Jesaea 44 - সান্তালী বাইবেল

Bachao akan Israelko

¹ Probhu Isore meneda, “Ańjomtińme E ińren guti Jakob, ar amiń bachao akatʼme Israel.

² Probhu Isor, okoe do ame sirjạu akatʼme, okoe do eṅgamakʼ kukhireye gaṛhaoletʼme ar one uniye goṛowam, uni do niạ kathae meneda, ‘E ińren golam Jakob, ar ińiń bachao akawan Jisurun, am do alom botorokʼa;

³ ente tetaṅokʼkan disạmre dakʼ iń dula. Ar amren hoponko cetanre ińren Jiu iń dulea ar amakʼ bõsren hoṛkoń bhorakoa.

⁴ Onko do dakʼ tala reakʼ ghãs lekako sahre rakapʼa, dakʼ nalako aṛere bạisi dareko lekage.

⁵ Mitʼṭen doe mena, uni doe Probhu Isor kana; ar dosaricʼ do Jokob ńutumteye ńumogokʼa, ar eṭagicʼ do acʼakʼ tireye ola, uni doe Probhu Isorren kana, ar Israelakʼ ńutumteye pạrisokʼa.’ ”

Probhu kangeae Isor do

⁶ Probhu Isor, okoe do Israelren raj are babańcaoicʼ kan, okoe doe phạdkoren Probhu Isor kan, uni do niạ kathae meneda, “Ińge pạhilicʼ ar Ińge sesicʼ; iń chaḍa ar cele Isorge bạnukʼkoa.

⁷ Iń leka do okoe menakʼkoa? Uni do onae lại jạhirma. Uni doe lại jạhirma are lạiyạńma, sedae reakʼ darakanakʼko do okoeye lại sodorakada; ar cetʼko darakana ona baṛeye lạima.

⁸ Alope botorokʼa ar alope thar tharaokʼa. Iń do cetʼ ḍher laha khonge niạko bạń lại jạhir akawatʼpea? Apege ińren goha do; iń chaḍa cetʼ ar jãhãe Isor menakʼkoa? Baṅa, ar jãhãn asray buru do bạnukʼa; iń do ar celege bạń baḍae akatʼkoa.”

⁹ Okoe goṛhon muṭhạnko benao onko doko ạuṛiyakʼgea; onkoren damanakʼ jinisko do porhoanakʼ doko baṅkana. Onko muṭhạnko secʼ okoe kathako roṛ onko doko kãṛãgea, cetʼge bako baḍaea; ona iạte onko do lajaoreko paṛaokʼa.

¹⁰ Nonkanicʼ okoe menaea one goṛhon muṭhạne dul ar ona iạte porho bae asokʼkan?

¹¹ Goṛhon muṭhạnre okoe jamaṛ akan menakʼko onko doko lajao ocokʼa; onkoren kạrigolko do manwa chaḍa ar cele hõko baṅkana. Onko sanamkoge mitʼ sãoteko teṅgokʼma; onko doko torasokʼa ar mitʼdomteko lajao ocokʼa.

¹² Kamar do mitʼṭecʼ ṭeṅgocʼe benaoeda ar koela seṅgelreye dhipạueda. Uni do hạtuṛte muṭhạne emakʼkana, ar ti reakʼ daṛete onae benaoeda. Onate uni do reṅgejea ar daṛe komaokʼtaea; ar dakʼ begor ńũteye jhin jhinạukʼa.

¹³ Chutạr mistri do sutạme ticʼeda ar pensilteye ãk ạcureda; ar hoṛ muṭhạn leka onae muṭhạneda. Onate uni do mitʼṭecʼ mońj manwa rupe hoeocoyeda jemon ona do oṛakʼre dohokʼ.

¹⁴ Okoe do debdạru dareye makʼeda, ar okoe do tirsạ dare se mitʼṭecʼ elon dareye bachao joṅkana. Uni do bir reakʼ dare sãote onae hara ocowakʼkana, ar baṅkhan debdạru dareye rohoe joṅkana ar serma dakʼ do onae hara ocoyeda.

¹⁵ Tayomte ona do manwako lạgitʼ sahan hoyokʼkana. Uni do thoṛa hataokateye jorokʼ kana, arhõ onate piṭhạ hõe rapakʼeda, arhõ mitʼṭen deb benaokateye sewawakʼ kana, arhõ goṛhon muṭhạne benaoeda ar ona samaṅreye ombagokʼ kana.

