Jesaea 6 - সান্তালী বাইবেল

Jesaea cetanre kạmi reakʼ bhar

¹ Oka bochor Usiạ raje gocʼen un bochor iń doń ńelkeda Probhu Isor do ạḍi usul reakʼ mitʼṭecʼ siṅghạsonreye duṛupʼ akana. Ar uniyakʼ raj kicricʼ reakʼ latar secʼakʼ hĩste mundil doe perecʼ akada.

² Uni cetanre do Seraphimko teṅgo akan tahẽkana; onko mimitʼko do turui goṭecʼkate phạ̃krạ̃kʼ tahẽkantakoa- onko do barea phạ̃kṛạ̃kʼte mẽtʼãha ar barea phạ̃kṛạ̃kʼte do jaṅga dapal akan tahẽkantakoa ar barea phạ̃kṛạ̃kʼte doko uḍạukʼkan tahẽkana.

³ Onko do hohowateko menjoṅ kan tahẽkana, “Phạdkoren Probhu Isor doe sonot, sonot, sonotgea; Goṭa dhạrti do uniyakʼ ṭhonokte perecʼgea.

⁴ Onkoakʼ aṛaṅte mundil reakʼ silpiń do dal dalaoena ar oṛakʼ do dhũạte perecʼena.

⁵ Unre iń doń menkeda, “Hae, iń doń marao utạrena, ente ińakʼ moca do bhõnḍgetińa ar nonkan hoṛko talareń girobasokʼ kana okoekoakʼ moca do bhõnḍgetako. Iń do ińakʼ mẽtʼte raj, phạdkoren Probhu Isoriń ńelkedea.”

⁶ Unre mitʼṭen Seraphimko modren mitʼṭen do acʼakʼ tite mitʼṭecʼ jolokʼkan aṅgra sapʼkate iń ṭhene uḍạu hecʼena; ona aṅgra do pinḍ khon cimṭạteye halaṅleda.

⁷ Ar ona aṅgra do ińakʼ mocare jakʼketʼteye menkeda, “Ńelme, noa do amakʼ luṭikine joṭetʼkeda; amakʼ behokakʼko do sạṅgiń akana ar amakʼ kại do ikạyentama.”

⁸ Ona tayom iń do Probhu Isorakʼ kathań ańjomkeda. Uniye menkeda, “Okoeyiń kolea? Abo secʼ khon okoeye calakʼa?” Ińiń menkeda, “Iń minạńa, ińge koleńme baṛe.”

⁹ Uniye menkeda, “Am do senkate onko hoṛem metakoa, ‘ape dope ańjomgea menkhan bape bujhạua, ńeńel dope ńeńelgea menkhan bape oroma.’ ”

¹⁰ Ona tayom uni do arhõe metadińa, “Noko hoṛkoakʼ ontorem ạuṛiyakʼ ocoytakoa, onkoakʼ luturem ṭosa ocoytakoa, ar onkoakʼ mẽtʼ dom kãṛã ocoytakoa. Ar baṅ khan onko do mẽtʼteko ńeńela, luturteko ańjoma, ar ontorreko bujhạua ar kại khon mon ạcurkateko boge ocokʼa.”

¹¹ Unre iń doń menkeda, “E Probhu Isor, ar tinạkʼ din?” Uni doe roṛ ruạṛạdińa, “Tinạkʼ din nagrahako baṅ marao utạrokʼ, oṛakʼ-duạr baṅ ujạṛokʼ ar khet-baṛgeko baṅ jarkharokʼ;

¹² ar tinạkʼ din Probhu Isor do eṭakʼko bae sạṅgińko ar disạm talare ńir bạgi ṭhạ̃iko ạuri saṅgekʼ hạbicʼ.

¹³ Unre disạm talare gel hạṭiń reakʼ mitʼ hạṭiń hoṛko tahen, enhõ onko doko jalao marao ocokʼa. Menkhan Elon dare makʼ bhindạṛlere cetʼleka ona reakʼ hurutʼtetʼ tahen, onkage hurutʼtetʼ lekate disạmre sonot itạ leka adom hoṛko tahena.”