Jesaea 43 - সান্তালী বাইবেল

Israelren babańcaoicʼ

¹ E Jakob, okoe ame sirjạu akatʼme, E Israel, okoe ame benao akatʼme, uni Probhu Isor do ńitokʼ niạ kathae meneda, “Alom botorokʼa, ente am doń chaḍao akatʼmea. Iń do amakʼ ńutum ńumkateń hohoakatʼmea, am dom ińren kana.

² Dakʼ talatem sen paromokʼre hõ iń do am são sãoteń tahena. Ar gaḍako secʼtem calakʼre hõ onako do bako ḍubạmea; ar seṅgel talatem parom calakʼre hõ, am do bam lokʼa; seṅgel lepʼ do bae jharkao daṛeama;

³ ente ińkangeạń amren Probhu, amren babańcaoicʼ Isor, ar Israelren uni sonoticʼ. Iń do amakʼ chaḍao reakʼ dam lekate Misor disạmiń emokʼkana, ar am bodolte do Kus ar Seba disạmge.

⁴ Am bodolte iń do eṭakʼ hoṛkoń emokʼa ar amakʼ jiwi bodolte eṭakʼ jạtrenkoń emokʼa, ente ińakʼ nońjorre am dom damangea arem manotgea, ar iń do amiń dulạṛetʼmea.

⁵ Alom botorokʼa, ente iń do am sãotege minạńa. Purub disạm khon amren bõskoń ạgukoa ar pạchim disạm khon do amiń jarwamea.

⁶ Ar utạr reakʼ disạm doń metaea, ‘onko aṛakʼkako me,’ Ar dạkhin disạm doń metaea, ‘alom aṭkaokoa. Iń do unkiniń metakinạ, ‘aben do sạṅgiń disạm khon ińren hoponko ạguko ben, ar pirthimi reakʼ ses simạna khon ińren hoponerako ạguko ben.

⁷ Ińakʼ ńutumte okoeko hoho ocokʼ, okoe do ińakʼ ṭhonok lạgitʼ iń sirjạu akatʼko, okoe doń gaṛhao akatʼko ariń benao akatʼko, onko mimitʼko ạgukope.’ ”

⁸ Okoe do mẽtʼ menakʼ tulucʼ hõko kãṛãge ar lutur menakʼ tulucʼ hõ bako ańjom onko doko oḍokʼ hijukʼma.

⁹ Sanam boṅgan hoṛ jạtrenko doko jarwa midokʼma ar hoṛko do mitʼ jaegareko hecʼ jarwakʼma. Onko modre ona do okoeko jạhir daṛeakʼa, ar pạhil reakʼko do okoeye udukʼ daṛeabona? Ar onkoakʼ kathako je, sạrikan ona sạbud lạgitʼ onko do akoren gohako ạgukoma jemon onko do ona ańjomkateko mendaṛeakʼ, “Noage sạriyakʼ kana.”

¹⁰ Probhu Isor do Israelkoe metakokana, “Apege ińren goha ar ińren bachao akan golam kanape, ar ape jemonpe pạtiạukʼ arpe baḍae daṛeakʼ, iń kangeạń uni do. Iń lahate okoe Isor hõ bako sirjạu akana ar iń tayomte eṭakʼ cele Isor hõ bako tahena.

¹¹ Ińge Probhu Isor do, iń chaḍa ar cele babańcaoko hõ bạnukʼkoa.

¹² Ińiń lại jạhireda, ariń bańcao akatʼpea ariń sodoreda; unre ape talare cele debota hõ bako tahẽkana. Ar niạ reaṅ do apege ińren gohako kanape. Iń Probhu Isorge inạ katha doń meneda; ińkangeạń Probhu do.

¹³ Hẽ, pạhil khon ini kangeạń. Okoege ińakʼ ti khon do ohoko rukhiyạ daṛelena. Ińiń kạmile khan ona do okoe hõ bako bạtil daṛeakʼa.”

Isorakʼ daya ar Israelakʼ bepạtiạu

¹⁴ Probhu Isor, aperen chakʼḍaoicʼ, Israelren uni sonoticʼ do niạ kathae meneda, ‘iń do ape ńutumte Babelte hoṛkoń kolkoa ar sanam huṛkạṛ koń rạputʼ giḍikakʼa; ar Kạldikoakʼ bạḍạiyiń maraotakoa.

¹⁵ Iń kangeạń Probhu Isor do, aperen uni sonoticʼ; ińge Israelren sisirjạuicʼ ar aperen raj do.”

¹⁶ Probhu Isor do jalapuri talate hore benaoleda, ona khạndri dakʼ talate suṛucʼ horgeye benaoleda.

¹⁷ Uni do rãt gạḍiko ar daṛean lạṛhại phạdkoe oḍok ạguletʼkoa. Onko do mitʼ domte onḍeko khadlelena, ar baṅgeko rakapʼ daṛeada. Onko do diuhe lekako ĩṛĩcʼena.

¹⁸ Uni doe meneda, “Lahateakʼ jotowakʼ do alope disạea; sedaeakʼ jãhãnakʼ hõ alope moneyakʼa.

¹⁹ Ńelpe, iń do mitʼṭecʼ nãwã kạmiń kạmi lạgidokʼ kana. Ona do ńitge ehobokʼa arpe baḍae daṛeakʼa. Iń do hahaṅkar talate horiń benaoa ar khaṅkarre gaḍań ạtu ocoya.

²⁰ Bir janwar, toyo ar ũṭ cẽṛẽko do ińko sarhaoińa, ente ińren hoṛko, ińren bachao akan hoṛkoakʼ jomakʼ lạgitʼ hahaṅkarre dakʼiń jogao akoa ar khaṅkarre do gaḍań hoeocoya.

²¹ Onko hoṛko do iń apnar lạgitʼ iń benao akatʼkoa jemon ińakʼ ṭhonokko sodor daṛeakʼ.

²² “Menkhan E Jakob, am do bam hohoakadińạ; E Israel, am do iń iạtem laṅga akana.

²³ Jeredokʼ samaṅokʼakʼ lạgitʼ iń ṭhen bhiḍi hõ bam ạguakatʼkoa ar amakʼ jãhãnakʼ samaṅokʼakʼ hotete iń do bam manot akadińạ. Iń do am cetanre anaj samaṅokʼakʼ bhar do bạń em akatʼmea; ar kundurukote hõ bạń laṅga ocoakatʼmea.

²⁴ Am do jãhãn jut so bocʼ hõ bam kiriń akawạdińa; ar janwar samaṅokʼakʼ itilte bam kusi ocoakadińạ. Ona bodolte am do amakʼ kại reakʼ bojham ladeakawadińa ar amakʼ sanam behokakʼtem laṅga ocokedeńạ.

²⁵ “Ińge amakʼ ghạṭkoń meṭao akada; iń do amakʼ kạiko bạń disạ dohoytama.

²⁶ Amakʼ bisoeko reaṅ disạ ocoyińme; ar dela hijukʼme, dela ona reaṅ laṅ reṭepeṭelenge, am do apnar secʼ katha roṛme jemon dhoromem ṭarhaokʼ.

²⁷ Amren pạhil ạpum doe kạikeda; amren mańjha mańjhi hoṛ do iń reaṅko ghạṭkeda.

²⁸ Onate iń do apeakʼ mundilren naekekoń opomankoa ar Jakob do marao ocokʼ lạgitʼ iń soprotea ar Israel do landa-dhutʼicʼ iń hoeocoyea.”