Jirimiạ 13 - সান্তালী বাইবেল

Musnạ kicricʼ reakʼ jhaṅga

¹ Probhu Isor do iń metadińa, “Am do senkate musnạ kicricʼ reakʼ mitʼṭecʼ jhaṅga kirińme ar horogme, menkhan ona do dakʼre alom lohoda.”

² Onate Probhu Isorakʼ hukum leka iń do mitʼṭecʼ jhaṅga kirińkateń horokʼkeda.

³ Unre Probhu Isor do dosar dhaoe metadińạ,

⁴ “Okaṭakʼ jhaṅga kirińkatem horokʼ akatʼ ona totʼkate ńitge phurạt gaḍa ṭhen senokʼme ar dhiri reakʼ ciritʼre oko oṭokakʼme.”

⁵ Onate Probhu Isorakʼ katha leka iń do phurạt gaḍa ṭhen onań oko doho oṭokada.

⁶ Ona ḍher din tayom Probhu Isore metadińạ,, “Am do ńitokʼ phurạt gaḍa ṭhen calakʼme ar onḍe okaṭakʼ jhaṅga oko dohokakʼ iń metakʼme tahẽkan ona ạguiyme.”

⁷ Ona iạte iń do phurạt gaḍa ṭhen senkate okareń oko doholetʼ onḍe khon ona jhaṅgań gelecʼ oḍokkeda, menkhan unre ona do nosṭo akan tahẽkana ar baṅ beoharokʼ leka hoyena.

⁸ Ona tayom Probhu Isor do ińe metadińạ,

⁹ “Iń Probhu Isor do noa kathań meneda, Jihudạ reakʼ bạḍại ar Jerusalem reakʼ maraṅ bạḍại do nonkageń maraoa.

¹⁰ Noko bạṛicʼ jạtren hoṛko, okoe do ińakʼ katha ańjom bako moneyakʼkan ar onkoakʼ mon reakʼ kạṭhuạtetʼreko taṛametʼ ar eṭakʼ Isorko sewako arko ḍobokʼakokan onko do noa jhaṅga lekageko okạjwạ ocokʼa.

¹¹ Hoṛko cetʼleka ḍanḍare jhaṅgako horog onkage iń do goṭa Israel ar Jihudạren sanam hoṛko ińreń jalatʼ ocoletʼkoa, jemon onko do ińakʼ ńutumko sarhaotiń arko manotiń ar ińren hoṛko hoyokʼ, menkhan onko do ińakʼ katha bako ańjomleda.

Darkha rasa reakʼ kum

¹² “Onko do noa katham metakoa, Israelren Probhu Isore meneda, ‘darkha rasa dohowakʼ mitʼke mitʼ kum do darkha rasate perejtape.’ Arko metam khan, ‘ale do cetʼ bale baḍaea, darkha rasa dohowakʼ mitʼke mitʼ kum do darkha rasate perej hoyokʼa mente?’

¹³ Enḍekhan onkom metakoa, Probhu Isore meneda, ‘okoe niạ disạmreko girobasokʼ kan, metakʼme Dạudakʼ siṅghạsonre duṛupʼ akan sanam rapajko, naekeko, nạbiko ar Jerusalemre girobasokʼ kan jotoge iń doń bul ocokoa.

¹⁴ Darkha rasa reakʼ kumko leka mimitʼ hoṛ do eṭakʼ hoṛ cetanreń tawakʼ gejerea; baṅ doe apatkan ar baṅ doe hoponkan jotogeń gejer cabakoa. Iń do daya hõ baṅ ar mãyã hõ bạń mãyãwakoa; onko doń marao cabakoa.’ ”

Bondi ocokʼre botor udukʼako

¹⁵ Ańjomtińpe, ar moneyakʼtińpe, bạḍạiko leka do alope hoyokʼa, ente Probhu Isor do kathae roṛeda.

¹⁶ Ape do aperen Probhu Isor sarhaoepe, ar baṅkhan uni do ńute ạguapea ar ape do ńut hijukʼkan buru cetanrepe tohodokʼa. Marsal reakʼpe aslenre hõ uni do ńute hoeocoya, ar ona do kaṛaṅ kucạṅ ńutge hoyokʼa.

¹⁷ Ar katha bape ańjom khan apeakʼ bạḍại iạte iń do danaṅreń raga, ạḍitetʼ geń raga ar ińakʼ mẽtʼ do mẽtʼ dakʼte perecʼjokʼtińạ, ente Probhu Isorren hoṛ do bondikateko idi ocokʼa.

¹⁸ Probhu Isor do ińe metadińạ, “Am do raj ar uniren eṅgatem metaea, ‘siṅghạson ṭhen khon pheḍ hijukʼ ben, ente abenakʼ ṭhonokanakʼ mukuṭ do abenakʼ bohokʼ khon ńur akana.

¹⁹ Negeb reakʼ nagrahakote bolokʼ reakʼ hor do bondokʼa ar onḍe do okoehõ bako bolo daṛeakʼa. Jihudạren sanam hoṛ do bondikateko idi ocokʼa, ar sanamgeko idi ocokʼa.’ ”

²⁰ Probhu Isore meneda, “E Jerusalem, beṅgetʼ rakabme, ńelme utạr secʼ khon bạiriko daraekana. Okaṭakʼ palrenko do amakʼ tireko em hoylen, ar okoeko bhiḍiko iạtem bạḍạiyetʼ tahẽkan onko doko okayena?

²¹ Okoeko rapaj sãotem gatelen Probhu Isor do am cetare onko tinreye dohokoa unre am do cetʼem menkea? Bedonokʼ jokhecʼ maejiu cetʼ leka haso rakapʼae onkage amhõ cetʼ baṅ hasomea?

²² Am apnartetʼem kulilen khan, ‘ińre noa do cedakʼ hoyena?’ Enḍekhan ona reakʼ roṛ ruạṛ do hoyokʼkana, ạḍi utạr kạiko iạte amakʼ kicricʼko do oṛecʼ akantama arem jorbojor ocoakana.

²³ Kus disạmren hoṛ do cetʼ acʼakʼ harta reakʼ roṅ se tạrupʼ do acʼakʼ ṭiklạkʼ ṭiklạkʼ dage pherao daṛeataea? Amhõ onkage bhage kạmi do bam daṛeakʼa, ente bạṛicʼakʼ kạmikoregem lobdhao akana.

²⁴ “Hahaṅkarre hoete oṭaṅ calakʼkan bhusạ leka iń do amren hoṛkoń oṭaṅ idikoa.

²⁵ Noage amakʼ kuṛại do; noage am lạgitʼ iń soṅ dohoakada, ente am dom hiṛiń akadińạ ar debotakom pańja akatʼkoa.

²⁶ Amakʼ kicricʼ do mẽtʼãhã hạbicʼ iń rakabtama jemon amakʼ lajaoteakʼ ńelokʼtam.

²⁷ Iń do amakʼ laṭghaṭ, hinhạukʼ ar nilạjiạ loṭghuṭgeń ńelakada; ṭạnḍi ar buru boṭkocʼre amakʼ hirkhạwakʼ kạmiko hõń ńelakada. Amre do hae hae E Jerusalem! Ar tinạkʼ din besapha akan dom tahena?”