Jihudạwakʼ ciṭhi 1 - সান্তালী বাইবেল

¹ Iń do Jisu Mạsiren golam ar Jakobren boeha Jihudạ kạnạń. Isor Baba okoekoe hoho are dulạṛ akatʼko ar Jisu Mạsi okoekoe rukhiyạ akatʼko onko ṭhen noa ciṭhi doń oletʼkana.

² Isor do daya, suluk ar dulạṛe danape ma.

Eṛe cecetʼko

³ E dulạṛiạ gateko, kại khon sanamko oka bańcao bon ńamakatʼ ona bańcao reaṅ olape lạgitʼ ạḍi gagoj mon tahẽkantińạ. Menkhan enhõ Mạsi dhorom biswạsre, one okaṭakʼ Isor do acʼren hoṛko jaejug lạgitʼe emakatʼko, ona lạgitʼ mon murukte jemonpe lạṛhại ar ona udgạupe lạgitʼge noa ciṭhi olokʼ reakʼ jạruṛiń bujhạukeda.

⁴ Noa do jạruṛgea, ente sedaere okoe hoṛkoakʼ sạjại reaṅ katha sostorre olakan onko do ape talare hape hapeteko bolo akana. Noko hoṛkore Isor bhokti do bạnukʼanaṅ; ar aboren Isorakʼ daya do lucạ lamoṭ menteko ạnḍuṅeda ar okoe aboren mitʼ goṭen mạlik are Probhu kan uni Jisu Mạsi do bako aṅgoc edekana.

⁵ Ape do noako reaṅ bestegepe baḍaegea; enrehõ iń do noako kathań disạ ocoyetʼpe kana je, Misor disạm khon Israelko bańcaokate ạguko tayom okoe bako pạtiạulen Probhu Isor do onkoe ḍahao maraoletʼkoa.

⁶ Ona chaḍa okoe serma goḍetko do akoakʼ ạidạri rukhiyạ baṅkate apnarakʼ jaega bạgikateko calaolen onkoakʼ katha disạipe. Ona maraṅ din reakʼ bicạr lạgitʼ Isor do onko jaejug ńutreye tol doho akatʼkoa.

⁷ Sodom, Gomora ar onakin beṛhaeteakʼ joto nagrahakoren hoṛko hõ ṭhik onko lekageko laṭghaṭetʼ tahẽkana. Okoe jaejug seṅgelre khadlekʼ reakʼ kuṛạiko ńam noko do onkoakʼ nạmunageko hoyakana.

⁸ Enrehõ noko eṛe cecetʼko do onkage bạṛicʼ kukmukote apnarakʼ hoṛmoko bhonḍetʼtakoa, serma goḍetkoakʼ ḍanṭaoko bebataoeda ar onko sarhaokʼkanko upạrte bemanot kathako roṛeda.

⁹ Menkhan mukhiyạ serma goḍet Mikạyel do Moseyakʼ hoṛmo iạte Soetan sãoteye reṭe peṭekʼkan tahẽkanre uni upạrte jãhãn henosta reakʼ katha menkate dusiye do bae dilleda. Bickom uni doe menleda, “Probhu Isor do ame dhomkaome ma.”

¹⁰ Menkhan noko bhonḍ cecetʼko do oka bako bujhạu akatʼ ona reaṅ bạṛicʼ kathako roṛa ar bebuj janwarko leka akote okaṭakʼko bujhạuakatʼ onategeko marao utạrokʼa.

¹¹ Hae onko hoṛ do! Onko do Kạin reakʼ horteko calao akana, ar lab lạgitʼ Biliamakʼ bulạureko khadle akana ar Koraho reakʼ ṭhokteko nosṭoyena.

¹² Noko hoṛ do dilkate apeakʼ helmel bhojkoreko seletʼ emanlen khan ona bhojre mạilạ lekako hoyokʼa. Noko do eken ako reaṅakʼgeko dạndikʼa. Noko do hoete oṭaṅ calakʼkan bin dakʼan rimil leka kanako. Jo tiokʼ jokhecʼ bin joanakʼ dare kante rehetʼ sudhạ pạṭupʼ giḍi akatʼ leka noko do banar secʼ tegeko gocʼgea.

¹³ Noko do birbão talare jalapuri reakʼ ḍheoko leka kanako; ar jalapuri reakʼ photo leka nokoakʼ lajao paṛao kạmiko do capekʼ kana. Noko do ạcur baṛaekan ipil lekanako; jaejug lạgitʼ kaṛaṅ kucạṅ ńutge noko lạgitʼ do jogao dohoakana.

¹⁴ Adam bõsren eaeyicʼ metakʼme Enok hõ noko hoṛko reaṅ nạbiletʼteye menleda, “Ńelepe, Probhu Isor do acʼren hajar hajar sonot goḍetkoante sanamko bicạrko lạgitʼe hijukʼkana,

¹⁵ ar bebhokti hoṛko do bebhokti lekate okako bạṛicʼ kạmiko kạmiakatʼ ar onko bebhokti kạiyan hoṛko Probhu Isor upạrte oka bạṛicʼ kathako roṛakatʼ, onate onko bicạr dusiko lạgitʼ uni doe hijukʼkana.”

¹⁶ Noko hoṛ do jaogeko karacʼ kurujokʼa, ar akoakʼ bhạgko dusiya ar ontor reakʼ bạṛicʼ sana lekako calakʼa. Onko do akoteko sarhaokʼa ar lab joṅ lạgitʼ hoṛko heṛemakoa.

Khạtir tahen reaṅ

¹⁷ Menkhan E dulạṛiạ gateko, okako katha aboren Probhu Jisu Mạsiren apostolko lahareko lạiyakatʼ ona baṛe disạipe.

¹⁸ Onko do noa kathako lạiyape kan tahẽkana, “Okoeko siṛog baṛayetʼ tahẽkan onko do mucạtʼ oktereko hijukʼa ar Isor bebhokti ar bạṛicʼ sanako senakʼa.”

¹⁹ Noko hoṛ do dola duliko hoeocoya ar akoakʼ sana lekako calakʼa. Onkoakʼ ontorre sonot Jiu do bạnugicʼan.

²⁰ Menkhan E dulạṛiạ boehako, ape do apeakʼ sonot utạr biswạsre apete benao rakabokʼpe ar sonot Jiu reakʼ ạyurte koejoṅpe.

²¹ Aboren Probhu Jisu Mạsiyakʼ mãyã do jemon jaejug jion secʼe idipe ona ńel hor lạgitʼge ape do Isorakʼ dulạṛre tahenpe.

²² Ape talare okoekoakʼ pạtiạu nijorgetako onko dayawakope.

²³ Ar adomko do seṅgel khon ạtkir oḍokkate bańcaokope. Jel reakʼ sanate okoeyakʼ jion mạilạ akantako onkoakʼ besapha kicricʼko hõ hirkhạwakʼpe ar apnar sontor akae tahente onko mãyãwakope.

Isorakʼge sarhao hoyokʼtae ma

^24-25 Eken mitʼ goṭen Isor menaea, okoe doe aboren babańcaoicʼ kan uni do apepe tohodokʼ khon bańcaokate niphuṭge acʼakʼ ṭhonok samaṅre rạskạteye hạjir daṛeapea. Sanam jugko reakʼ pạhil khon cetʼ leka tahẽkan onkage ńit hõ ar jaejug hạbicʼ aboren Probhu Jisu Mạsi hotete Isorakʼge ṭhonok, mạhima, daṛe ar ektiạri tahentae ma. Amen.