¹⁶ Ona reakʼ adhate do seṅgele joleda, ona tayom onare acʼakʼ jomakʼe teareda ar jele rapakʼeda ar lacʼ bikʼe jomeda; arhõe jorokʼ orgumteye mena, “Ah! Jorokʼ orguminạń, ar seṅgel reakʼ loloń aṭkarana.”

¹⁷ Ar sarecʼ hĩste do mitʼṭen debota, metakʼme mitʼṭen goṛhon muṭhạn benaokate otre ombakʼkateye ḍobokʼakʼa are sewawakʼa. Ar uni ṭhen koekateye mena, “Bańcaoińme; am kangeam ińren debota do.”

¹⁸ Onko hoṛko do cetʼge bako baḍaea, ar bujhạu hõ bako bujhạua. Arko kãṛãgete bako ńeńela ar monhõ bondgetakote bujhạu hõ bako bujhạu daṛeakʼa.

¹⁹ Okoe hõ bae hudisokʼkana; ar okoeyakʼ hõ bud ar ạkil baṅ do bạnukʼte oneye men, “Iń do niạ reakʼ mitʼ hĩste seṅgel iń jol akada, ar ona reakʼ koela seṅgelte piṭhạń rapakʼ akada ar jel hõń rapakʼkeda ariń jom biyena. Enḍekhan niạ reakʼ sarecʼ hĩste do cetʼ hirkhạwanakʼ jinisiń benaoa? Kaṭ munḍhạtʼ samaṅre cetʼ iń doń ombagokʼa?”

²⁰ Uni do torocʼ jom lekae kạmiya ar uniyakʼ bạulạha akan mon do bạṛicʼ horteye idiyea. Apnarte uni do bae rukhiyạ daṛeakʼa se bae mena, “Ińakʼ jojomti reakʼ niạ jinis do cetʼ eṛeakʼ baṅkana?”

²¹ “E Jakob, E Israel, niạko disạ dohoyme, ente am do ińren guti kanam. Iń do amiń sirjạu akatʼmea, amge ińren golam do; E Israel bạń hiṛiń giḍimea.

²² Amakʼ ghạṭko do rimil lekań oṭaṅ giḍikakʼa ar amakʼ sanam kạiko do setakʼ reakʼ kuṛhạ lekań sạṅgiń akada. Iń ṭhen ruạṛ hijukʼme, ente ińge am doń chaḍao akatʼmea.”

²³ E serma, hulạsokʼme, ente Probhu Isorge noae nonka akada. E dhạrti reakʼ khạndriyakʼko, hulạsokʼpe. E bir buru ar onḍenakʼ dareko, ape do rạskạte andoṛpe, ente Probhu Isor do Jakobe chaḍao akadea ar Israel hotete acʼakʼ ṭhonoke sodortaea.

Kores lạgitʼ Probhu Isorakʼ goṭawakʼ

²⁴ Amren Probhu Isor, okoe doe amren chakʼḍaoicʼ kan, ar okoe do kukhireye gaṛhaoletʼme uniye meneda, “Iń kangeạń Probhu Isor do; ińge jotowakʼ iń sirjạuakada. Iń do sermań aṭetʼ akada ar ińge prithimiń pasnao akada.

²⁵ Bhonḍ nạbikoakʼ cinhạ doń ạuṛiyakʼ ocoytakoa ar ńeńelko do lelha lekań hoyocokoa. Iń do ạkilankoakʼ ạkiliń ạuṛiyakʼ ocoytakoa ar onkoakʼ bidiyạ doń bebuj ocoya.

²⁶ Menkhan iń do ińren gutikoakʼ kathań jo baha ocoya ar ińren goḍetkoakʼ kathań purạua. Iń do Jerusalem reaṅ doń mena, ‘onḍe do hoṛko girobasokʼa,’ ar Jihudạ nagrahako reaṅ doń mena, ‘onako do arhõ teṅgo ruạṛokʼa.’ Ar disạm reakʼ maraokʼ akanakʼko do arhõń teṅgo ruạṛa.

²⁷ Athantar dakʼ doń metakʼa, ‘rohoṛokʼme; iń do amakʼ gaḍakoń ańjetʼ ocoya.’

²⁸ Ar Kores reaṅ doń mena, ‘uni do ińren gupiyicʼ kanae; ar iń okań kusiyakʼ ona sanamakʼe kạmiya. Uni do Jerusalem reaṅe mena, ‘arhõ teṅgo ruạṛokʼma,’ ar koejoṅ oṛakʼ reaṅ doe mena, ‘ona reakʼ rehetʼ do bạisạukʼma.”