Jesaea 8 - সান্তালী বাইবেল

Ạsurren rajakʼ hijukʼ reaṅ

¹ Probhu Isor do ińe metadińạ, “Am do mitʼṭecʼ maraṅ okocʼ cạkti dhirire disạmren hoṛkoakʼ tite olakʼ leka niạ katha olme, Maher-Salal-Has-Bas (Mane do ‘Usạra luṭ reakʼ, ạḍi usạrage recʼ reakʼ’).

² Iń do naeke Uriạ ar Jeberekiạren hopon Sakariạ do ińren bises gohayicʼ menkateń bahalea.”

³ Tayomte ińren bạhu, okoe do maejiu nạbiye tahẽkan, uni sãoteń giticʼ mitʼente uni doe bhạrti hoṛmoyena ar mitʼṭen koṛa gidrại janamkedea. Unre Probhu Isor do ińe metadińạ, “Uniyakʼ ńutum do Maher-Salal-Has-Bas em dohoytaea.

⁴ Ar uni gidrạ do ‘Gogo’ se ‘Baba’ roṛ ạuriye cedrege Damesek reakʼ dhon durib ar Samariạ reakʼ luṭakʼ jinisko do Ạsur raj hecʼkateye idijoṅa.”

⁵ Probhu Isor do arhõ ińe metadińa,

⁶ “Noko hoṛ do Siloah reakʼ legem ạtukʼ dakʼko nihạ̃tetʼ kana, onko do Resin ar Remaliạren hopon iạteko rạskạkʼ kana.

⁷ Ona iạte Probhu Isor do Phurạt gaḍa reakʼ ḍubạ dakʼ leka jotowakʼ ṭhonok salakʼ Ạsurren raj do usạrage onko upạrteye ạguiyea. Ona ḍubạ dakʼ do gaḍa ar nala reakʼ jotowakʼe ạtu idiya,

⁸ ar Jihudạ disạm talateye ạtu idiyte uniyakʼ hoṭokʼ hạbicʼe cape rakapʼ ocoya. E Immnuel, Ạsurren raj do oneye lap lapa akatʼtae phạ̃kṛạ̃kʼte amakʼ goṭa disạme umul eseda.

⁹ “E jạtrenko, ape do midokʼpe, menkhan ape dope marao utạrokʼa; E sạṅgiń reakʼ disạmko, ańjompe, ape do lạṛhại lạgitʼ sapṛaokʼpe, menkhan ape dope marao utạrokʼa; hẽ, lạṛhại lạgitʼ sapṛaokʼpe, menkhanpe marao utạrokʼa.

¹⁰ Ape dope goṭaegea, menkhan bape jo bahakʼa; goṭae reakʼ kathape roṛa, menkhan ona do baṅ ṭikạukʼtapea, ente ‘Isor do ale tulucʼ menaea.’ ”

Isor botoraepe

¹¹ Probhu Isor do acʼakʼ daṛeanakʼ ti iń cetanre dohokate iń tulucʼe galmaraokeda. Uni doe sontorkedińa jemon noko hoṛkoakʼ horte aloń taṛam. Uni doe metadińạ,

¹² “Noko hoṛ okaṭakʼ do soṛojontroko metakʼkan ape do onako okaṭakʼ hõ soṛojontro do alope metakʼa. Ar onko okaṭakʼko botorakʼ ape do ona alope botorokʼa; ar botoranakʼ mente hõ ona do alope hudisa.

¹³ Phạdkoren Probhu Isor do sonot mente hudisepe; unige botoraepe; ar unige botoranicʼ mente hudisepe.

¹⁴ Enḍekhan unige mitʼṭecʼ sonot asrayokʼ ṭhạ̃iye hoyokʼtapea, menkhan Israelkoakʼ banar disạm lạgitʼ do mitʼṭecʼ tạkʼkicʼakʼ dhirigeye hoyokʼa jemon hoṛkoko tohodokʼ. Jerusalemren hoṛko lạgitʼ uni do jhampa ar pạsi lekae hoyokʼa.

¹⁵ Onko modre ḍherkogeko tohodokʼa. Onko doko tohotʼ bhindạṛokʼa arko rạputʼ gejerokʼa; ar pạsiteko sabokʼa.”

¹⁶ Am do niạ goha rukhiyại me ar ińren celako talare ona do chapkate dohokakʼme,

¹⁷ Iń do Probhu Isor lạgitʼ koyokʼ hor akaeyiń tahena, okoe do Jakob bõsrenko secʼ khon mẽtʼãhãe ạcur akatʼtae; iń do uni cetanrege bhorsa akaniń tahena.

¹⁸ Nokʼõe ńelpe, iń ar onko hoponko okoe do Probhu Isore emakawạdiń. Uni phạdkoren Probhu Isor, okoe do Sion burureye tahẽnkan ale do uniren cinhạkole hoyakana.

¹⁹ Hoṛko do tinre onko ṭhen calakʼko metapea one okoe do gocʼ hoṛko ar bạṛicʼ jiuko sãote helmelko dohoyetʼ arko biṛ biṛetʼkan, unre ape do cetʼ Isor ṭhen calakʼ lek baṅkantapea? Okoe jiwetʼ menakʼko onkoren hoykate cedakʼ gocʼko sãote sopolha lạgitʼ dope calakʼa?

²⁰ Ape do Isorakʼ hukum ar gohako ṭhen calakʼ hoyokʼtapea. Ar Isorakʼ katha leka onko bako roṛ enḍekhan bujhạu hoyokʼa onko talare marsal do bạnukʼa.

²¹ Onko do reṅgecʼ ar kosṭote disạm talareko ạcur baṛaea. Reṅgecʼ jalate coṭ secʼ beṅgetʼkate raj ar onkoren Isorko sarapaea.

²² Ona tayom onko do ot secʼ beṅgetʼkate eken duk kosṭo ar ńutko ńela. Ar botoranakʼ ńutre onko doko sạṅgiń ocokʼa.