Jirimiạ 15 - সান্তালী বাইবেল

¹ Unre Probhu Isor do ińe metadińạ, “Mose ar Sạmuel hõ hecʼkate iń samaṅrekin teṅgolenre hõ enhõ ińakʼ mon do noko hoṛ secʼ ohoge ạcurlena. Iń samaṅ khon noko do laga ńirkom; onko doko sen joṅma.

² Onko do amko kulilem khan, ‘ale do cetʼ hoyokʼtalea?’ Enḍekhan onkom metakoa, ‘Probhu Isor do noa kathae meneda, ‘okoe mahamạri lạgitʼ kanko onko do mahamạrite, okoe tarwaṛe lạgitʼ kanko onko do tarwaṛete ar okoe akal lạgitʼ kanko onko do akalteko gujukʼa; ar okoe do bondi ocokʼ lạgitʼ kanko doko bondi idi ocokʼa.”

³ Probhu Isore meneda, “Onko upạrte pon lekan nonosṭokoń kolkoa. Tarwaṛete doko gujukʼa, setako doko or cirạkoa, ar coṭren cẽṛẽko ar otren janwarko doko jomkoa arko mohor meṭaokoa.

⁴ Jihudạren raj Hiskiạren hopon Manase Jerusalemre okae ceka akatʼ ona iạte uni oka sạjạiyiń emae ona ńelte dhạrtiren sanam rajosṭiren hoṛ do botor caṛhaoakoa.

⁵ “E Jerusalem, am do okoeye dayawama? Am lạgitʼ do okoeye homor halaṅa? Cetʼ leka menama ona kulime lạgitʼ do okoeye hijukʼa?

⁶ Iń Probhu Isorgeń meneda, am dom bạgi akadińạ ar eṭakʼ hortem ghańjeṛ akana. Ona iạte am secʼ tiyiń tiạrtińạ ariń maraomea; ar bạń dayawama.

⁷ Disạm reakʼ phaṭok duạrkore amren hoṛ do haṭakʼteń gumkoa. Ińren hoṛko cetanre hoponkoakʼ gujukʼ reakʼ homor halaṅ iń paṛao ocoya ar onko doń marao utạrkoa, ente onko do akoakʼ hor khon bako ruạṛ akana.

⁸ Onkoren rạnḍi maejiukoakʼ lekha do gaṅgaren gitil lekań hoeocoya. Am do bir banṭa hoṛren eṅgat kanam, amren hoṛko upạrte tikin jokhecʼ mitʼṭecʼ nonosṭoyicʼ iń ạguiyea; ar onko cetanre ackage haso ar botoriń paṛao ocoya.

⁹ Eae goṭen hoponkoren eṅgat do lajao ar opoman dosaregeye gujukʼa. Okte ạurirege uniyakʼ jion reakʼ siń cando doe hạsurokʼa. Ar okoe jiwetʼko tahen onko hõ tarwaṛe samaṅreń ạgukoa. Iń Probhu Isorge noa katha doń menetʼkana.”

¹⁰ Hae, hae! E eṅgạńtiń, cedakʼ iń dom janamkedińa, one okoe sãote goṭa disạm do jhogṛa are lạṛhạikan? Okoehõ rin do bạń emakatʼkoa se okoehõ iń do rin bako emakawạdińa, enhõ sanamkoge iń doko sarapạńkana.

¹¹ Probhu Isore meneda, “Mitʼṭecʼ bhạlại iạte khạṭigeń aṛakʼmea. Iń do nonkan dosań hoeocoya, onate muhin ar akal oktere amren bạiriko do am ṭhen hecʼkateko nehõrokʼa.

¹² “Jãhãe hoṛ do cetʼ utạr disạm reakʼ mẽṛhẽtʼ se pitạle rạputʼ daṛekea?

¹³ E Jihudạ amakʼ sanam kạiko ar goṭa disạm tala reakʼ kạiko ńutumte amakʼ dhon ar murạiko do, begor damteakʼ luṭakʼ jinis lekateń soprota.

¹⁴ Oka disạm reakʼ katha bam baḍaeakatʼ ona disạmre amren bạirikoren golamiń hoyocomea, ente ińakʼ edre seṅgel do am cetanre jolakana ar ona do jaejug hạbicʼ jolokʼa.”

¹⁵ E Probhu Isor, am do jotowakʼgem bujhạu daṛeakʼkana; onate ińakʼ katha disạime ar ińakʼ moneyakʼme. Ińren jor julumko cetanre amge hala hạlime. Onko cetanre amakʼ sombhuri do ḍhergetama, menkhan onko tire do alom marao ocoyińạ; disạime, am iạte cetʼlekan ṭiṭkạriń sahao akada.

¹⁶ Amakʼ katha sodorena ar ińakʼ ontorre ona doń ataṅkeda; ona katha do iń lạgitʼ rạskạwanakʼ ar ontorre sukge tahẽkana, ente E phạdkoren Probhu Isor, iń doń amren kangea.

¹⁷ Okoe rạskạ ar hulạsate bubulakʼko ńũiyetʼkan onkoakʼ dolre do tishõ bạń duṛupʼlena, onko sãote tishõ bạń rạskạ mitʼlena; iń cetanre amakʼ ti tahẽkante eskargeń duṛupʼkan tahẽkana ar am do raṅgaotem perecʼ akadińa.

¹⁸ Cedakʼ ińakʼ haso do baṅ cabakʼkantińạ, cedakʼ ińakʼ ghao do baṅ besokʼkantińạ, cedakʼ ona do baṅ ocogokʼkana? Iń ṭhen do cetʼ eṛe ạtukʼkan dakʼ ar baṅ tahenkan jharna dakʼ lekagem hoyokʼa?

¹⁹ Unre Probhu Isor doe menkeda, “Monem ạcurletam khan iń do lahate lekań ataṅ ruạṛmea jemon ińem sapʼsorạń; ar ạuṛiyakʼ katha roṛ baṅkate damanakʼ katham roṛ enḍekhan ińakʼ mocategem roṛa. Noko hoṛ do am secʼko ạcurokʼa, menkhan am do onko secʼ alom ạcurokʼa.

²⁰ Noko hoṛ ṭhen do pitạl reakʼ mitʼṭecʼ daṛeanakʼ pạcri lekań hoyocomea; onko do am upạrteko lạṛhạiya menkhan bako bhagao daṛeama, ente iń Probhu Isorgeń metamkana, am rukhiyạme ar bańcaome lạgitʼ iń do am são sãoteń tahena.

²¹ Iń do bạṛicʼkoakʼ ti khoniń rukhiyạmea ar kurmutạhakoakʼ ti khon doń chaḍaomea.”