Jesaea 41 - সান্তালী বাইবেল

Israelren gokʼṛoyicʼ

¹ Probhu Isore meneda, “E sạṅgiń disạmren hoṛko, iń samaṅre thir hape akae tahenpe. E jạt jạtrenko, ape do nãwã daṛepe ńama; ape do hecʼ sorokʼpe ar katha roṛpe. Dela, bicạr lạgitʼ mitʼ sãote bon jarwakʼ ma.

² “Purub secʼren uni do okoeye teṅgo ocokedea, one uni taṛam piche jitge daram edekan? Uni do boṅgan hoṛ jạtrenko uni ṭhene soprotkoa. Ar ona iạte uni do rapajko jaṅgateye lebetʼ gańjaokoa. Uni do acʼakʼ tarwaṛete dhuṛi lekae hoyocokoa ar uniyakʼ akʼte bhusạ lekae oṭaṅkoa.

³ Uni do onkoe khudạu idikoa: ar oka horte tishõ bae senakan ona horte khạtirjomae parom calakʼa.

⁴ Okoe noa doe kạmi akada? Ar okoe hotete niạ kạmi do hoyakana? Piṛhike piṛhi cetʼko hoyokʼ ona do pạhil khon okoeye ṭhik dohoakada? Iń Probhu Isorge pạhil khon minạńa ar ses okteren hoṛko sãote hõń tahena.”

⁵ Probhu Isorakʼ noa kạmi ńelte sạṅgiń disạmren hoṛ do botor caṛhaoakoa ar dhạrti reakʼ ses simạren hoṛ doko thartharaokʼa. Ar hecʼ sorkate mitʼ ṭhenko jarwakʼa;

⁶ onko do ako akoko gopoṛokʼa ar apan ạpin boehako metakoa, “Dil akae tahenpe.”

⁷ Kạrigol do sonhar dile emaekana; kuṭạsite kuṭạmicʼ do nihại kuṭạmkạnicʼe udgạu edekana. Uni do rasao reakʼ kạmi ńelteye mena, “Bhagege hoyakana. Uni do jạlạite onakoe kajakeda jemon ona alo laṛaokʼ.

⁸ Probhu Isore meneda, “Menkhan E ińren guti Israel, ar ińiń bachao akade Jakob, ińren dulạṛicʼ Abrahamren bõs,

⁹ iń do dhạrti reakʼ ses simạna khoniń hoho ạguakatʼmea. Ińiń metatʼmea, ‘am do ińren guti kanam,’ iń do amiń bachao akatʼmea, ar bạń dea gidiakatʼmea.

¹⁰ Onate alom botorạńạ, ente iń do am sãotegeń tahẽnkana; ar alom andesalekʼa, ente iń doń amren Isor kana. Iń doń daṛe ocomea ar khạṭigeń goṛowama ar ińakʼ jit reakʼ jojom titeń sapʼ ṭarhaomea.

¹¹ “Okoe am cetanreko raṅgaokʼkan onko do khạṭige lajao arko bemanot ocokʼa. Okoe am upạrteko teṅgonkan onko do cetʼ cinhạge baṅ tahentakoa; onko doko marao utạrokʼa.

¹² Ar amren bạirikom sendra baṛalekore hõ onko do bam ńamkoa. Okoe am upạrteko lạṛhại onko do cetʼ cinhạge ar baṅ tahentakoa,

¹³ ente iń kangeạń Probhu, amren Isor do: iń do amakʼ jojom tiyiń sapʼ akatʼtama ariń metamkana, alom botorokʼa; iń do amiń goṛowama.

¹⁴ E am tejo Jakob, alom botorokʼa; ińge amiń goṛowama. Iń Probhu Isor do amren babańcaoicʼ Israelren uni sonoticʼge niạ katha doń meneda.

¹⁵ Ńelme, nãwã enokʼ paṭageń hoyocomea. Am do burukom en gunḍạea, ar ḍuṅgriko do bhusạ lekam hoeocoya.

