Jesaea 51 - সান্তালী বাইবেল

Sion reakʼ bańcaokʼ

¹ Probhu Isore meneda, “Ape okoe do dhorompe khudạuetʼkan ar ińakʼ sana leka calakʼpe kurumuṭukan, ape do ińakʼ katha ańjompe. Okaṭakʼ dhiri khonpe makʼ totʼ akan ar oka khạn khonpe la totʼ ocoakan ona baṛe beṅgetʼakʼpe.

² Aperen baba Abraham beṅgetʼaepe ar ape okoeye janam akatʼpe uni Sara hõ beṅgetʼaepe. Iń tinreń hohowade tahẽkana unre uni do mitʼ hoṛgeye tahẽkana, ar uniń bhoradete lekhare aema hoṛiń hoy ocoketʼkoa.

³ Sion do khạṭige jiwi raṛecʼ iń emaea ar uniyakʼ sanam jarkharakʼko cetanreń mãyãkʼa; Ona reakʼ hahaṅkar do Eden bagwan lekań hoeocoya ar khaṅgoṭ ot do Probhu Isorakʼ bagwan leka. Onare do hulạs, rạskạ, sarhao ar sereń reakʼ aṛaṅkoge ńamokʼa.

⁴ “E ińren hoṛko, ińakʼ katha ańjompe, ińakʼ kathako luturakʼpe. Iń khonge hukum do oḍokokʼa; ar ińge dhorom reakʼ bicạriń ṭarhao ocoya jemon jạt jạtrenko hõ marsalko ńam.

⁵ Ińakʼ dhorom do hecʼ sorakana ar ińakʼ babańcao reakʼ kạmi hõ ehopʼakana. Ińge jạt jạtrenko cetanre dhoromiń bicạra. Ar sạṅgiń disạmren hoṛko do iń secʼ beṅgetʼ akaeko tahena ar ińakʼ daṛeanakʼ sopo ńel hor akaeko tahena.

⁶ Serma secʼ beṅgetʼ rakabpe ar ot secʼ beṅgetʼ pheḍpe. Serma do dhũạ leka oṭaṅokʼa, ar ot do kicricʼ leka marekʼa ar onare girobasokʼ kan hoṛ doko gujukʼa. Menkhan ińakʼ babańcao do jaejug hạbicʼ tahẽakan tahena ar ińakʼ dhorom do tishõ baṅ mạutạkʼa.

⁷ “Ińakʼ ańjomtińpe E ape dhorom bakʼḍaeko one okoeyakʼ monre ińakʼ ạnko menakʼ. Ape do manwakoakʼ henosta kathate alope botorokʼa ar onkoakʼ nindạu kathate hõ alope torasokʼa,

⁸ ente onko do kicricʼ leka jạrnḍi ṭhenko jom ocokʼa ar tejoko ṭhen do bhiḍikoakʼ upʼ lekako jom ocokʼa. Menkhan ińakʼ dhorom do jaejug hạbicʼ tahenkana; ar ińakʼ babańcao do piṛhike piṛhige.”

⁹ E Probhu Isorakʼ daṛeanakʼ ti, ma ebhenokʼme, beredokʼme ar amakʼ daṛe baṛe sodortam. Cetʼleka sedae khonem tahẽkan, cetʼleka piṛhike piṛhim beretʼlen onkage baṛe beredokʼme. Amge cetʼ Rahab do bam chaka chunledea? Silodam danob do cetʼ amge bam sobokʼ tapʼledea?

¹⁰ Amge cetʼ khạndri jalapuri reakʼ dakʼ do bam ańjetʼ ocoleda? Amge cetʼ jalapuri bhitrite hor do bam tearleda one amren chaḍao akan hoṛko taṛam paromlen?

