Jesaea 40 - সান্তালী বাইবেল

Isorren hoṛko lạgitʼ jiwi raṛecʼ

¹ Aperen Isorre meneda, “Ińren hoṛko jiwi raṛecʼ emakope, Jiwi raṛecʼ emakope.

² Jerusalemren hoṛko sãote mạ̃hir salakʼ katha roṛpe, ar onko ṭhen niạ katha lại sodorpe, onkoakʼ duk ar kosṭo do caba akana, onkoakʼ ghạṭko do ikạ akantakoa, onkoakʼ sanam kạiko reakʼ jo do Probhu Isor ṭhen khon purạgeko ńamakada.”

³ Mitʼṭecʼ ãṛaṅ doe hohokana “Hahaṅkarre Probhu Isor reakʼ hor tearkataepe; khaṅkarre aboren Isor lạgitʼ mitʼṭecʼ ḍahar mitʼsãope.

⁴ Mitʼke mitʼ buru-nala do dhapaokʼa, buru ḍuṅgriko do copodokʼa, harcatʼ hurcutʼakʼ do mitʼsãokʼa, ar khoedakʼ lopakʼakʼ do bilạn ṭạnḍikʼa.

⁵ Unre Probhu Isorakʼ ṭhonokʼ sodorokʼa, ar manwa jạtren sanamko do mitʼte uniko ńela; Probhu Isorge noako katha doe meneda.”

⁶ Mitʼ hoṛakʼ aṛaṅe meneda, “Hohoeme” Ińiń menkeda, ‘Cetʼ menteń hohoea?” “Manwako do ghãs leka kanako, onkoakʼ ṭhonoktetʼ do ṭạnḍi reakʼ bahako lekage.

⁷ Ghãs do rohoṛokʼa ar baha hõ ńurokʼa, Probhu Isorakʼ sãhetʼ onareye oṅlere. Sạrige manwa do ghãs leka kanako.

⁸ Ghãs do rohoṛokʼa ar baha do ńurokʼa menkhan aboren Probhu Isorakʼ katha do jaejug tahẽ akan tahenkana.”

⁹ E Sion, bhage sombat jạkʼhiricʼ, am do usul burute rakapʼ calakʼme. E Jerusalem, bhage sombat jạkʼhiricʼ, am do ãṭ aṛaṅte hohoeme, ar alom botorokʼa; Jihudạ reakʼ nagraharen hoṛko metakom, “Hạni ńelepe aperen Isor!”

¹⁰ Ńelpe, Probhu Isor do daṛe salakʼe hijukʼkana, uniyakʼ daṛeanakʼ ti do raje calaoetʼtaea. Ńelpe, kuṛại do uni sãorege menakʼa, ar uniyakʼ hala ruạṛ do uni samaṅrege.

¹¹ Uni do gukʼpiko leka acʼren bhiḍikoe gupikoa, bhiḍi hoponkoe hobor samṭaokoa ar hoborkateye idikoa, hopon menakʼkotako eṅga do bại bạiteye sotokʼ idikoa.

¹² Okoe dakʼko do acʼakʼ loṭteye soṅakada ar sermako do okoe acʼakʼ bitạteye jokha akada? Dhạrti reakʼ dhuṛi do ạṛire okoeye sahopʼ ocoakada ar buru ar ḍuṅgriko hõ okoe tulạteye tulạ akada?

¹³ Probhu Isorren jiu do okoeye calao akadea ar uniren sosolhayicʼ lekate do okoeye solha akadea?

¹⁴ Buj ńam lạgitʼ Probhu Isor do okoeyakʼ solhae hatao akada, ar ṭhik hor do okoe uniye udukʼ akawadea? Okoe uni do ạkile cetʼ akawadea se buj bicạr reakʼ hore udukʼ akawadea?

¹⁵ Ńelpe, boṅgan hoṛ jạtrenko do kanḍa reakʼ mitʼ ṭhopʼ dakʼ lekanako; onko do tulạ reakʼ dhuṛi baraggeko lekhakʼ kana. Jalapuri reakʼ ṭạpuko do lemeń dhuṛi lekae tul rakapʼeda.

