Jesaea 36 - সান্তালী বাইবেল

Senakerib do Jerusalem botore udukʼaekan

¹ Hiskiạ raje rajokʼ gelponakʼ bochorre Ạsurren raj Senakerib do Jihudạ reakʼ pạcrite esetʼ sanam nagrahakoe akromonketʼte onakoe dokholana.

² Ona tayom Ạsurren raj do Rabsake sãote mitʼṭecʼ maraṅ utạr lạṛhại phạdkoe soṅgeadete Lakis khon Jerusalemren raj Hiskiạ ṭhene kolkedea. Rabsake do senkate kicricʼ sobotʼkoakʼ ṭạnḍi reakʼ ḍahar aṛe usul jaega reakʼ pukhri sãote joṛao akatʼ dakʼ nala ṭhene teṅgoyena.

³ Unre raj oṛakʼren mukhiyạ Hilkiạren hopon Eliakim, rajren olokʼicʼ Sibna ar Itihãs olokʼicʼ Asaphren hopon Joa do oḍokente uni ṭhenko senena.

⁴ Rabsake do onkoe metatʼkoa, “Hiskiạ do noa kathape metaea, maharaj, metakʼme Ạsurren raje meneda, ‘am do cetʼ cetanrem bhorsakʼ kana?

⁵ Ińiń meneda amakʼ lạṛhại lạgitʼ bud ar daṛe reakʼ katha do ạuṛiyakʼgetama. Ma lạiyạńme, okoe cetanrem bhorsakʼkante iń upạrtem huhul kana?

⁶ Am dom loṭocʼ, pạṭiol ṭheṅga, metakʼme Misor cetanrem bhorsakʼ kana. Okoe ona pạṭiol ṭheṅga cetanreye bhorsakʼkan uni do ti pạṭi tabokʼtaea. Misorren raj Pharao cetanre okoeye bhorsakʼ uni cetanre hõ onkage hoyokʼa.’

⁷ Arpe mitạń khan aleren Probhu Isor cetanrele bhorsa akana, enḍekhan uni do cetʼ uni Isor doe baṅkana one uniyakʼ than boṭkocʼko ar pinḍko Hiskiạ doe marao giḍiakatʼtae, ar one uni do Jihudạ ar Jerusalemren hoṛkoe metako kan niạ pinḍrege sewae hoyokʼtakoa mente?

⁸ “Iń hũyạte aperen raj arhõ metaepe, ‘daṛeakʼ khanem ińren kisạ̃ṛ Ạsurren raj sãote bạji dohoyme, iń do bar hajar sadomkoń emapea ar onko lạgitʼ ape do aswariko ńamkope.

⁹ Ar ona hõ bam daṛeakʼ khan ińren kisạ̃ṛren huḍiń utạricʼ subedar do cekatem tạkicʼ daram daṛekea, ente am do Misor reakʼ rãt gạḍi ar aswariko cetanrem bhorsakʼ kana?

¹⁰ Ona chaḍa iń do cetʼ Probhu Isor ṭhen khon begor hukum hataokate niạ jaega akromon lạgitʼ iń rakapʼ hecʼakana? Niạ disạm upạrte lạṛhạikate ona marao lạgitʼ Probhu Isor do acʼge ińe menakawạdińa.’ ”

¹¹ Unre Eliakim, Sibna ar Joa do Rabsakiko metadea, “Amren golamko ṭhen dayakate Arami pạrsite katha roṛme, ente ale do onale bujhạu daṛeakʼa. Pạcri cetanren hoṛko samaṅre Ibri pạrsite do alom metalea.”

¹² Menkhan Rabsake doe menkeda, “Ińren kisạ̃ṛ do cetʼ eken aperen kisạ̃ṛ ar ape ṭhen niạko katha lại lạgitʼe kol akadińạ? Pạcri cetanre duṛupʼ akan noko hoṛko, okoe ape leka akoakʼ icʼ ar putu jojom hoyokʼtako onko ṭhen hõ cetʼ bae kol akadińa?”

¹³ Ona tayom Rabsake do teṅgoyente ãṭ aṛaṅte Ibri pạrsiteye menkeda, “Ape do maraṅ rajakʼ, metakʼme Asurren rajakʼ katha ańjompe.

¹⁴ Raje meneda, Hiskiạ do alo jemone eṛepe. Ente uni do bae rukhiyạ daṛeapea.

¹⁵ Hiskiạ do nonka menkate Probhu Isorre aloe bhorsa ocope ma enkathae, ‘Probhu Isor do khạṭige apeye bańcaopea; ar niạ nagraha do Ạsurren rajakʼ tire bae jimạyea.”

¹⁶ “Hiskiạwakʼ katha do alope ańjoma. Ạsurren raje meneda, ‘iń tulucʼ sulukokʼpe ar iń ṭhen oḍok hijukʼpe. Enḍekhan ape do apan ạpin darkha bagwan reakʼ jo ar apan ạpin loa dare reakʼ jope joma ar apnarakʼ kuń khon dakʼpe ńũiya.

¹⁷ Ona tayom iń do hecʼkate apeakʼ disạm leka ar mitʼ disạmteń idipea. Ona disạm do anaj ar nãwã darkha rasa reakʼ disạm, piṭhạ ar darkha bagwan reakʼ disạmtege.

¹⁸ Hiskiạ do aloe ạnḍicʼpe ma oneye metape, Probhu Isorgeye rukhiyạbona. Jạt jạtkoren jãhãe debotage cetʼ Ạsur rajakʼ ti khon acʼakʼ disạme rukhiyạ daṛeakada?

¹⁹ Hamat ar Arphadren debotako doko okayena? Ar Sepharwayimren debotako hõko okaeyen? Onko do cetʼ ińakʼ ti khon Samariạko rukhiyạ daṛe akawada?

²⁰ Niạko disạmren sanam debotako hõ cetʼ ińakʼ ti khon apnarakʼ disạmko rukhiyạ daṛeakawada? Enḍekhan Probhu Isor do cetʼ ińakʼ ti khon Jerusaleme rukhiyại daṛeakʼa?’ ”

²¹ Menkhan hoṛko do hapegeko tahẽyena, cetʼge bako roṛ ruạṛleda, ente Hiskiạ raj do jãhãnakʼ roṛ ruạṛ lạgitʼe baronletʼkoa.

²² Inạ tayom raj oṛakʼren mukhiyạko do Hiskiạren hopon Eliakim, rajren olokʼicʼ Sibna ar Itihãs olokʼicʼ Asaphren hopon Joa do akoakʼ kicricʼko oṛecʼketʼte Hiskiạ raj ṭhenko ruạṛ calaoena ar Rabsake cetʼkoe roṛketʼ ona jotowakʼko lạiyadea.