Jesaea 5 - সান্তালী বাইবেল

Darkha bagwan reakʼ sereń

¹ Ińiń dulạṛede kan lạgitʼ do mitʼṭecʼ sereńiń sereńa, uniyakʼ darkha bagwan reaṅakʼgeń sereńa. Burure mitʼṭecʼ bhage hasawan jaegare ińren dulạṛiạwakʼ mitʼṭecʼ darkha bagwan tahẽkana.

² Uni do beṛhaeteye la ạcurkeda ar ona reakʼ dhirikoe ocokʼ giḍikada ar onare joto khon bhageakʼ darkha nạ̃ṛĩye rohoekeda. Uni do ona talare usulge pahra oṛakʼe benaokeda ar darkha lelen kunḍ hõ onareye kholaokeda. Ona tayom do bhage darkha jo lạgitʼe koyokʼ horkeda, menkhan onare do jojo darkha jo joyena.

³ “E Jerusalem ar Jihudạren hoṛko, ńitokʼ do apege lạipe, noa do cetʼ ińakʼ, se ińakʼ darkha bagwan reakʼ doskana?

⁴ Ińakʼ darkha bagwan lạgitʼ okań ceka akatʼ ona khon bạ̃ṛti do ar cetʼ cekae hoykokʼtińa? Tinre iń do bhage darkha lạgitʼ iń koyokʼ horkeda unre cedakʼ onare jojo darkha jo do joyena?

⁵ Ińakʼ darkha bagwan cetanre okań cekae ona do ńitokʼ iń lạiyapea: iń do ona reakʼ eṭetʼakʼ iń ocoga onate bagwan doko jom ṭhuṭkuya; ar ona reakʼ pạcriń rạputʼ giḍikakʼa onate ona doko lebetʼ gańjaoa.

⁶ Iń do mitʼṭecʼ dhaṅ dhaser jaegageń hoeocoya; nạ̃ṛĩ hõ baṅ kamanokʼa ar jumi hõ baṅ casokʼa, onḍe do rạṅgạini ar aṭkuṭige hara perejokʼa. Rimil hõń hukumakʼa onare jemon dakʼ aloe jạṛiyakʼ.”

⁷ Phạdkoren Probhu Isorakʼ darkha bagwan do Israel bõsren hoṛkoge; ar Jihudạren hoṛko do rạskạwanakʼ darkha nạ̃ṛĩge. Uni do hok bicạr reakʼe ńam baṛakeda menkhan mãyãme ńelkeda; uni do dhorom reakʼe ńam baṛakeda menkhan duk reakʼ rakʼe ańjomkeda.

Hoṛkoakʼ kosṭo ar bicạr

⁸ Hae ape do, one okoe do oṛakʼ sãote oṛakʼ ar khet sãote khetpe toṅge idiyetʼkan; sesre eṭakʼko lạgitʼ jãhãn ṭhạ̃ige baṅ tahena, ar ape eskarge disạmrepe girobasokʼa.

⁹ Ińakʼ luturte phạdkoren Probhu Isorakʼ niạ kathań ańjomakada, “Sạrige maraṅ maraṅ oṛakʼko do marao utạrokʼa, ar napae napae dolanre do celege bako tahena.

¹⁰ Pegel bighạ darkha bagwan khon eken bargel bar liṭar darkha rasa ńamokʼa, ar mitʼsae irạgel keji itạ khon eken gel irạl keji phosolge janamokʼa.”

¹¹ Hae, onko hoṛ do, okoe do bubulakʼ ńũi lạgitʼ setakʼreko beredokʼkan ar ḍher ńindạ hạbicʼ duṛupʼkate darkha rasako hoṅgorkan, one ạuriko ńũ bhuteṛokʼ hạbicʼ.

¹² Onkoakʼ bhojre do peṛesaṅ ar binạ banam, kortal, tiriyạ ar darkha rasa tahenkana; menkhan Probhu Isorakʼ kạmi reakʼ do cetʼge bako moneyakʼ kana, ar uniyakʼ ti teakʼ kạmi reakʼ hõ bako ńeletʼkana.

¹³ Onate buj bạnukʼtako iạte ińren hoṛko do eṭakʼ disạmre bondi akanko tahena. Onkoren manotan hoṛ do reṅgecʼteko gujukʼa, ar onkoren eṭakʼko hoṛ do tetaṅteko chaṭ chaṭaokʼa.

¹⁴ Ona iạte patal puri do acʼakʼ nạnḍriye osar akatʼtaea, ar moca do maraṅ okocʼe cahapʼ akada. Ar manotanko ar disạm hoṛko, jhogṛakʼko, gulmaletʼ hoṛko jotoge onḍeko ńurokʼa.