¹⁶ Lebanon reakʼ kaṭ do sahan lạgitʼ baṅ kulạukʼa ar onaren janwarko hõ jeredokʼ samaṅokʼakʼ lạgitʼ bako kulạukʼa.

¹⁷ Jạt jạtrenko do uni samaṅre cele hõko baṅkana; onko do celege bae moneyetʼkoa; uni ṭhen do ạuṛiyakʼgeko lekhakʼ kana.

¹⁸ Enḍekhan okoe tulucʼ Isor dope jurikea? Ar cetʼ sãotepe jurikea?

¹⁹ Kạrigol do chãchre goṛhon muṭhạne duleda; ar sonhar do sonate onae toleda ar ona lạgitʼ rupạ sikṛikoe benaoeda.

²⁰ Reṅgecʼ hoṛ do boṅga muṭhạn benao lạgitʼ baṅ seakʼ kaṭgeye bachao joṅa. Oka baṅ ḍikạ ḍaketʼ onkan boṅga muṭhạn benao lạgitʼ uni do gạkhuṛ kạrigolgeye sendrayea.

²¹ Ape do cetʼ bape baḍaea? Ape do cetʼ bape ańjomeda? Pạhil khonge cetʼ onako katha do baṅ lại akawatʼpea? Dhạrti rehedokʼ khonge cetʼ bape bujhạu akada?

²² Prithimi cetan reakʼ sermare unige siṅghạsonreye duṛupʼ akana, dhạrtiren hoṛko do sosrocʼ leka kanako. Orwal leka uni do sermae pasnao akada, tahen lạgitʼ tạmbu leka onae ṭaṅgao akada.

²³ Uni do rapajko cetat hõ bae hoeocoyetʼkoa ar disạm cakʼlaoko hõ ạuṛiyakʼe lekhayetʼkoa.

²⁴ Enegeko rohoeyokʼ kana, ar enegeko erogokʼ kana ar enegeko rehedokʼ kana, uni do onko cetanreye oṅeda ar onko doko tolmojokʼ kana; mitʼṭecʼ hoe bharḍo leka uni doe oṭaṅ idiyetʼkoa.

²⁵ Uni sonoticʼe meneda, “Okoe tulucʼpe juriyińa? Ar okoe iń soman doe hoyokʼa?”

²⁶ Coṭ secʼ beṅgetʼ rakabpe ar ńelpe; noako do okoeye sirjạu akada? Unige ipilko do mimitʼ mimitʼteye oḍoketʼkoa; unige onko mimitʼko ńutum ńumkateye hohowako kana. Uniyakʼ napṛakʼtetʼ ar maraṅ daṛete onkoren mitʼṭen hõ bako adokʼ kana.

²⁷ E Jakob, cedakʼem meneda, E Israel, cedakʼem lạliseda, “Ińakʼ hor do Probhu ṭhen khon danaṅ akana ińakʼ hok reakʼ bicạr ńam lạgitʼ ińren Isor do bae moneyạń kana?”

²⁸ Aben do cetʼ baben baḍaea? Aben do cetʼ baben ańjomakada? Probhu Isor okoe doe jaejugren Isorkan, okoe do dhạrti reakʼ mucạtʼ simạko hõe benao akatʼ, uni do bae laṅgakʼa, ar bae nijorokʼa, uniyakʼ ạkil reakʼ khạndritetʼ do celehõ bako jokha daṛeakʼa.

²⁹ Uni do laṅga akankoe daṛe ocoyetʼkoa ar nijorko do jore emako kana.

³⁰ Juạnko hõ laṅga arko thakao cabakʼ kana ar juạn koṛako hõ laṅgateko gujukʼ kana,

³¹ menkhan Probhu Isorre okoe asko dohoyetʼ onko do nãwã daṛeko ńama. Pajhaṛ cẽṛẽ leka onko do phạ̃kṛạ̃kʼ hotete coṭteko uḍạukʼa; onko doko dạṛ idiya ar bako laṅgakʼa, taṛamako ar bako nijorokʼa.