Jesaea 37 - সান্তালী বাইবেল

Jerusalem rukhiyại reakʼ nạbi katha

¹ Hiskiạ raj do niạ kathae ańjomketʼ khan acʼakʼ kicricʼe oṛecʼketʼtaete gõṛẽ kicricʼe horokʼkeda ar Probhu Isorakʼ oṛakʼteye boloyena.

² Uni do raj oṛakʼren mukhiyạ Eliạkim, rajren olokʼ icʼ Sibna, naekeko ar mukhiyạko gõṛẽ kicricʼko horokʼ akatʼge Amasren hopon Jesaea nạbi ṭhene kolkatʼkoa.

³ Onko do Jesaeako metadea, “Hiskiạ do nonkae meneda, teheńakʼ din do gạr, ar nisṛạu ar opoman reakʼ din kana. Ale do gidrạkole janamko leka dosa hoyakantalea menkhan onko janamko reakʼ daṛege bạnukʼtalea.

⁴ Ạsurren raj do jiwetʼ Isor nisṛạue lạgitʼ Rabsakeye kolakadea, menkhan amren Probhu Isor do hoedaṛeakʼa onako sanamakʼ katha ańjomkate uniye sạjạiyea. Onate am do onko lạgitʼ koeme one okoe ńit hạbicʼ jiwetʼ menakʼko.”

⁵ Hiskiạ rajren kạmiyạko do tinre Jesaea ṭhenko hecʼena,

⁶ Unre Jesaea do onkoe metatʼkoa, “Aperen kisạ̃ṛpe metaea, Probhu Isore meneda, ‘okaṭakʼem ańjomakatʼ, metakʼme Ạsur rajren gutiko iń upạrte oka henosta kathako roṛ akatʼ onate am do alom botorokʼa.

⁷ Ańjompe, iń do unire mitʼṭecʼ jiuiń kolea ar onate uni do mitʼṭecʼ sombate ańjoma ar acʼakʼ disạmteye ruạṛ calakʼa, ar iń do onḍege tarwaṛeteń makʼ gojea.’ ”

Ạsurrenko do Hiskiạ botorko udukʼae kan

⁸ Rabsake doe ańjomkeda, Ạsurren raj do Lakis bạgikate Libna upạrteye lạṛhại kana. Ona iạte uni hõ onḍeye calaoena.

⁹ Ạsurren raj Senakerib doe ańjomkeda, Kus disạmren Tirhak raj do acʼ upạrte lạṛhại lạgitʼe oḍok hecʼakana. Uni do niạ kathae ańjomketʼ khan Hiskiạ ṭhen goḍetkoe kolketʼkoa. Uni do onkoe metatʼkoa,

¹⁰ “Jihudạren raj Hiskiạ nonka metaepe, ‘okoe cetanrem bhorsakʼkan uni Isor doe meneda, Ạsurren rajakʼ tire Jerusalem do baṅ soprotokʼa. Uniyakʼ ona eṛe kathate am do alom bulạu ocokʼa.

¹¹ Ńelme, Ạsurren raj do eṭakʼ eṭakʼ disạmko cetʼlekae marao giḍiyakatʼ ona do khạṭigem ańjom akada; enḍekhan cekate am dom hudiseda onam rukhiyạ daṛeakʼa?

¹² Ińren hapṛamko do okoe jạtren hoṛko marao giḍiletʼko onkoren debotako, metakʼme Gosan, Haran, Reseph ar Telasarreko girobasokʼ kan Edonren debotako do cetʼ onkoko rukhiyạ daṛeatʼko tahẽkana?

¹³ Hamatren raj, Arpadren raj, Sepharwayim nagraharen raj ar Hena ar Ibahren raj doko okayena?”

Hiskiạwakʼ koejoṅ

¹⁴ Hiskiạ do pathaonakoakʼ ti khon ciṭhi hataokateye paṛhaokeda. Ona tayom uni do Probhu Isorakʼ oṛakʼte bolokate Probhu Isor samaṅre ciṭhiye samaṅkeda.

¹⁵ Hiskiạ do Probhu Isor ṭhen noae koekeda,

¹⁶ “E Probhu Israelkoren raj, am do Kerubkin talarem tahẽnkana, ar am eskarge dhạrtiren sanamakʼ rajosṭiren Isor kanam. Am do serma ar otem benao akada

¹⁷ E Probhu Isor, luturakʼ tińme baṛe; ar amakʼ mẽtʼ beṅgedtam, ńelme; Senakerib do jiwetʼ Isor henostawae lạgitʼ cetʼko kathae roṛ gotʼakada.

^18-19 E Probhu Isor, noa katha do sạrikana, Ạsurren rapajko do onkoakʼ disạmko marao giḍiakada ar onko jạtren hoṛko maraoketʼkote onkoren debota do seṅgelreko khadle giḍikatʼkoa. Onko do Isor doko baṅkana, manwa tite benaoakʼ eken kaṭ ar dhiri kanako; ar ona iạtege onko doko marao giḍi daṛeatʼko tahẽkana.

²⁰ E aleren Probhu Isor, de ńitokʼ Ạsurren rajakʼ ti khon rukhiyạleme, jemon dhạrtiren sanam rajosṭirenko baḍae daṛeakʼ, am eskar kangeam Probhu Isor do.”