¹⁵ Maraṅ ar huḍiń jotogeko tumbudokʼa, ar phulạukʼ kan mẽtʼ hõ copotʼ ocokʼa.

¹⁶ Menkhan phạdkoren Probhu Isor do dhorom reakʼe bicạra are usulokʼa; sonoticʼ Isor do acʼakʼ dhorom iạte sonot menteye sodorokʼa.

¹⁷ Unre bhiḍiko do akoakʼ khetre cetʼlekako ạtiń onkage kisạ̃ṛkoakʼ sanam dhaṅdhaser jaegakoreko ạtiń baṛaea, ar porjạtrenko do ona dhaṅdhaserakʼ jaegako hameṭjoṅa.

¹⁸ Hae, onko hoṛ do, one okoe do eṛeteakʼ baberte behok reakʼko or idiyetʼ ar kại do sagaṛ reakʼ baberte.

¹⁹ Onkoko mena, “Isor doe usạrae ma; uni do acʼakʼ kạmi usạrateye kạmima jemon onale ńel. Israelren uni sonoticʼakʼ goṭawakʼ baṛeye purạukʼtae jemon onale baḍae daṛeakʼa.”

²⁰ Hae, onko hoṛ do, one okoe bạṛicʼakʼ do mońjko metakʼkan ar mońjakʼ do bạṛicʼko metakʼkan, marsal do ńutko metakʼkan ar ńut do marsal menteko hudisetʼkan, ar okoe heṛemakʼ do haṛhatʼko metakʼkan ar haṛhatʼ do heṛemakʼ menteko hudisetʼkan.

²¹ Hae, onko hoṛ do, okoe apnarakʼ mẽtʼre ạkilan ar budan kanako menteko hudisokʼkan.

²² Hae, onko hoṛ do, okoe doe darkha rasa hoṅgorkoren guru ar bubulakʼ mesalakʼ kạmireko gạkhuṛge,

²³ okoe do ghus jomkate dusiyicʼko aṛakʼede ar bin dusiyicʼ do hok reakʼ bako bicạretʼtae.

²⁴ Onatege seṅgel reakʼ alaṅ do cetʼleka busupʼe loyetʼ ar seṅgel reakʼ lepʼre rohoṛ ghãsko jarkharokʼkan, onkage onkoakʼ benaoakʼ do seakʼtakoa ar dhuṛi lekage onkoakʼ baha do oṭaṅokʼtakoa; ente onko do phạdkoren Probhu Isorakʼ hukumko bebatao akada ar Israelren uni sonoticʼakʼ kathako lebetʼ gańjao akada.

²⁵ Ona iạte Probhu Isorakʼ edre do uniren hoṛko upạrte jolokʼkana; uni do ti tulkateye hạnetʼkoa. Buru-boṭkocʼko do daldalaoena ar mạ̃ṛĩko do horkore mạilạ leka ńur tahẽyena. Niạko tayom hõ uniyakʼ edre do baṅ thirlena, uni do ti tulgeye dohoakatʼtaea.

²⁶ Uni do sạṅgiń jạtrenko lạgitʼ mitʼṭecʼ nisạne rakabtaea ar dhạrti reakʼ ses simạnaren hoṛkoe hohoakoa. Ar ńelpe, onko do usạrateko ńir hijukʼa.

²⁷ Onko do okoehõ bako laṅgakʼa, ar bako tohodokʼa; okoehõ bako dudṛuma; onkoakʼ ḍanḍa totolakʼ do baṅ raṛakʼtakoa, panahe reakʼ phitạ hõ baṅ topagokʼtakoa;

²⁸ Onkoakʼ sar do dhargetakoa, onkoakʼ akʼ do ṭuniạuge menakʼtakoa; onkoren sadomkoakʼ khurạ do cok muki dhiri leka jhalkaokʼ kana, ar onkoakʼ rãt gạḍiko reakʼ pạ̃ihạ̃ko do hoe bharḍo leka.

²⁹ Kul eṅga lekage onkoakʼ hạnḍrạukʼ do; onko do dhạcri kul lekako hạnḍrạukʼa ar guńjrạukʼ kanako akoren sikạrko lạgitʼ. Onko doko ger ạtkirkoa; ar celege bako rukhiyạ daṛelekoa.

³⁰ Enhilokʼ onko do doreão reakʼ hud hud saḍe leka Probhu Isorren hoṛko cetanreko gondraokʼa. Jãhãege unre disạm secʼe beṅged enḍekhan uni do ńut ar kosṭogeye ńela; ar marsal hõ rimilte danaṅokʼte ńutokʼa.