Jesaea 31 - সান্তালী বাইবেল

Isor do Jerusaleme rukhiyạya

¹ Hae onko do one okoe goṛo ńam lạgitʼ Misorteko calakʼkan! Onko do sadom ar rãt gạḍireko bhorsakʼ kana ar aswarikoakʼ maraṅ daṛe cetanre pạtiạuko dohoyeda, menkhan onko do Israelren uni sonoticʼ secʼ bako beṅgetʼeda ar Probhu Isor ṭhen goṛo bako khojkana.

² Enrehõ uni doe ạkilangea, uni do ghoṭnakoe hoeocoya; acʼakʼ katha do bae ruạṛtaea. Uni do bạṛicʼko upạrte ar onkoren gokʼṛoko upạrteye beredokʼa.

³ Misorrenko doko manwa kange, Isor doko baṅ kana; onkoren sadomko hõ jelren kanageko, jiu doko baṅkana. Probhu Isor do tinre acʼakʼ tiye rakabtaea unre gokʼṛoko doko tohodokʼa ar okoe goṛoko ńametʼ tahẽkan onko doko ńurokʼa; ar jotoge mitʼteko marao utạrokʼa.

⁴ Probhu Isor do niạ kathae metadińạ, “Dhạcri kul cetʼleka acʼe gocʼ akade janwar cetanreye gondraokʼkan ar uni upạrte mitʼ dol gukʼpikoko hoholere hõ bae botorokʼkan. Onkage phạdkoren Probhu Isor do lạṛhại lạgitʼ Sion buru ar ona reakʼ usul ṭhạ̃ikoreye pheḍ hijukʼa.

⁵ Manḍraokʼkan cẽṛẽ leka, phạdkoren Probhu Isor do Jerusaleme aḍ bańcaoa. Uni do onae aḍa are rukhiyạya, onae tạnkhiya are bańcaoa.

⁶ E Israelrenko, okoe upạrte nunạkʼpe hulletʼkan uni ṭhen ruạṛ hijukʼpe,

⁷ ente enhilokʼ ape okoe do sona ar rupạren boṅga murhutʼko benaokatepe kại akatʼ, onko dope capatʼ giḍikakoa.

⁸ Probhu Isore meneda, “Manwa khonakʼ baṅkan nonkan mitʼṭecʼ tarwaṛe reakʼ hạnte Ạsurrenko doko gurokʼa; ar ona tarwaṛege onko doe ńẽtʼkoa. Uniren hoṛko do tarwaṛe samaṅ khonko ńir pharakokʼa ar onkoren juạnko do khaṭao lạgitʼko jormoṭkoa.

⁹ Onkoren raj do botorteye dạṛ pạnḍuja; uniren senaputiko do jhạnḍi ńelte ạḍiko botorokʼa.” Sionre okoeyakʼ seṅgel ar Jerusalemre okoeyakʼ bhaṭa menakʼtae, uni Probhu Isorge niạ katha doe meneda.