Jesaea 58 - সান্তালী বাইবেল

Sạriyakʼ reakʼ upạs

¹ Probhu Isore meneda, “Kajakte hohoeme, amakʼ goṭa daṛete hohoeme; sakwa saḍe leka ãṭ aṛaṅte hohoeme. Ińren hoṛko ṭhen onkoakʼ bedhorom reakʼ katha ar Jakobren bõsko ṭhen onkoakʼ ghạṭ akatʼ reakʼ katha baḍae ocokom.

² Onko do dinke din ińko ńam baṛańkana ar ińakʼ hor bakʼḍae lạgitʼko rạskạkʼ kana; onko do nonkan jạtren kanako okoe do dhoromko kạmikante Isorakʼ ạn bako bạgiyakʼkan; onko do iń ṭhen dhorom bikʼcạrko khojkana jemon Isor ṭhen hijukʼ lạgitʼko rạskạkʼ.

³ Onkoko meneda, ‘upạs akadale ar bam ńelletʼlea? Kosṭokʼ kanale ar bam moneyakʼlea? Menkhan ńelpe, apeakʼ upạs reakʼ dinre apeakʼ hạ̃sgepe ńam bakʼṛakana, ar aperen kạmiyạko cetanrepe julumeda.

⁴ Ńelpe jhogṛa ar reṭepeṭe lạgitʼgepe upạseda arpe kuhạukʼ kana. Nonkan upạs do apeakʼ aṛaṅ coṭte bae ańjom ocoytapea.

⁵ Iń do cetʼ nonkanakʼ upạs iń khojkana? Apeakʼ upạs do eken apnartetʼ kosṭokʼ; ar pạṭiol leka bohokʼ kuḍbur akatʼ, ar gõṛẽ kicricʼ ar torocʼre giticʼ akan leka kana. Ape do cetʼ noage upạs ar Probhu Isore bạsutakʼ dinpe metakʼkana?

⁶ “Iń do nonkan upạsgeń khojkana; ape do apeakʼ bedhorom reakʼ sikṛi ar arãṛ reakʼ baber raṛaetape, jorjulumko chaḍaokope ar mitʼke mitʼ arãṛ rạputʼ giḍikakʼpe,

⁷ reṅgecʼ hoṛko apeakʼ jomakʼ khon hạṭińakope, ar asray bạnukʼtako hoṛko apeakʼ oṛakʼre asray emakope, jãhãe uluṅpe ńellekore kiricʼ horokʼakope, ar aperen peṛa pạrbhạko alope dea giḍikoa. Niạkope kạmi lekhan apeakʼ do sạriyakʼ reakʼ upạs hoyokʼtapea.

⁸ Enḍekhan apeakʼ marsal do aṅga marsalokʼ leka jhak jhakokʼa ar usạratepe bogekʼa; apeakʼ dhorom do ape laha lahate calakʼa ar ińakʼ ṭhonok do ape tayomte rurukhiyạwakʼge hoyokʼa.

⁹ Ar unre iń ṭhenpe koe lekhan iń doń ańjomtapea; ar goṛo ńam lạgitʼpe hohoạń khan doń mena, ‘nonḍege minạńa.’ “Ape ṭhen khon julumakʼ arãṛ, kạṭupʼte udukʼakʼ ar hiskạte perecʼ kathape bạgiyakʼ khan,

¹⁰ ar reṅgecʼ hoṛpe mãyãwako ar jomakʼpe emako, enḍekhan ńutrehõ apeakʼ marsal do jolokʼtapea ar ńindạ do tikin okte leka hoyokʼa.

¹¹ Iń Probhuge Isorge sanam ghạṛicʼ iń ạyurpea; ar khaṅgoṭ jaegakoreń tirpit ocopea ar hoṛmore daṛeń danapea. Ape do dakʼ ńametʼkan bagwan lekape hoyokʼa ar nonkan dakʼ jharnakope hoyokʼa ona do baṅge ańjedokʼa.

¹² Aperen hoṛko do sedae reakʼ jarkharakʼko cetanre arhõko benao rakaba ar lahateakʼ rehetʼ cetanre arhõko gathao ruạṛa; ar ape do dhasao bhit ar bosotokʼ lạgitʼ kulhi jujutkope ńum ocokʼa.

¹³ “Jirạukʼ mãhãpe manao ar ińakʼ sonot dinre apnar tirpitokʼ lạgitʼ bape kạmi; menkhan jirạukʼ mãhã do hạ̃sakʼ ar Probhu Isorakʼ din do manotanakʼ mentepe bujhạu, ar apnar kusileka sen baṅkate ona dinpe sonot ar apeakʼ kusileka bape kạmi se bạṛicʼ kathako bape roṛ,

¹⁴ enḍekhan ape do ińregepe rạskạjoṅa ar dhạrti reakʼ sanam usulako cetanre ạidạriń emapea. Ona chaḍa aperen baba Jakobakʼ ạidạri hõń emapea. Iń Probhu Isorge niạ katha doń meneda.”