Senakeribakʼ ńurokʼ

²¹ Unre Amosren hopon Jesaea do Hiskiạ ṭhen niạ kathae kolkeda, “Israelren Probhu Isore meneda, Asurren raj Senakerib reaṅ amakʼ koejoṅ do uniye ańjom akada.

²² Uni upạrte Probhu Isore meneda, ‘kũạri kuṛi Sion am doko nisṛạumea arko landa-dhutʼama. Jerusalemren hoṛko do am tayomre bohokʼko rukuitakoa.

²³ Am do okoeyem henosta akadea? Ar okoe upạrte opoman reakʼ kathako dom roṛetʼkana? Am do okoe upạrtem kikiạukʼ kana ar okoe cetantem beṅgetʼ paromeda? Am do Israelren uni sonoticʼ upạrtege noakom nonka akada.

²⁴ Amren golamko hotete Probhu Isor dom landa-dhutʼae kana, amakʼ sanam rãt gạḍikoante bururem decʼakana, Lebanon reakʼ usul utạrakʼ cuṛạrem rakapʼ akana, ar ona reakʼ usul usul debdạru ar bhage bhage saro dareko dom makʼ giḍiakada, ar ona reakʼ bir bhitrikorem boloakana,

²⁵ Uprikoakʼ jaegare am do kuńem la akada ar onḍenakʼ dakʼem ńũ akada. Amakʼ jaṅgate Misor reakʼ gaḍakom lebetʼ rohoṛakada.

²⁶ Am do cetʼ bam ańjomakada, ḍher din laha khonge ona doń niṭakatʼ tahẽkana, ar ḍher din laharege ona reakʼ iń goṭa akatʼ tahẽkana mente? Ńitokʼ do onań hoyocokeda. Onatege pạcrite esetʼ nagrahako do dhiri puńjirem hoyocoakada.

²⁷ Onḍenko hoṛ doko nijor akana ar ạḍi bạṛicʼko botor akana arko lajao akana. Onko do khet reakʼ ghãs leka, omon rakapʼ akan hạriạṛ cara leka, chad cetanre janam akan ghãs leka ạuri hara rakabokʼregeko tolmojokʼ kana.

²⁸ Menkhan am do okarem tahen kana ar tinrem hijukʼkana arem calakʼkana ar cedakʼ iń upạrtem raṅgaokʼkana onako joto doń baḍaegea.

²⁹ Iń upạrtem edre akana ar amakʼ bạḍại reakʼ katha do ińakʼ luturre hecʼakana ar onate iń do mũreń nakolmea ar mocareń jhinmea; ar oka hortem hecʼakan ona hortegeń ruạṛ gotʼkama.’

³⁰ “E Hiskiạ, am lạgitʼ cinhạ do nõkʼõe: nes acʼte oka janamokʼ onape joma, ar kalom ona khon oka janamokʼ onage jompe. Menkhan satom do itạpe era ar phosolpe ira ar darkha bagwan benaokate ona reakʼ jope joma.

³¹ Jihudạ gusṭiren okoeko hoṛ do unhạbicʼ jiwetʼko tahen onko do ar mitʼ dhaoko jo bahakʼa. Dare leka onko do latar secʼko rehedokʼa ar cetan secʼ doko jo bahakʼa.

³² Ar sarecʼ hoṛ do Jerusalem khonko oḍokokʼa ar Sion buru khon do rukhiyạko ńamakatʼ mitʼ dol hoṛko hijukʼa. Phạdkoren Probhu Isorakʼ ãṭ do onageye hoeocoya.

³³ “Ona iạte Probhu Isor do Ạsurren raj reaṅ niạ kathae meneda, ‘Uni do niạ nagrahate bae bolokʼa se nonḍe do mitʼṭecʼ sar hõ bae aṛaga. Ar ḍhalante niạ samaṅte hõ bae hijukʼa se gherao esetʼkate dejokʼ ar pheḍokʼ lạgitʼ jãhãnakʼge bae benaojoṅa.

³⁴ Uni do okaṭakʼ horteye hecʼakan ona hortegeye ruạṛ calakʼa; niạ nagrahare do bae bolokʼa. Iń Probhu Isorge niạ katha doń meneda.

³⁵ Ar ińge ińren guti Dạud lạgitʼ niạ nagrahań esetʼ ạcurkakʼa ariń rukhiyạya.’ ”

³⁶ Ona tayom Probhu Isorren goḍet do oḍok senkate Ạsurrenkoakʼ ḍeraren mitʼ lakh irạlgel mõṛẽ hajar hoṛe gocʼketʼkoa. Ar dosar hilokʼ setakʼre hoṛko to tinreko beretʼena unre sanam jaegare eken mạ̃ṛĩko ńelkeda.

³⁷ Onate Ạsurren raj Senakerib do acʼren lạṛhại phạdanteye ruạṛ calaoena ar Niniwi nagrahare senkateye tahẽyena.

³⁸ Mitʼdin Senakerib do acʼren debota Nisrokakʼ mundilreye dewa sewayetʼkan tahẽkanre uniren hopon Adramelek ar Sareser do onḍe bolokate tarwaṛete unikin gocʼkedea ar Ararat disạmtekin dạṛkeda. Ar uniren hopontetʼ Esarhadon do uni bodolteye rajena.