¹⁶ Am do onakom guma ar hoe do onakoe oṭaṅ idia. Menkhan am do Probhu Isor iạtem rạskạkʼa ar Israelren uni sonoticʼ do amren sarhaoanicʼe hoyokʼa.

¹⁷ “Reṅgecʼ ar nacarko do dakʼ reakʼko ńam baṛayeda, menkhan bako ńameda; tetaṅte alaṅ do sạkitʼ caba akantakoa. Menkhan iń Probhu Isorge onkoń roṛ ruạṛakoa; iń Israelren Isor do onko bạń bạgi giḍikoa.

¹⁸ Iń do poṭor buru cetante gaḍa dakʼ iń ạtu ocoya, ar buru-nalare do dakʼ reakʼ jharnakoge. Iń do hahaṅkarre pukhriń benaoa, ar rohoṛ otre do bhumbuk iń hoeocoya.

¹⁹ Hahaṅkarre, debdạru, babla, mehndi ar jạitun darekoń rohoea ar khaṅkarre do saro, tạsur ar jhão darekoge,

²⁰ jemon ona ńelte hoṛko baḍae arko bujhạu daṛeakʼ, noa do Probhu Isorakʼ tigeye kạmi akada, Israelren uni sonoticʼge niạkoe nonka akada.”

²¹ Probhu Isor, metakʼme Jakobren raje meneda, “Apeakʼ mambla samaṅtape, ar sạbudko ạguiytape.

²² Onako sạbud ạguiytape ar oka hoyokʼ ona lạiyabonpe. Lahateakʼ ghoṭnako reaṅ lạipe, jemon bon baḍae daṛeakʼ onako reaṅ mucạtʼ do cetʼ hoyokʼa mente; se darakanakʼ reakʼko lạiya bonpe cetʼ cetʼko hoyokʼa mente.

²³ Tayom daram dinkore cetʼ cetʼko hoyokʼa ona lạiyalepe, jemonle baḍae daṛeakʼ, ape dope debotako kana. Boge ar bạṛicʼ jãhãnakʼge mitʼṭecʼ kạmipe jemon ona ńelte hahaṛa arle botorokʼ.

²⁴ Menkhan ape do sạrige cele hõpe baṅkana, ar apeakʼ kạmiko hõ cetatakʼge baṅkana; ar okoe apeye bachaope uni doe hirkhạwạnicʼ kana.

²⁵ “Purub secʼren mitʼṭen hoṛ do ińakʼ ńutume lại sodora; uni do utạr secʼ khon hijukʼ lạgitʼ iń uskurede kana, ar uni doe hijukʼkana. Hasa cetʼlekako lebed ar kuṅkạl cetʼleka hasae lebetʼ gańjaoetʼkan onkage uni do disạm cakʼlaokoe lebetʼ gańjaokoa.

²⁶ Niạ babotre pạhil khon do okoeye lạileda jemon bon baḍae daṛeke? Se okoe pạhilreye baḍae ocoletʼ bona jemon bon roṛ daṛeke, ‘uni do ṭhik kathae meneda mente? Okoe hõ bako lạiyakada, ar okoe hõ bako baḍae ocoakada, ar okoe hõ katha roṛ do bako ańjomakada.

²⁷ Iń do pạhilre Sioniń men akadea ar ńelkom onko doko hecʼakana. Jerusalem do mitʼṭecʼ bhage sombat emokʼicʼ hoṛiń em akadea.

²⁸ Ińiń beṅgetʼ ạcurketʼ khan celege bạń ńamletʼkoa; sopolha emokʼ lạgitʼ onko modre okoehõ bạnukʼkoa, one uniń kulile khan roṛ ruạṛe em daṛeạń.

²⁹ Ńelpe, onko jotogeko ạuṛiyakʼgea, onkoakʼ kạmi do cetʼhõ baṅkana. Onkoren dul muṭhạnko do eken hoe baragge.”