Jesaea 63 - সান্তালী বাইবেল

Isorakʼ hala hạli reakʼ din

¹ Edom reakʼ Bosra khon jeṅgetʼ arakʼ kicricʼ horokʼkate uniye hijukʼkạnicʼ, doe okoe kana? Ṭhonokte perecʼ kicricʼ horokʼkate maraṅ daṛe salakʼ daraekạnicʼ, doe okoe kana? “Iń kangeạń uni do, ińge hok reakʼ kathań roṛeda, ińge maraṅ daṛeteń babańcao kana.”

² Darkha lelen kunḍre darkha joe lelenkan hoṛ leka amakʼ kicricʼko do cedakʼ arakʼgetama?

³ “Iń eskarge darkha jo doń lelenkana; jạt jạtrenko mod khon okoe hõ iń soṅgete do bako tahẽkana. Iń do edreteń lebetʼketʼkoa ar raṅgaote jaṅgateń lebetʼ gańjaoketʼkoa; ar onkoakʼ mãyãmge ińakʼ kicricʼre irciyena ar ińakʼ sanam kicricʼko do gabao cabayentińạ.

⁴ Ńitokʼ do chakʼḍao reakʼ okte hecʼakana; ar hala hạli reakʼ oka okteń ṭhik dohoakatʼ ona hõ hecʼ seṭerena.

⁵ Iń doń beṅgetʼkeda, menkhan gokʼṛoko do celege bạń ńamletʼkoa; ar iń doń hahaṛayena, ar okoehõ bako goṛowạdińa. Ona iạte nijakʼ daṛetege babańcao reakʼ iń kạmikeda, ar ińakʼ edre doe khĩs ocokedińa.

⁶ Iń do edrete jạt jạtrenko jaṅgateń en ketʼkoa; ar edrete bul bhuteṛko lekań hoyocoketʼkoa ar otre onkoakʼ mãyãmiń suḍrạu ocokeda.”

Sarhao ar koejoṅ

⁷ Iń do Probhu Isorakʼ dayań lại jạhira ar uniyakʼ sanamakʼ kạmi reakʼ iń sarhaotaea. Acʼakʼ daya ar asambheṛ dulạṛ iạte uni do Israel jạtrenko lạgitʼ ḍher bhạlại reakʼe kạmi akatʼte uni doń sarhaoea.

⁸ Uni doe men akada, “Khạṭige onko do ińren hoṛ kanako, ar nonkan hopon kanako onko do tishõ bako bepạtiạu ocokʼa,” Ar ona iạtege onkoren babańcaoicʼe hoyena.

⁹ Uni do onkoakʼ jotowakʼ dukreye dukena ar uniren goḍet do onkoe bańcaoketʼkoa. Uniyakʼ daya ar dulạṛte uni do onkoe chaḍaoketʼkoa; sedaeakʼ sanam dinkore onko doe tul rakapʼketʼkoa are ghõṛa idiketʼkoa.

¹⁰ Enhõ onko doko hulkeda ar uniren sonot Jiuko duk ocokedea. Ona iạte uni do onkoren bạiriye hoyena ar acʼtetʼge onko upạrte lạṛhạiye ehopʼena.

¹¹ Unre uniren hoṛ do mare din reakʼ katha, metakʼme Mose ar uniren hoṛko okte reakʼ kathako disạkeda. Onkoko menkeda, “Okoe do acʼren hoṛko ar onkoren mukhiyạko jalapuri talateye ạyur ạguletʼko, okoe do onko talare tahen lạgitʼ iạte acʼren sonot Jiue ematʼko tahẽkan uni do okare menaea?

¹² Okoe do Mose goṛowae lạgitʼ acʼakʼ ṭhonokanakʼ daṛeye ematʼko tahẽkan, okoe do acʼakʼ ńutum jaejug hạrjoṅ lạgitʼ onko samaṅre dakʼe bar hạṭiń ocoletʼ,

¹³ okoe do jalapuri talate onkoe ạyur idiletʼko uni do okare menaea? Ar onatege onko do hahaṅkarre taṛametʼkan sadom leka bako tohotʼlena.

¹⁴ Probhu Isorren Jiu do buru nalateko pheḍ hijukʼkan ạsul janwarko lekageye jirạu ocoketʼkoa. Uniyakʼ ṭhonokanakʼ ńutum bạisạutae lạgitʼ uni do acʼren hoṛkoe ạyurletʼkoa.”

¹⁵ E Probhu Isor, serma khon, amakʼ sonot ar ṭhonokanakʼ tahen oṛakʼ khon beṅgetʼkate ńelme. Amakʼ ãṭ ar daṛe kạmiko do okayentama? Amakʼ mạ̃hir ar mãyã do ale ṭhen khonem ocokʼakada.

¹⁶ E Probhu Isor, am do aleren baba kanam. Abraham do bae baḍae akatʼlere hõ se Jakob bae aṅgoclere hõ, enhõ amge aleren baba kanam; am do jaejug hạbicʼ chakʼḍaoicʼ kanam ar noage amakʼ ńutum do.

¹⁷ E Probhu Isor, amakʼ hor bạgikate cedakʼem ạcur baṛa ocoyetʼlea? Ar alo jemonle botoram onate aleakʼ ontor dom keṭecʼetʼtalea. Amren gutiko lạgitʼ, metakʼme okoe bõsko amakʼ ạidạrire menakʼko, onko lạgitʼge ruạṛ hijukʼme baṛe.

¹⁸ Amakʼ sonot ṭhạ̃i do thoṛa din lạgitʼ amren begar akan hoṛkoakʼ tire tahẽkana, menkhan ńitokʼ aleren bạiri do ona sonot ṭhạ̃iko lebetʼ gasmanḍaoetʼ kana.

¹⁹ Okoe cetanre tishõ mạliki bam calao akatʼ, okoe tishõ amakʼ ńutumte bako hoho ocoakan, ńitokʼ ale do onko somanle hoyakana.