Jesaea 47 - সান্তালী বাইবেল

Babel reakʼ ńurokʼ

¹ Probhu Isore meneda, “E kũạri kuṛi Babel, am do dhuṛire duṛupʼme; E Babel am do siṅghạson bạgikate otre duṛupʼme. Ente Kakosiạ ar sukmạr do ar bako metama.

² Jante sabme ar holoṅ ridme ar ṭuṭuri ocogtam. Amakʼ kiricʼ do bulu hạbicʼ rakabtam ar gaḍako taṛam paromme.

³ Amakʼ uluṅ do oṭagokʼa ar lajao do ńel ńamokʼtama. Iń doń hala hạlia, okoeyakʼ nehõr hõ bạń ańjoma.”

⁴ Aboren babańcaoicʼ do Israelren uni sonoticʼ kanae; uniyakʼ ńutum do phạdkoren Probhuge.

⁵ Probhu Isore meneda, “E Babel, am do duṛupʼ thirkokʼme; ar ńutre bolokʼme. Ente rajosṭikoren rạni do ar bam hoho ocokʼa.

⁶ Ińren hoṛko cetanre ińakʼ edre do caṛhaolentińạ ar ińakʼ sompotti doń bhõnḍ ocoleda. Onko do amakʼ tireń soprotletʼkoa ar am do onko cetanre bam mãyãlena. Ar haṛam hoṛko hõ hamal bojham ladeyatʼko tahẽkana.

⁷ Amem menleda, ‘iń do jaejug hạbicʼ rạniń tahena.’ Menkhan niạko reaṅ am do hudis hõ bam hudisleda, se mucạtʼ jo cetʼ hoyokʼtama mente ona hõ bam hudisleda.

⁸ “Ńitokʼ ańjomme, E suk bhog dulạṛetʼkạnicʼ; am do nirdạndi duṛupʼkate mone monetem meneda, ‘eken ińge minạńa, iń chaḍa do celege bạnukʼkoa. Iń do tishõ bạń rạnḍikʼa se gidrạ atʼko reakʼ dukte bạń dukokʼa.’

⁹ Menkhan gidrạko adokʼ se amem rạnḍikʼ noa banarge mitʼ dinte mitʼ ripitʼre amre hecʼ paṛaokʼa. Unre amakʼ mantarko ar guniko ḍhergetamre hõ onakin do purạtege amre paṛaokʼa.

¹⁰ Am do amakʼ ona dusṭami cetanrem bhorsakʼkana arem meneda, ‘celehõ bako ńeńel kana.’ Amakʼ ạkil ar bidiạge am dokin bhaṅgṭao akatʼmea; ente mone monetem meneda, ‘eken iń eskarge minạńa, iń chaḍa ar okoehõ bạnukʼkoa.’

¹¹ Menkhan am do durdosarem paṛaokʼa, ar mantar hotete hõ ona do bam kaṭao daṛeakʼa. Unre muhinrem paṛaokʼa, ar bam ṭarhao daṛeakʼa. Ar okaṭakʼ sorbonas babotre laha khon bam baḍaekan tahẽkan ona do ackage amre hecʼ paṛaokʼa.

¹² “Am do kuṛi jokhecʼ khon okaṭakʼ mantar ar guni lạgitʼem kurumuṭu ạguakatʼ ona kạmime. Hoedaṛeakʼa ona do ame jo baha ocomea, ar botorem janam ocoketʼge.

¹³ Am okaṭakʼ solham ńamakatʼ ona do ame laṅga ocoakatʼmea. Amren gukʼniko do samaṅ secʼko hijukʼma; ipilko ńelte okoe do cando candoko nạbiyetʼ onko do amre oka paṛao lạgidokʼkan ona khonko rukhiyạmema.

¹⁴ Onko do bhusạ lekan kanako; cetʼ leka seṅgel do onkoe ḍahaoko. Onko do seṅgel lepʼ khon apnarte bako rukhiyạ daṛeakʼa. Niạ seṅgel lepʼ do aṅgra seṅgel do baṅ kana one duṛupʼkateko jorokʼ daṛeakʼ se marsalko ńam daṛeakʼ.

¹⁵ Okoeko soṅgetem kurumuṭuletʼ ar juạn jokhecʼ okoeko tulucʼem karbarletʼ onko do onkageko hoyokʼa. Onko mimitʼko do apan ạpin horteko mohnḍa akana; am bańcaome lạgitʼ mitʼ hoṛ hõ bạnukʼkoa.”