Jesaea 59 - সান্তালী বাইবেল

Israelakʼ ghạṭ

¹ Ńelpe, Probhu Isorakʼ ti do baṅ khaṭotaea abo bańcao bon lạgitʼ; uniyakʼ lutur hõ baṅ goṛdhotaea aboakʼ ańjomta bon lạgitʼ.

² Menkhan apeakʼ kạige aperen Probhu Isor ṭhen khone begar akatʼpea. Apeakʼ ghạṭ iạtege uni doe dea giḍiakatʼpea; ar onatege bae ańjometʼtapea.

³ Ente apeakʼ tiko do mãyãmte bhõnḍakana ar apeakʼ kạṭupʼ do ghạṭkote perecʼ akana. Apeakʼ moca do eṛe kathae roṛeda ar apeakʼ alaṅ do dusṭạmigeye phuṭạu akada.

⁴ Okoe hõ hok reakʼ do bako mamblakʼ kana, okoe hõ dhorom salakʼ do bako okalotikʼ kana. Onko do ạuṛiyakʼregeko bhorsa joṅkana ar eṛe kathako roṛeda; onko do kukhire dusṭạmiko omon ocoyeda ar bạṛicʼakʼko jamaneda.

⁵ Onko do bisan bińakʼ beleko oboreda ar bindi ganakʼko gakʼeda. Ar ona bele okoeye jom uni doe gujukʼa; ar onako reakʼ mitʼṭecʼ posakʼlen khan ona khon bisan biń doe oḍokʼ hijukʼa.

⁶ Onkoakʼ bindi ganakʼte kicricʼ do baṅ hoyokʼa; ar okako horokʼetʼkan onate apnartetʼ hõ bako aḍ daṛeakʼa. Onko do joto kạmige bạṛicʼgetakoa, onkoakʼ tire do jor julumge menakʼa.

⁷ Onkoakʼ jaṅga do kại secʼge ńir calakʼtakoa; onko do bindusạnkoakʼ mãyãm joro ocoytako lạgitʼko usạrayeda. Onkoakʼ joto hudiskoge bạricʼgetakoa; onkoakʼ horre do jarkhar ar harkhetge menakʼa.

⁸ Onko do suluk reakʼ hor bako baḍaea; onkoakʼ horre do hok reakʼ bicạrge bạnukʼa. Onko do akoakʼ horko konḍea akada; ar ona horte calakʼko do sulukokʼ bako baḍaea.

Kại aṅgoc

⁹ Ona iạte hok reakʼ bicạr do abo ṭhen khon sạṅgińre tahen kana ar dhorom do abo hạbicʼ baṅ seṭerokʼ kana. Abo do marsal bon khojkana, menkhan jotoge ńutgea; ḍig ḍig marsal bon khojkana, menkhan kaṛaṅ kucạṅ ńutre bon dãṛãnkana.

¹⁰ Abo do kãṛãko leka bhit bon ṭạmḍạu baṛayetʼkana; hẽ mẽtʼ bạnukʼtako hoṛ lekage hor bon ṭạmḍạu baṛayeda; abo do tikinge bon tohodokʼ kana; ar jiwetʼko talare gocʼko leka menakʼ bona.

¹¹ Abo sanamkoge bana leka bon hukạueda, ar parwa leka bon bak bạkureda. Abo do dhorom reakʼ bicạr ar bańcaoge bon khojkana, menkhan ona do ḍher sạṅgińre tahenkana.

¹² E Probhu Isor, amakʼ mẽtʼre alaeakʼ behokakʼ do ḍhergetalea; aleakʼ kại do ale upạrte gohae emetʼkana. Aleakʼ bedhoromtetʼ do ale sãorege menakʼa ar aleakʼ ghạṭko reaṅ dole baḍaekangea.

¹³ Onako do hoyokʼkana, aleakʼ hul ar am baṅ aṅgocme, aleren Isor ṭhen khon sạṅgińte calakʼ, sasantao ar luṭ lạgitʼ uskạu ar mon khon eṛe katha phuṭạukate roṛ.

¹⁴ Ona iạte hokʼ reakʼ bicạr do pạc ruạṛ akana ar dhorom do sạṅgińre teṅgo akana; sạriyakʼtetʼ do horreye tohodokʼ kana, ar sojheteakʼ do baṅ bolo daṛeakʼ kana.

¹⁵ Sạriyakʼtetʼ do okare hõ baṅ sendra ńamokʼa, ar okoe bạṛicʼakʼe bạgiyakʼ uni doe santao ocokʼa. Probhu Isor do noakoe ńelkeda ar hok reakʼ bicạr bạnukʼte uni doe edreyena.

Israelakʼ chaḍao

¹⁶ Uni doe ńelkeda are bhaṛoyena, ente hok reakʼ bicạr secʼ teṅgokʼ lạgitʼ do okoe hõ bạnukʼkoa; ar onatege uni do acʼakʼ daṛeanakʼ tite babańcao reakʼe kạmikeda ar uniyakʼ dhoromgeye teṅgo ṭarhaoadea.

¹⁷ Uni do koṛam aḍtae lạgitʼ dhoromgeye horokʼana ar bohokʼre do babańcaoge. Uni do hala hạli reakʼ kicricʼe horokʼkeda ar edre do kicricʼ leka hoṛmoreye oyowana.

¹⁸ Ar hoṛ okako ceka akatʼ onage uni doe ruạṛakoa; ar okoe acʼ secʼrenko baṅkan onko cetanre acʼakʼ edreye dulakoa ar bạṛicʼ kạmi reakʼ sạjạiye emakoa. Uni do sạṅgiń disạmren hoṛkoakʼ kuṛại hõe emkatakoa.

¹⁹ Pạchim secʼren hoṛko do Probhu Isorko botoraea ar purub secʼren hoṛ do uniyakʼ mạhima ńelteko botorokʼa, ente Probhu Isor do acʼakʼ sahẽtʼteye laga ńiretʼkan ḍubạ dakʼ lekae hijukʼa.

²⁰ Probhu Isore meneda, “Jakobren okoeko kại khon monko ạcur akatʼtako onkoren chaḍaoicʼ do Sionreye hijukʼa.

²¹ Onko lạgitʼ ińakʼ bondobos do noage: ińren Jiu okoe do apere menae ar ińakʼ okako katha apeakʼ mocareń emakatʼ ona do ape, aperen hoponko ar onkoren hoponkoakʼ moca khon baṅ adokʼa; ona do ńit khon jaejug hạbicʼ tahẽ akae tahena. Iń Probhu Isorge noa katha doń meneda.”