¹¹ Probhu Isorren rukhiyạ akan hoṛ doko ruạṛ hijukʼa ar sereń sereńte Sionteko rakapʼa. Ar jaejugakʼ rạskạge onkoakʼ bohokʼ reakʼ mukuṭ do hoyokʼtakoa. Onko do ạḍiko hulạsokʼa ar duk ar kũhrạu do onko khon ńir pharakokʼa.

¹² Probhu Isore meneda, “Iń kangeạń apeakʼ jiwi rakʼṛecʼicʼ do. Manwa do cedakʼpe botorako kana? Onko doko gujukʼgea. Manwa hopon do ghãs baragge thoṛa okteko tahena.

¹³ Ar ape okoeye sirjạu akatʼpe uni do cedakʼpe hiṛińkedea? Uni do sermae pasnao akada ar dhạrti reakʼ rehetʼe bạisạu akada. Cikʼpạyicʼakʼ kurkurạukʼ edrete cedakʼ ape do siń sạṭupʼpe torasokʼ kana? Uni cikʼpạyicʼakʼ edre do botoranakʼ cetʼ hõ baṅkana.

¹⁴ Bondi akanko do usạrageko aṛakʼ ocokʼa. Onko do kạd oṛakʼ reakʼ khạndṛuṅre bako gujukʼa, ar jomakʼte hõ bako ṭonṭakʼa.

¹⁵ Ińge Probhu, aperen Isor do. One jalapuriń leoḍalere ona do ḍheokote hud hudạukʼkan. Ińakʼ ńutum do phạdkoren Probhuge.

¹⁶ Ińakʼ kathako do apeakʼ mocareń emakada ar ińakʼ ti reakʼ umulreń danaṅ akatʼpea. Serma do acʼakʼ jaegareń dohoakada ar dhạrti do rehetʼ iń bạisạu akada. Ar Sion doń men akawadea, ‘am dom ińren hoṛ kana.’ ”

Probhu Isorakʼ edreteakʼ bạṭi

¹⁷ E Jerusalem, ebhenokʼme, beredokʼme; ar teṅgonme. Ente am do Probhu Isorakʼ ti khon uniyakʼ edreteakʼ bạṭi khonem ńũ akada; okaṭakʼ bạṭi khon manwa do ńũkateko konḍe manḍekʼ ona bạṭi reakʼ do amgem ńũ ańjetʼakada.

¹⁸ Ar okoeko hoponem janam akatʼko onko modre hor udukʼako leka do celege bạnukʼkoa; ar okoe hoponkom ạsul hara akatʼko onko modre ti sapʼkate tiyạkʼme leka hõ celege bạnukʼkoa.

¹⁹ Jarkhar ar dhaṅdhaser, akal ar tarwaṛe noakin banar muhinge amre paṛao akana. Jiwi raṛecʼ do okoeye emdaṛekema? Ar cekate iń hõ jiwi raṛecʼ iń emama?

²⁰ Amren hoponko doko jhin jhinạu akana; onko do kulhi mucạtʼre jhạlire sapʼakan jhaṅkaṛ jel lekako giticʼ akana. Onko cetanre Probhu Isorakʼ edre, amren Isorakʼ sạjại onkore paṛao akana.

²¹ Onate E am nacaricʼ, niạ katha ańjomme. Am dom bul ocoakana, menkhan darkha rasate do baṅa.

²² Amren Probhu, amren Isor, okoe do acʼren hoṛko secʼ menae uni do noa kathae meneda, “Ńelme, am oka bạṭi reakʼ ńũkatem konḍe manḍekʼ kan tahẽkan ona do amakʼ ti khoniń hatao akada; ińakʼ edre reakʼ ona bạṭi khon do ar tishõ bam ńũiya.

²³ Ona bạṭi do amren cikʼpạkankoakʼ tireń jimạya, ar okoe amko metam kan, ‘ma ombagokʼme, jemon am cetanteń taṛam parom daṛeakʼ.’ Am cetante taṛam paromokʼ lạgitʼ amakʼ dea do ot ar kulhi lekam hoyocoakada.”