Jesaea 42 - সান্তালী বাইবেল

Probhu Isorren golam

¹ Probhu Isore meneda, “Ńelpe, ińren guti, one uniń goṛowae kan; ariń bachao akade ar one unireń kusi akan. Ińren Jiu do unireń dohoyea ar uni do boṅgan hoṛ jạtrenko ṭhen hok reakʼ bicạre lại jạhira.

² Uni do bae hohoea ar ãṭ aṛaṅte bae roṛa; uni do kulhikore acʼakʼ aṛaṅ hõ bae ańjom ocoytaea.

³ Ar talga tạuạkʼ akan chuci do bae rạpuda ar ńũṛũ ńũṛũkʼkan diuhe hõ bae ĩṛĩja. Uni do dhoromte hok reakʼe bicạra.

⁴ Dhạrti reakʼ hok bicạr ạuriye purạu hạbicʼ uni do bae laṅgakʼa se bae talga tạuạgokʼa. Ar jalapuri ḍhipkoren hoṛ do uniyakʼ ạnko ńel hor akaeko tahena.”

⁵ Probhu Isor do serma sirjạukateye bel akada; uni do dhạrti ar onare oka janamokʼ onakoe aṭetʼ akada; uni do onare tahenkan hoṛko sãhetʼe emako kana ar onḍe okoeko dãṛãnkan onko do jiue emakokana. Uniye meneda,

⁶ “Iń Probhu Isorge dhoromreń hohoakatʼmea; iń do amakʼ tiyiń sabtama. Ińgeń rukhiyạmea ar ińren hoṛko lạgitʼ mitʼṭecʼ bondobos menkateń dohomea ar eṭakʼ jạtrenko lạgitʼ do marsal lekań hoe ocomea.

⁷ Am do kãṛãkoakʼ mẽtʼem jhicʼ ocoytakoa, ar jelkhanare bondi akanko hõm chaḍaokoa ar okoe ńut reakʼ khạndṛuṅreko doho ocoakan onko dom oḍok ạgukoa.

⁸ “Iń kangeạń Probhu Isor do, ińakʼ ńutum do niạ kangea. Ińakʼ man ar sabasi do eṭakʼ boṅga murhutʼko bạń em ocoakokana.

⁹ Ńelpe, lahateakʼ ghoṭnako do ghoṭao akana ar iń do nãwã ghoṭna reakʼ iń lại sodoreda; ar onako ạuri ghoṭaokʼrege ape ṭhen onań lạiyeda.”

Probhu Isor ńutumte sarhao sereń

¹⁰ E jalapuri cetante dãṛãnkan hoṛko, ar onare menakʼ sanamakʼko, E sạṅgiń disạmko ar onaren girobasokʼko, ape do Probhu Isor ńutumte mitʼṭecʼ nãwã sereń sereńpe, pirthimi reakʼ ses simạna khon uniyakʼ sarhao sereńpe.

¹¹ Hahaṅkar ar ona reakʼ nagrahakoren do ãṭteko sarhao sereńma; Kedarre tahenkanko hõko sarhao sereńma, Selaren hoṛko hõ hulạsateko sereńma, buru reakʼ cuṛạ khon hõ rạskạteko sereńma.

¹² Onko do Probhu Isorko sarhaoema; ar sạṅgiń disạmkoren do uniyakʼ sarhaoko jạhirtaema.

¹³ Mitʼṭen birbão hoṛ leka Probhu Isor doe oḍok hijukʼa; uni do lạṛhại bir leka acʼakʼ tạpise uskurtaea; uni do lạṛhại lạgitʼ ãṭ aṛaṅteye hohoea ar bạiriko cetanreye jitạukʼa.

¹⁴ “Iń Probhu Isor do ḍher din khoniń hape akana; iń doń thirakan ariń rokao akana. Menkhan ńitokʼ do gidrại janam edekan maejiu lekań kikiạukʼkana, ahkaokʼ kạnạń ar phõ phõń sãhetʼeda.

¹⁵ Iń do buru boṭkocʼkoń jarkhara ar onḍenakʼ sanam aṛakʼ sakamkoń rohoṛ kạrcuba; ar gaḍako do ghuṭu otiń hoeocoya ar jolako doń ańjetʼ rohoṛa.

¹⁶ Kãṛãkoń ạyurkoa, ar bako baḍaekan ar ona suṛucʼ horteń idikoa. Ar ńut do onko laha lahateń marsal ocoya ar harcatʼ hurcutʼ hor doń mitʼsão utạra. Iń do niạkoń nonkaea, ar khạṭigeń nonkaea.

¹⁷ Menkhan okoe goṛhon muṭhạnreko bhorsakʼkan, ar okoe do chãchre dulakʼ boṅga muṭhạnko metakʼkan, ‘apege aleren debota do,’ enḍekhan onko do ạḍi lajaoreń paṛao ocokoa.

Kãṛã ar kala Israelko

¹⁸ “Ańjompe, E kalako, ar E kãṛãko, ape do beṅgetʼ rakabpe.

¹⁹ Ińren golam chaḍa ar okoeye kãṛãwa? Ińiń kol akade goḍet leka kala do okoe menaea? Ar iń cetanre bhorsakʼkạnicʼ kãṛã doe okoekana? Probhu Isorren golam leka kãṛã do okoe menaea?

²⁰ Am do ḍherem ńel akatʼre hõ bam moneyakʼ kana; ar lutur jhicʼgetamre hõ jãhãnakʼ bam ańjomeda.”

²¹ Probhu Isor doe kusiyena ar acʼakʼ dhorom ńutumte acʼakʼ ạnko maraṅ are ṭhonok ocoakada.

²² Menkhan noko hoṛ do jotowakʼge luṭ idi akantakoa, ar jotoge khạndṛuńreko khadle giḍi ocoakana ar jelkhanareko siń doho ocoakana. Onko do recʼ ocoakʼ jinis lekako hoyakana, onko rukhiyạko lạgitʼ do celege bạnukʼkoa. Onko do luṭteakʼ malko hoyakana; ar okoege bako meneda, “Onko ruạṛkope.”

²³ Ape modre ińakʼ katha ańjomicʼ do okoe menaea? Ar oka okte hijukʼkan ona lạgitʼ ińakʼ katha do okoeye moneyakʼa?

²⁴ Jakob do luṭe lạgitʼ okoeye soprot akadea? Ar Israel do luluṭkoakʼ tire okoeye jimạ akadea? Unige cetʼ Probhu Isor doe baṅkana, one uni upạrte bon kại akatʼ? Unkin do uniyakʼ horte calakʼ bạkin khojleda, ar uniyakʼ hukum hõ bạkin manaoleda.

²⁵ Onate uni do acʼakʼ jolokʼkan edre ar lạṛhại reakʼ botor do Israel cetanreye dulkeda. Onate seṅgel do beṛhaete jol rakapʼena, enhõ uni do bae bujhạuleda; seṅgel do uniyakʼ hoṛmore lagaoena, enhõ uni do bae moneyada.