Jesaea 35 - সান্তালী বাইবেল

Chaḍao ńamakatʼ hoṛkoakʼ rạskạ

^1-2 Hahaṅkar jaega ar khaṅgoṭ disạm do rạskạkʼa; khaṅkar ot do hulạsokʼa ar jo bahakʼa. Sạpin leka asecʼ tasecʼ bahakʼa; khaṅgoṭ ot do rạskạkʼa are hulạsokʼa. Uni do Lebanon reakʼ ṭhonoke emocokʼa, uni do Karmel ar Saron reakʼ mạhimako emaea; ar hoṛko do Probhu Isorakʼ ṭhonokko ńela, aboren Isorakʼ mạhimage.

³ Lebṛecʼ ti do keṭecʼ ocoytape; ar lakaṛ lukuṛ gunṭhi hõ kajaktape.

⁴ Ḍurukiạ monanko metakope, “Ape do daṛeanko hoyokʼpe, ar alope botorokʼa. Aperen Isor doe hijukʼa, uni do halahạli ar sạjại emokʼ lạgitʼgeye hijukʼa; ar hecʼkateye bańcaopea.”

⁵ Unre kãṛãkoakʼ mẽtʼ do saṛokʼtakoa, ar kala hoṛkoakʼ lutur do jhijokʼtakoa.

⁶ Unre leḍhako do jel hopon lekako don baṛaea, guṅgạ hoṛkoakʼ alaṅ do rạskạteye andoṛa, hahaṅkarre do dakʼ bhumbukokʼa. Ar khaṅkar jaegakore do gaḍa dakʼ ạtukʼa.

⁷ Rohoṛ ṭhon ṭhon jumi do pukriko hoyokʼa, ar tetaṅokʼkan ot do dakʼ reakʼ jharnakoge; ar toyoko tahenkan jaega do dalahe, chuci ar pạṭiolge janamokʼa.

⁸ Onḍe do ḍahar hoyokʼa, hẽ onḍe do mitʼṭecʼ horge hoyokʼa; ona do sonotakʼ horko metakʼa. Be sapha hoṛ do ona cetante bae taṛama; ona do sonot hoṛkoakʼ horge hoyokʼa. Lelha hoṛko hõ ona horte do bako calakʼa,

⁹ Onḍe do cele dhạcri kul hõ bako tahena, cele kaṭaha janwarko hõ ona horte do bako calakʼa; ar onko do onḍe ńelhõ bako ńelokʼ, menkhan eken chakʼḍao ńam hoṛge ona horteko taṛama,

¹⁰ Probhu Isorren chaḍao hoṛ doko ruạṛ hijukʼa. Onko do rạskạ sereń sereńte Sionteko bolokʼa; onkoakʼ bohokʼ reakʼ mukuṭ do jaejug reakʼ rạskạge hoyokʼtakoa. Onko do kusi ar rạskạte onako ńama, unre duk ar kũhrạukʼ dokin dạṛjoṅa.