Jirimiạ 12 - সান্তালী বাইবেল

Jirimiạ do Probhu Isore kuliyedekana

¹ E Probhu Isor, am upạrteń mamblakʼ kanre hõ am do jao oktem dhoromgea. Enhõ iń do amakʼ bicạr reaṅ am sãote thoṛaganiń galmaraoa. Bedhoromkoakʼ hor do cedakʼ jo bahakʼkantakoa? Bepạtiạr hoṛ do cedakʼ khạtirjomako girobaso daṛeakʼ kana?

² Onko do amgem rohoey akatʼkoa arko rehetʼ akana; onko doko harakʼkana arko jo bahakʼkana. Onko do mocate jao okte amakʼ kathako roṛa menkhan onkoakʼ ontor do am khon ḍher sạṅgińgetakoa.

³ E Probhu Isor, am dom baḍae akadińạ; arem tunkhi talaseyedeń kana ar tinạkʼ iń botoramkan ona hõm biḍạu aṭkar edeńkana. Onko do bhiḍiko leka gurko lạgitʼem tiyạkʼ idiyetʼkoa; ar gurko hilokʼ lạgitʼem begar dohoyetʼkoa.

⁴ Disạm do tinạkʼ dine homor halaṅa ar ṭạnḍi reakʼ ghãs hõ tinạkʼ din tolmocʼ akae tahena? Okoe onḍeko girobasokʼ kan onkoko bạṛicʼgete janwar ar cẽṛẽko hõko marao akana. Onko hoṛko meneda, “Abo cetʼ bon cekayetʼ do bae ńeńelkana.”

Isorakʼ roṛ ruạṛ

⁵ “Manwa sãote ńir haparaokʼrem laṅgayen khan tobe do sadom sãote ńir haparaokʼ do cekatem daṛekokʼa? Eken sulukte perecʼ disạmrege khạtirjoma tahenem hudisetʼ khan enḍekhan jordan reakʼ bir gajaṛre do cekatem tahena?

⁶ Amren boehako, metakʼme am bõsren hoṛ do bepạtiạrko hoyakana; onko hõ am tayomreko lagao akana. Am reaṅ bhageakʼ kathako roṛlere hõ onko do alom pạtiạuakoa.

⁷ “Iń do amren hoṛkoń aṛakʼ giḍi akatʼkoa ar ińakʼ sompotti Israel doń bạgi akadea; ar okoeyiń dulạṛede uni do acʼren bạirikoakʼ tireń soprot akadea.

⁸ Ińakʼ sompotti do birren mitʼṭen dhạcri kul leka hoyakana. Uni do iń ńelteye hạnḍrạukʼ kana, onate iń do uniń kurudae kana.

⁹ Ińakʼ sompotti iń ṭhen do sendra cẽṛẽ leka hoyakana, one eṭakʼ sendra cẽṛẽko gherao esetʼkate ińko hạ̃neń kan. Am do senkate sanam bir janwarko jarwakate ạgukom jemon onko do uniko jom daṛeae.

¹⁰ Aema gupiko do ińakʼ darkha bagwanko nosṭo akatʼtińạ ar jaṅgateko lebetʼ gasmanḍao akada; ińakʼ mońj bagwan do ujạṛakʼ ar hahaṅkargeko hoyoco akada.

¹¹ Ona do iń ṭhene homor halaṅetʼkana. Goṭa disạmge khaṅkor ot hoyakante okoe hõ bako moneyakʼkana.

¹² Hahaṅkar ṭoṭha reakʼ ceḍe buruko cetanre maraoakʼge hecʼena, ente Probhu Isorakʼ tarwaṛe do disạm reakʼ mitʼ nakha khon eṭakʼ nakha hạbicʼe jojomkana; ar okoehõ sulukte do bạnukʼkoa.

¹³ Onko do guhumko ereda menkhan jạnumgeko ireda; onko do kạṭhinko khaṭaokʼkana menkhan cetʼge bako ńameda. Probhu Isorakʼ jolokʼkan edre iạte ape do apeakʼ phosol irpe lajaokʼ kana.”

¹⁴ Probhu Isore meneda, “Ạidạri lekate okaṭakʼ ṭhạ̃i ińren hoṛkoń em akawatʼko onare ińren sanam kharap aḍepase hoṛ do jhãpko emakada. Ona iạte iń do onkoakʼ disạm khon onkoń or totʼ giḍikakoa ar onko tala khon Jihudạren hoṛkoń rakapʼ ạgukoa.

¹⁵ Menkhan onkoń totʼ giḍikako tayom do arhõń dayawakoa onkoakʼ apan ạpin ạidạrite ar mitʼke mitʼ hoṛkoakʼ disạmteń ruạṛ ạgukoa.

¹⁶ Mitʼdin onko do ińren hoṛko Bakʼal debota ńutumteko kiriạ ocoletʼkore hõ enhõ jodi ińren hoṛkoakʼ horteko taṛam ar ‘Jiwetʼ Probhu Isor ńutumteko kiriạkʼ, enḍekhan onko do ińren hoṛko talareko benao rakapʼa.

¹⁷ Menkhan jodi jãhãe jạtrenko ona bako onkae enḍekhan onko doń or totʼ giḍikakoa. Iń Probhu Isorge noa katha doń meneda.”