketʼ takoa; onko do ińakʼ katha bako ańjomleda ar ińakʼ ḍanṭao hõ bako manaoleda.

²⁴ Menkhan ape do sontorkate ińakʼ katha lekape calakʼ ar jirạukʼ mãhãre nagraha reakʼ phaṭok duạrte jãhãn bojha bape ạgui ar jirạukʼ mãhãre jãhãnakʼ baṅ kạmikate iń ńutumtepe begar dohoy,

²⁵ enḍekhan aperen rapajko do Dạudakʼ siṅghạsonre duṛupʼkate rajosṭiko calaoa. Onko do, akoren rajren kạmiyạko ar Jihudạren hoṛko ar Jerusalemren hoṛkoakʼ rãt gạḍi ar sadomre decʼkate nagraha reakʼ phaṭokteko bolo oḍokokʼa; ar nagraha do tishõ baṅ ujạṛokʼa.

²⁶ Jihudạ reakʼ nagrahako ar Jerusalem beṛhaeteakʼ atoko khon Benjạmin reakʼ ṭoṭha khon ar usul copotʼ buru ṭoṭhako khon ar Negeb khon hoṛko hijukʼa ar Probhu Isorakʼ oṛakʼre jeredokʼ samaṅokʼakʼ, janwar samaṅokʼakʼ, anaj samaṅokʼakʼ, dhudhup ar suluk samaṅokʼakʼ reakʼ jinisko ạguiya.

²⁷ Menkhan ińakʼ katha bape ańjom ar jirạukʼmãhã iń ńutumte bape begar dohoy ar Jerusalem phaṭok duạrte enhilokʼ bojhakope ader, enḍekhan Jerusalem reakʼ sanam phaṭok duạrkore seṅgeliń lagaoa ar ona do Jerusalem reakʼ dolankoe joma. Ona seṅgel do okoehõ bako ĩṛicʼ daṛeakʼa.’ ”