Jirimiạ 16 - সান্তালী বাইবেল

Hae haeyokʼ dinko reaṅ

¹ Ona tayom Probhu Isore metadińạ,

² “Noa ṭhạ̃ire do alogem baplakʼa ar gidrạko hõ alom janamkoa,

^3-4 ente iń Probhu Isorgeń meneda, noa ṭhạ̃ire janamokʼ gidrạko, ar onkoren eṅgatko ar onkoren apatko do gogocʼ rogteko gujukʼa. Okoehõ onko lạgitʼ do bako homor halaṅa ar okoehõ onko do bako topakoa menkhan guricʼ leka giḍi akanko tahena. Onko do lạṛhại ar akal hoteteko marao utạrokʼa ar onkoakʼ mạ̃ṛĩ do coṭren cẽṛẽ ar birren janwarkoakʼ jomakʼge hoyokʼa.

⁵ “Okaṭakʼ oṛakʼre hoṛko homor halaṅetʼkan ona oṛakʼte do alogem bolokʼa; Homor hakʼlaṅ ar onkoakʼ duktem dukokʼte onḍe do alogem calakʼa, ente noko hoṛko khon ińakʼ suluk, dulạṛ ar daya doń ocokʼ akatʼtińạ.

⁶ Niạ disạmren huḍiń hapṛakʼ sanamgeko gujukʼa. Okoehõ onko do bako topakoa, onko lạgitʼ do bako homor halaṅa ar onko lạgitʼ akoakʼ hoṛmo hõ bako getʼ cirạitakoa, ar bohokʼ hõ bako hoyo poṭorokʼa.

⁷ Okoe onko gocʼko lạgitʼko homor halaṅ, se eṅgat-apat lạgitʼko homor halaṅ onko jiwi raṛecʼ emako lạgitʼ okoehõ piṭhạ ar dakʼ do bako emakoa.

⁸ “Bhoj oṛakʼte senkate jom ńũi lạgitʼ alope duṛupʼa,

⁹ ente iń Israelkoren Isor sanam daṛeanicʼ Probhugeń meneda, iń do niạ ṭhạ̃irege hoṛkoakʼ mẽtʼãhã samaṅre onkoakʼ rạskạ ar hulạs reakʼ aṛaṅiń cabaetakoa ar jãwãe koṛa ar bạhu kuṛiyakʼ aṛaṅ hõń bond ocoya.

¹⁰ “Noko hoṛko niạko katham jạhirako tayom tinre amko kulimea, ‘Cetʼ iạte Probhu Isor do ale upạrte nonkan muhin reakʼ kathae roṛeda? Ar aleakʼ ghạṭ do cetʼ kantalea? Aboren Probhu Isor upạrte ale do cetʼle kại akada?’

¹¹ Unre am do onkom metakoa, Probhu Isore meneda, ‘noa reakʼ karon do hoyokʼ kana aperen hapṛamko do ińko bạgi giḍi akadińa ar debotako pańja akatʼkote onkoko sewa akatʼkoa. Onko doko bạgi giḍi akadińa ar ińakʼ ạn-ạriko bebatao akada.

¹² Menkhan ape do aperen hapṛamko khonhõ bạṛicʼpe coloneda. Ńelpe, ape mimitʼko do ińakʼ katha leka sen baṅkate apeakʼ bạṛicʼ mon reakʼ keṭecʼtetʼ iạte apeakʼ kusi lekape calakʼkana.

¹³ Ona iạte ape do nonkan mitʼṭecʼ disạmteń lebda giḍikapea one ona disạm reakʼ katha bape baḍaekan, ar aperen hapṛamko hõ bako baḍaekan tahẽkana. Onḍe ape do siń ńindạ debotakope sewawakoa, ente iń do ar baṅgeń dayawapea.’ ”

¹⁴ Probhu Isore meneda, “Nonkan dinko hijukʼkana unre hoṛko do ar bako mena, ‘Misor disạm khon okoe do Israelkoe oḍok ạguletʼko, uni jiwetʼ Probhu Isor ńutumteń kiriạkʼkana,’

¹⁵ bickomko mena, ‘utạr disạm ar eṭakʼ disạmkore okoe do Israelkoe sạṅgińletʼko ar onḍe khone oḍok ạguakatʼko uni jiwetʼ Probhu Isor ńutumtele kiriạkʼ kana.’ Onko do ona kathako mena, ente onkoren hapṛamko okaṭakʼ disạmiń udukʼatʼko tahẽkan ona disạmtegeń ruạṛ ạgukoa.

¹⁶ “Menkhan ńitokʼ do ḍher jạilạgeń hoho ạgukoa ar onko do hako lekako sapʼkoa. Ona tayom iń do arhõ sesendrako hõń hoho ạgukoa onko do mitʼke mitʼ maraṅ ar huḍiń buruko ar dhiri ciritʼ khonko sendra totʼkoa.

¹⁷ Onkoakʼ dãṛãn cetanre ińakʼ mẽtʼ do menakʼa; ińakʼ mẽtʼ khon danaṅre do bạnukʼkoa ar onkoakʼ ghạṭ hõ iń khon do baṅ okokʼtakoa.

¹⁸ Onkoakʼ dusṭạmi ar kại gunạkʼte onko do doboṛageń hala ruạṛakoa, ente ińakʼ disạm doko bhonḍ akada ar akoren dhiri murti ar boṅga muṭhạnkote ińakʼ ona ạidạriko tuhetʼ akada.”

¹⁹ E Probhu Isor, ińakʼ daṛe ar ińakʼ aotan gaṛ, ar gạr hilokʼre ińakʼ hirlạ! dhạrti reakʼ ses simạ khon eṭakʼ jạtren hoṛ do am ṭhen hecʼkateko mena, “Aleren hapṛamko do eṛe debotako ar ạuṛiyakʼren boṅga murtiko ạidạrian tahẽkana, ar onate onkoakʼ do jãhãn porhoge baṅ hoylentakoa.

²⁰ Hoṛko do cetʼ apnar lạgitʼ debotako benao daṛeakoa? Arko benaolekore hõ onko do isor doko baṅkana.”

²¹ Probhu Isore meneda, “Ona iạte ińakʼ daṛe ar ektiạri do Israelkoń udukʼakoa. Onateko baḍae daṛeakʼa ińakʼ ńutum do Probhu Isor kana mente.