Jesaea 38 - সান্তালী বাইবেল

Hiskiạwakʼ ruạ

¹ Onako dinre Hiskiạ do gujukʼ dạkhile ruạ kạhil akan tahẽkana. Unre Amosren hopon Jesaea nạbi do uni ṭhen senkateye menkeda, “Probhu Isore meneda, amakʼ oṛakʼ duạr sạriạutam, ente am dom gujukʼgea, ar bam bogekʼa.”

² Niạ katha ańjomkate Hiskiạ do bhit secʼ samaṅkate Probhu Isor ṭhen koeketʼteye menkeda,

³ “E Probhu Isor, disạime baṛe, am samaṅre oka leka pạtiạrạnicʼ iń tahẽkana ar goṭa ontorte am botoram tulucʼ iń dãṛãnkan tahẽkana ar amakʼ mẽtʼre oka ṭhikakʼkan onageń kạmiyetʼ tahẽkana.” Ar niạ menkate Hiskiạ do hũk hũke rakʼkeda.

⁴ Unre Probhu Isorakʼ niạ katha do Jesaea ṭhen sodorena,

⁵ “Am do senkate Hiskiạm metaea, amren hapṛam Dạudren Probhu Isor do niạ kathae meneda, ‘amakʼ koejoṅiń ańjom akada ar amakʼ mẽtʼ dakʼ iń ńel akada; iń do amakʼ bahaokʼ din arhõ gelmõṛẽ bochor iń jutucʼatʼtama.

⁶ Ạsurren rajakʼ ti khon am ar niạ nagrahań rukhiyạya ar iń do noa nagrahań aḍa.

⁷ “ ‘Ińakʼ katha lekageń kạmikan ona reakʼ cinhạ do noage:

⁸ Ahasakʼ siṛhire siń cando reakʼ umul tinạkʼ dhap laha akan ona umul do gel dhapiń pạc ocoya.’ ” Onatege siń cando sãote umul do arhõ gel dhap pạc ruạṛena.

⁹ Jihudạren Hiskiạ raj do acʼakʼ ruạ khone bogeyen tayom okae olletʼ ona do nonka:

¹⁰ Ińiń menleda, “Ińakʼ bahaokʼ reakʼ adha dinkorege cetʼ iń do Sheol reakʼ duạrte bolokʼ hoyokʼtińạ? Ar ińakʼ sarecʼ bochorko khon do cetʼ iń eṛe ocokʼa?”

¹¹ Ińiń menleda, “Jiwetʼkoakʼ disạmre Probhu Isor do ar bạń ńelea; niạ purire girobasokʼ kan manwako hõ ar bạń ńelkoa.

¹² Gupikoakʼ tạmbu leka ińakʼ tahen oṛakʼ do uṭhạukʼtińạ ar iń khoniń idi ocokʼa. Kicricʼ teteńko leka ińakʼ bahaokʼ dinko doń guṛhe doholeda ar ona khon ńitokʼ dom getʼ chaḍaotińạ. Ar mitʼ dinregem ses utạrińạ.

¹³ Ạuri setagokʼ hạbicʼ goṛo ńam lạgitʼ iń doń rakʼkeda. Dhạcri kul leka ińakʼ jaṅkom rạputʼketʼtińạ; ar mitʼ dinrege iń dom ses utạrińạ.

¹⁴ Bhạluạ ar kõkʼ lekań keco beḍrokʼkan tahẽkana, potam lekań kuku ḍuburetʼ tahẽkana. Coṭ secʼ beṅgetʼ beṅgetʼte ińakʼ mẽtʼ do ṭolmolaokʼ kantiń tahẽkana. E Probhu Isor, iń doń cipạ ocokʼ kana, ińakʼ bhar baṛe hataome.

¹⁵ “Menkhan iń do cetʼ iń mena? Unige nonkae men akadińa ar acʼge noae nonka akada. Ińakʼ jiwi reakʼ noa jontrona iạte goṭa jion reakʼ sarecʼ bochorkore hape akaniń tahena.

¹⁶ E Probhu Isor, amakʼ katha ar kạmitege manwa do jiwetʼko tahenkana; niạko talarege ińakʼ jiu do jiwetʼ tahena. Ar ińakʼ hoṛmom ruạṛ kạtińte jiwetʼ iń tahena.

¹⁷ “Ńelme, ińakʼ bhạlại lạgitʼge niạ bạṛicʼ jontronań jomeda menkhan nosṭokʼ reakʼ khorloṅ khon am do amakʼ dulạṛtem bańcao akadińạ. Ar ińakʼ joto kạikom capatʼ giḍi akada.

¹⁸ Ente Sheol do bae sarhao daṛeama ar gujukʼ hõ bae õṛhẽ daṛeama. Ar okoe niạ khorloṅteko pheḍ calakʼ onko do amakʼ gokʼakʼ reakʼ pạtiạrtetʼ bako ńel daṛeakʼa.

¹⁹ Eken jiwetʼkoge, hẽ jiwetʼkoge am doko sarhaomea cetʼleka teheń amiń sarhaoetʼme; apat do acʼren hoponko amakʼ gokʼakʼ reakʼ kathae lạiyako leka.

²⁰ Probhu Isor do ińe rukhiyạ akadińạ, onate aboakʼ goṭa jion reakʼ dinko Probhu Isorakʼ oṛakʼre taranakʼ bajna sãote bon sereńa.”

²¹ Niạ lahare Jesaea doe menleda, “Loa jo reakʼ piṭhạ benaokate uniyakʼ bis phoṛareko thopramae khange uni doe bogekʼa.”

²² Unre Hiskiạ do noa hõe menletʼ tahẽkana, “Probhu Isorakʼ oṛakʼteń sen daṛeakʼ reakʼ cinhạ do cetʼkana?