Jesaea 39 - সান্তালী বাইবেল

Babelren raj goḍet

¹ Un jokhecʼ Babel raj Baladanren hopon Merodak Baladan do Hiskiạwakʼ ruạ ar ruạ khon bogekʼ reakʼ khobor ańjomkate uni ṭhen ciṭhi ar sandeskoe kolkeda.

² Hiskiạ do kusite onko goḍetkoe ataṅ aderketʼkoa ar acʼakʼ sanam khajańci oṛakʼ, sona, rupạ, jut so mosola, daman sunumko, khanḍa bhanḍako ar murạikoe udukʼatʼkoa. Hiskiạwakʼ raj oṛakʼre se uniyakʼ rajosṭire nonkan cetʼge baṅ tahẽlena one okaṭakʼ do bae udukʼatʼko.

³ Tayomte Jesaea nạbi do Hiskiạ ṭhen senkateye kulikedea, “Onko hoṛko do cetʼko menkeda, ar oka khonko hecʼlena?” Hiskiại menkeda, “Onko do sạṅgiń disạm, Babel khonko hecʼlena.”

⁴ Nạbi do uniye kulikedea, “Onko do amakʼ raj oṛakʼre cetʼ cetʼko ńelkeda?” Hiskiạ doe menkeda, “Ińakʼ raj oṛakʼ reakʼ sanamakʼge onko doko ńelkeda. Ińakʼ khajańci oṛakʼre nonkan cetʼge bạnukʼa one okaṭakʼ do bạń udukʼ akawatʼko.”

⁵ Unre Jesaea do Hiskiại metadea, “Phạdkoren Probhu Isor okae menetʼ ona baṛe ańjomme.

⁶ Probhu Isore meneda, nonkan din hijukʼa tinre amakʼ raj oṛakʼ reakʼ jotowakʼ ar amren hapṛamkoko jogao akatʼ jãhãnakʼge teheń hạbicʼ tinạkʼ menakʼ onako jotoge Babelte idi ocokʼa, cetʼge baṅ bạgi oṭokʼa.

⁷ Amren adom bõsko, amren hoponko, okoe dom janam akatʼko onko do Babel rajakʼ oṛakʼre mạ̃yạ̃ṛi akae tahẽkate sapʼ sosor kạmiko kạmiya.”

⁸ Hiskiại roṛ ruạṛkeda, “Probhu Isorakʼ oka katham menketʼ ona do bhagegea.” Uni do niạ kathae menkeda, enteye hudisleda acʼakʼ jion bhor suluk ar nirạiteye tahẽdaṛeakʼa.