Jesaea 61 - সান্তালী বাইবেল

Bańcaokʼ reakʼ bhage sombat

¹ Probhu Isorren Jiu doe decʼ akawạdińa, ente uni do ińe ojokʼ akadińạ jemon reṅgecʼ orecʼko bhage sombatiń danako. Uni doe kol akadińạ rạputʼ monanko bogeko lạgitʼ, bondi akanko ṭhen sạdhinokʼ reakʼ katha lại jạhir lạgitʼ; kạd oṛakʼre tol akanko ṭhen chaḍaokʼ reakʼ katha sodor lạgitʼ;

² Probhu Isorakʼ daya reakʼ bochor ar aboren Isorakʼ hala hạli reakʼ dinko lại pasnao lạgitʼ ar hirdạukʼkanko jiwi raṛecʼtako lạgitʼ;

³ jemon Sionre okoeko hirdạukʼkan onkoakʼ bohokʼre torocʼ bodolte abhraniń emako; hirdạukʼkan bodolte rạskạ reakʼ sunum ar as chuṭạukʼ akan bodolte sarhaoe reakʼ kicricʼ iń em daṛeako. Onko do dhorom reakʼ elon dareko ńumogokʼa; Probhu Isorge ona doe rohoe akada jemon onko hotete acʼakʼ mạhima sodorokʼtae.

⁴ Onko do sedae reakʼ jarkharakʼ ṭhạ̃iko arhõko benao ruạṛa ar ujạṛakʼko arhõko teṅgo ruạṛa. Ar okako nagraha do piṛhike piṛhi dhaṅdhaser akae tahẽkan ona do arhõko benao ruạṛa.

⁵ Eṭakʼ jạtren hoṛko do hecʼkate aperen pal bhiḍikoko gupikoa; ar bidisiạko do apeakʼ anaj khetkoren ar darkha bagwanren mạliko hoyokʼa.

⁶ Ar ape do Probhu Isorren naekepe ńum ocokʼa; ar hoṛko do aboren Isorren sapʼdapʼkoko metapea. Ape do boṅgan hoṛ jạtrenkoakʼ dhonpe jomtakoa ar onkoakʼ dhon iạtepe sabasikʼa.

⁷ Ińren hoṛko do lajao bodolte sompotti reakʼ dobṛa hĩsko ńama, ar bemanot bodolte do dhonteko hulạsokʼa. Onkoakʼ disạmre dobṛa hĩsko ńama ar jaejugko rạskạkʼa.

⁸ Probhu Isore meneda, “Iń do hok reakʼ bicạrgeń kusiyakʼa ar luṭakʼ ar behokakʼ doń kurudakʼ kana. Ińakʼ pạtiạrtetʼre kuṛạiyiń emakoa ar jaejug lạgitʼ mitʼṭecʼ bondobosiń bandhaoa.

⁹ Boṅgan hoṛ jạtrenko talare onkoren bõsko ar hoṛko talare onkoren hoponko doko ńum ńamokʼa. Ar okoe onkoko ńelko onko jotogeko bujhạu daṛeakʼa, onko jạtrenko do Probhu Isore bhor akatʼkoa mente.”

¹⁰ Iń do Probhu Isore ạḍitetʼgeń kusikʼ kana; ińakʼ jiwi do Isorreye hulạsokʼa, ente jãwãe koṛa cetʼleka bohokʼre mạ̃ṛteye abhranokʼ ar bạhu kuṛi cetʼleka acʼakʼ gohnakoteye sajokʼ onkage uni do babańcao reakʼ kicricʼe horokʼ akawạdińa ar dhorom reakʼ oyon aṅgropteye oyo akadińạ.

¹¹ Otre cetʼleka kahleko omon oḍokokʼ ar bagwanre cetʼleka erakʼko hõ janamokʼ onkage Probhu Isor do sanam jạtrenko samaṅre dhorom ar sarhao reakʼ kahleye omon ocoya.