Jesaea 34 - সান্তালী বাইবেল

Jạtrenko sạjạiko reaṅ

¹ E jạtrenko, hecʼ sorokʼpe, ar ańjompe; E hoṛko, luturakʼpe. Dhạrti ar onaren sanam hoṛko ańjompe; prithimi ar ona reakʼ hasa khon benao akan hoṛko ańjomma.

² Sanam jạtrenko cetanrege Probhu Isor doe edre akana; onkoren sanam lạṛhại phạdko cetanre uni do ạḍiye edre akana. Uni doe marao utạrkoa, onko do jarkharakʼ tireye jimạkoa.

³ Onkoren gocʼ hoṛko do bahreteye capatʼ giḍikakoa. Onkoakʼ mạ̃ṛĩko reakʼ sea sĩṛĩcʼ so do ghãṛã ghạ̃ṛĩ rakabokʼa ar onkoakʼ mãyãmte buru-boṭkocʼ do ạrupʼ pheḍokʼa.

⁴ Sermaren siń cando, ńindạ cando ar ipilko doko marao utạrokʼa ar serma do kagoc leka lạṭumokʼa. Cetʼleka darkha nạ̃ṛĩ ar loa jo dare khon rohoṛ sakamko ńurokʼ onkage sanam ipilkoko ńurokʼa.

⁵ Ińakʼ tarwaṛe do sermare ńu rosao akana, ńelpe, bikʼcạr lạgitʼ ona do Edom cetanre, metakʼme okoeko hoṛ do jarkharokʼ lạgitʼ iń dohoakatʼko onko cetanre pheḍ hijukʼa.

⁶ Probhu Isorakʼ tarwaṛe do mãyãmte ńũ turetʼ akana; ona do itilte tol akana. Ona mãyãm do bhiḍi hoponko ar merom hoponkoakʼ mãyã leka ar itil do bheḍakoakʼ kunḍi reakʼ itil lekage, ente Probhu Isor do Bosrare mitʼṭecʼ samaṅokʼakʼ porobe hoeocoya ar Edomre do ạḍi utạr hoṛko gur ocokʼa.

⁷ Onko sãote do bir ḍạṅgrako, sanḍ ḍaṅgrako ar juạn ḍaṅgrako hõko gurkoa. Onkoakʼ disạm do mãyãmte ńũ bulokʼa, ar itilte dhuṛi do poṭomokʼa.

⁸ Niạko hoyokʼa, ente Probhu Isor do hala hạli reakʼ mitʼṭecʼ din menakʼtaea, Sion secʼ khon sạjại emokʼ reakʼ mitʼṭecʼ oktege menakʼa.

⁹ Edom reakʼ ạtukʼ dakʼ do alkatra leka hoyokʼa, ona reakʼ dhuṛiko do gondhok leka, onate disạm reakʼ ot do jolokʼkan alkatra lekage hoyokʼa.

¹⁰ Siń ar ńindạ tishõ ona do baṅ ĩṛĩjokʼa; jaejug ona reakʼ dhũạ do coṭte rakabokʼa. Piṛhike piṛhi ona do khạli akaege tahena; ona talate tishõ okoege bako senokʼa.

¹¹ Pajhaṛ ar jhĩk do onako dokhola, Dundu ar kạhũko do onḍeko ḍerakʼa. Probhu Isor do ạlmạl reakʼ jokha babere tija ar onaren napṛakʼko upạrte gulmal reakʼ sạhul babere pheḍa.

¹² Rajosṭi calao lạgitʼ cele rajge onḍe do bako tahena. Ar onaren sanam mukhiyạko doko maraokʼa.

¹³ Ona doṅgolre do jạnum jhonḍako hara rakapʼa, seṅgel siń ar rạigạini do ona reakʼ gaṛkore. Ona disạm do toyokoakʼ dander ar ũṭ cẽṛẽkoakʼ tahen jaega hoyokʼa.

¹⁴ Hahaṅkarren janwarko do toyo sãoteko tahena ar bir meromko do ako akoko hohojoṅa. Onḍe do ńindạ dãṛãn bhutko girobasokʼa; ar jirạukʼ jaegako ńam baṛaea.

¹⁵ Dundu do onḍe tukại benaojoṅa are beleya, inạ tayom uni doe obora are hoponkoa ar mitʼ ṭhene jarwakoa ar acʼakʼ phạ̃kṛạ̃kʼ umulreye guṅgutʼkoa.

¹⁶ Ape do Probhu Isorakʼ puthire ḍunḍhạupe ar paṛhaokate ńelpe. Onḍe ol menakʼa, noko do mitʼṭen hõ bako adokʼa; ar cele hõ bin juri do bae tahena; ente ińakʼ mocate Probhu Isor doe hukum akada, ar uniren Jiu doe mitʼ ṭhene jarwakoa.

¹⁷ Uni do gulibãṭkate ar jokha baberte soṅkate ona jaegae hạṭińakoa. Ar ona do jaejug onkoakʼge tahena; ar piṛhike piṛhi onko do onḍeko girobasokʼa.