Jesaea 64 - সান্তালী বাইবেল

¹ Serma oṛecʼkate baṛem pheḍ hecʼlen khan! Ar am samaṅre buruko dalmalaolen khan!

² Seṅgel cetʼleka jhurikoe jol ocoyte dakʼe heḍecʼ ocoy onkage am hõ pheḍ hijukʼte amren bạiriko ṭhen sodorokʼme, jemon jạt jạtrenko am samaṅre botorteko thar tharaokʼ.

³ Ar oka bale as akan onkan botorakʼkom kạmiletʼre am dom pheḍ hecʼena ar buruko do am samaṅre daldalaolena.

⁴ Ona sedaeakʼ piṛhi khon am chaḍa ar jãhãe Isorakʼ katha do okoe hõ luturte bale ańjom akada, ar mẽtʼte hõ bale ńel akadea, one uni do acʼ ńeńelko lạgitʼe kạmiyetʼkan.

⁵ Okoe do Isorakʼ sana leka kạmi lạgitʼ rạskạko ńametʼkan ar amko disạyetʼmete amakʼ horteko calakʼkan onko goṛowako lạgitʼ am dom hijukʼ kana; menkhan ale dole kại akada ar ḍher din khon inạ dosarege menakʼlete ale cetanre ạḍim raṅgao akana. Enḍekhan cekate bańcao dole ńama?

⁶ Ale sanamkoge besapha hoṛko lekale hoyakana ar aleakʼ sanam dhorom kạmi do mạilạ kicricʼ leka hoyakantalea. Ale sanamkoge sakam lekale tolmocʼ akana, aleakʼ kại do hoe lekageye oṭaṅ idiyetʼlea.

⁷ Am do okoe hõ bako hohowam kana se nehõram lạgitʼ am ṭhen do okoe hõ bako hijukʼkana, ente ale dom dea giḍiakatʼlea ar aleakʼ ghạṭko iạte jarkharokʼ lạgitʼem aṛakʼ akatʼlea.

⁸ Enre hõ, E Probhu Isor, am do aleren Baba kanam. Ale do hasa kanale, ar am dom kuṅkạl kana; ale sanamkoge amakʼ ti reakʼ kạmiko kanale.

⁹ E Probhu Isor, alom edre sạṅgińokʼa; ar aleakʼ ghạṭko jaejug hạbicʼ alom disạ dohoytalea. Alele nehõram kana, ale secʼ baṛe beṅgedme, ente ale sanamkoge amren hoṛ kanale.

¹⁰ Amakʼ sonot nagrahako do hahaṅkar ṭoṭha hoyakana; Sion reakʼ dosa hõ onkage hoyakana, hẽ, Jerusalem hõ ujạṛ akana.

¹¹ Aleren hapṛamko okare amko sarhaoetʼme tahẽkan aleakʼ ona sonot ar ṭhonokanakʼ koejoṅ oṛakʼ do seṅgelte ḍahao marao akana ar amem kusiyakʼkan tahẽkanakʼko do jarkhar akana.

¹² E Probhu Isor, niạko tayom hõ cetʼ am do duṛupʼ hape akanem tahena? Am do cetʼ hape akan tahente ãṭte sạjạiyem emalea?