Jesaea 33 - সান্তালী বাইবেল

Goṛo ńam lạgitʼ koejoṅ

¹ E jarkharicʼ, hae am do! Am do bam jarkhar akanre hõm jarkhareda; am do bam pạtiạu ocoakanre hõ am dom bepạtiạu ocoakana. Jarkhar reakʼ kạmi sạtlen khange am dom jarkhar ocokʼa; bepạtiạrtetʼ sạtlen khange am dom bepạtiạr ocokʼa.

² E Probhu Isor, alere dayakʼme; ale do am lạgitʼgele koyokʼ hor akada. Dinạmge setakʼ jokhecʼ ińren hoṛkoren daṛe baṛe hoyokʼme, ar muhinre bańcaoleme.

³ Amakʼ aṛaṅ ańjomte hoṛ doko ńir pharakokʼa; amem rakapʼlenre onko doko chirchạturokʼa.

⁴ Pohoko cetʼleka anajko nosṭo cabae, onkage E jarkharicʼ, apeakʼ jinisko hõ luṭokʼtapea. Pohoko cetʼ leka onareko don khadlekʼ onkage hoṛko hõko don khadlekʼa.

⁵ Probhu Isor doe dayawạnicʼ kana! Uni do sermareye tahenkana; Sion do hok reakʼ bicạr ar dhoromteye perecʼ akada.

⁶ Piṛhi cetan piṛhi uni do onkoren rurukhiyạyicʼ, babańcaoicʼ, ạkil ar buj reakʼ daṛe kanae. Probhu Isor botoraege onkoakʼ dhon do.

⁷ Ńelpe, onkoren birbão hoṛko do hor horteko rakʼ baṛaeyeda; sulukokʼ lạgitʼ kol ocoakan paṭhaonako hõ hũk hũkko rakʼeda.

⁸ Ḍaharko do khạligea, cele hoṛ hõ horte bako calakʼ kana. Bondobos do rạputʼ akana; nagrahako do nihạ̃t ocokʼkana ar manwa do cele hõ bako metakokana.

⁹ Disạm do hińjrạukʼ kana ar loraokʼ kana, Lebanon doe lajao ocokʼkana ar tolmojokʼ kana, Saron do hahaṅkar leka hoyakana ar Basan ar Karmel reakʼ dare sakamko do ńur caba akana.

¹⁰ Probhu Isore meneda, “Ńitokʼ doń teṅgokʼa, ńitokʼ doń usul ocokʼa, ńitokʼ do ińakʼ ṭhonok sodorokʼtińa.

¹¹ Apeakʼ kukhire do bhusạ gaṛhaokʼa ar busupʼpe janama. Apeakʼ sahẽtʼ do seṅgel leka apegeye jompea.

¹² Hoṛko do rapakʼakʼ cun dhiri lekako hoyokʼa ar getʼ giticʼakʼ jạnumko lekage onako do seṅgelreko atar giḍi ocokʼa.”

¹³ Okoe sạṅgińre menakʼpe, ape do iń okań ceka akatʼ ona ańjompe; ar okoe sorre menakʼpe ape do ińakʼ daṛe aṅgocpe.

¹⁴ Sionren kạkạiko do ạḍiko botor akana; Isor baṅ botorae hoṛ doko dhak dhakaokʼ kana. Onkoko meneda, “Abo modren okoeṭakʼ hoṛ do jojomkan seṅgel ṭhene tahẽdaṛekokʼa? Ar okoe do jaejug jolokʼkan seṅgel sãoteye tahẽdaṛeakʼa?”

¹⁵ Unigeye daṛeakʼa, okoe do dhoromteye colonetʼkan ar hok reakʼkoe roṛetʼkan, ar okoe do julum reakʼ labkoe hirkhạwakʼ kan ar ghus hatao khon pharakreye tahenkan, okoe hoṛ do khũn reakʼ alo ańjom lạgitʼ luture tubetʼetʼtae ar bạṛicʼakʼ kạmi ńel khon mẽtʼe jạpitʼkatae kan.

¹⁶ Uni hoṛ do khạtirjomae girobasokʼa ar uniyakʼ asray do buru reakʼ gaṛkoge hoyokʼa. Uni do jomakʼe emocokʼa ar dakʼ hõ khạṭigeye ńama.

¹⁷ Amakʼ mẽtʼ do raje ńelea uniyakʼ mońj rupre, manḍerte phaelao akan disạmgeye ạribạndhiya.

¹⁸ Amakʼ hudisre do lahateakʼ ona heṛan botoranakʼ kathage tahena. Amem hudisokʼa, “Okare menaea uni ṭaka lekhayicʼ do? Ar okare menaea uni hoṛ, okoe do khajnae uṭhạuetʼ? Ar okare menaea uni bhuruńj lekhayicʼ hoṛ do?”

¹⁹ Uni bạḍạite perecʼ hoṛ do ar bam ńelea; ar ạ̃nạ̃ṛi pạrsian hoṛ hõ bam ńelkoa, one onkoakʼ hahaṛa kathako do baṅ bujhạukʼ.

²⁰ Aboakʼ sanam porob reakʼ nagraha Sion secʼ beṅgedme. Amakʼ mẽtʼkin do Jerusaleme ńela, nirạite tahen jaega ar baṅ ocogokʼ tạmbuge. Ona reakʼ khunṭiko do tishõ baṅ or todokʼa ar ona reakʼ baber hõ baṅ topagokʼa.

²¹ Onḍe daṛean Probhu Isor do aboakʼ bhạlại lạgitʼe tahena. Onḍe do osar osar gaḍa ar nalako tahena. Onḍe do lạukạ hõ baṅ calakʼa; ar jãhãn daṛeanakʼ jahaj hõ ona cetante baṅ calakʼa.

²² Probhu Isorge aboren hokren bikʼcạricʼ ar aboren cakʼlaoyicʼ do; Probhu Isorge aboren raj, unige abo doe rukhiyạbona.

²³ Amakʼ ṭakʼnao baberko do ḍhil akantama; onare badam khunṭi do kajakte baṅ aṭkao akana, ar badam hõ baṅ pasnao akana. Unre ạḍi utạr jinisko hạṭińokʼa; ar leḍhako hõ luṭakʼ jinisko idi joṅa.

²⁴ Sionre girobasokʼ hoṛko do okoehõ bako mena, “Iń doń ruạkʼ kana.” Ar onḍe okoeko girobasokʼ onkoakʼ kại do ikạkʼtakoa.