Jesaea 30 - সান্তালী বাইবেল

Bebatao jạtrenkoakʼ durdosa

¹ Probhu Isore meneda, “Hae onko ṭhoṭhok hoponko do, okoe do ponthawakʼko kạmikan menkhan iń leka do baṅa. Onko do bondobosko bandhaoeda menkhan ińren Jiu reakʼ sana leka do baṅ. Jemon kại cetan kạiko ḍạṅjoṅ.

² Iń sãote sopolha baṅkate Misorteko calakʼ kana; onko do goṛo ńam lạgitʼ Pharaoakʼ asrayko hataoeda ar Misor reakʼ umulreko hirlạkʼ kana.

³ Menkhan Pharaoakʼ asray doe lajao ocoyetʼkoa ar Misor reakʼ umul doe bemanotkoa.

⁴ Soanre onkoren cetan hudạren kạmiyạko menakʼkoa ar onkoren goḍetko do Hanesteko seṭerakana,

⁵ menkhan enhõ onko mimitʼko doko lajao ocokʼa, ente onko jạtrenko do jãhãnakʼ porhoge bako hoyokʼtakoa. Onko do cetʼ goṛo ar porho hõ bako ńama; eken lajao arko bemanot ocokʼa.”

⁶ Dạkhin disạmren janwarko reaṅ nạbi katha: onko goḍetko do kosṭo ar durdosate perecʼ disạm talate ar dhạcri kul ar kul eṅga, bisan biń ar uḍạukʼkan bińkoakʼ disạm talateko calakʼa. Onko do akoakʼ dhon-duribko gadhare ladekate ar damanakʼ jinisko do ũṭ deare ladekate onko jạtrenko ṭhenko idiya one okoe hotete jãhãn labge baṅ hoyokʼtako.

⁷ Misor reakʼ goṛo do ạuṛiyakʼgea, jãhãn kạmi reakʼge baṅkana; ona iạte iń do onko jạtrenkoakʼ ńutumiń dohoakada Rahab, metakʼme duṛupʼ hape akanicʼ.

⁸ Am do ńitokʼ mitʼṭecʼ dhiri paṭare ar mitʼṭecʼ puthire ol dohoyme, jemon darakan dinkore ona do Israelko lạgitʼ mitʼṭecʼ jaejug reakʼ goha leka tahen.

⁹ Noko do kạṭhuạ jạtren kanako, eṛe roroṛ hoponkoge: Probhu Isorakʼ cecetʼakʼ baṅ ańjometʼkan hoponkoge.

¹⁰ Onko do ńeńelkoko metako kana, “Dorson do ar alope ńela,” Ar nạbi doko metakokana, “Okaṭakʼ sạrikan ona do ar alope lạiya. Ale ṭhen suk reakʼ katha lạipe; ar okaṭakʼ sạriyakʼ baṅkan onkanakʼko nạbiyalepe.

¹¹ Hor khon sahaṛokʼpe, ar suṛucʼ hor khon ghańjeṛokʼpe. Israelren uni sonoticʼakʼ katha do ar alope ańjomalea.”

¹² Ona iạte Israelren uni sonoticʼ do niạ kathae meneda, “Ape do ińakʼ kathape nihạ̃t akada, ar eṛe ar sasantaoko cetanrepe bhorsakʼkana.

¹³ Onate niạ kại do ape lạgitʼ usul bhitre menakʼ oḍo oḍo paṛakʼ leka kana oka do oborokʼ lạgidokʼkan, one ona ackage obor ńurokʼ mitʼ ripitʼtege.

¹⁴ Ona do hasa reakʼ bhajan leka rạputʼ gejerokʼa; ar nonka rạpudokʼa, ona reakʼ mitʼ kecakʼ kelhatʼ hõ baṅ ńamokʼa one onate culhạ khon torocʼ se kuń khon dakʼ rakapʼ daṛekokʼ.”

¹⁵ Probhu Isor, Israelren uni sonoticʼ do niạ kathae meneda, “Kại khonpe ruạṛlen khan bańcaope ńama, ar pạtiạrre diṛho akaepe tahelen khan do daṛepe ńama.” Menkhan ape do bape rạmjạulena.

¹⁶ Apepe menkeda, “Baṅ, ale do sadomre decʼkatele dạṛa.” Onate ale do dạdạṛ hoyokʼtalea. Apepe menkeda, “Khacaṛ sadomre decʼkatele calao joṅa. Onate okoe apeko khudạupe onko do coṭkargeko hoyokʼa.

¹⁷ Mitʼ hoṛ botoraete aperen do hajar hoṛko dạṛa ar mõṛẽ hoṛ botorakote sanamkogepe dạṛ pạnḍuja; onate aperen lạṛhại phạdko do buru cetan reakʼ jhạnḍi chaḍa ar cetʼge baṅ tahentakoa.

¹⁸ Enhõ Probhu Isor do ape dayawape lạgitʼe koyokʼ horakada; uni do ape mãyãwape lạgitʼe sapṛao akana. Probhu doe dhoromren Isor kana; okoe uni lạgitʼ koyokʼ hor akaeko tahen onko doko bhạgangea.

¹⁹ E Sionren hoṛko, okoe do Jerusalemrepe tahenkan, ape do ar bape raga. Goṛo ńam lạgitʼpe rakʼle khan uni do khạṭigeye dayawapea. Uni do ańjom torageye roṛ ruạṛapea.

²⁰ Probhu Isor do thoṛa piṭhạ ar thoṛa dakʼe ematʼpe tahẽkanre hõ, enhõ aperen cecetʼicʼ Probhu Isor do ar bae oko tahena; apeakʼ mẽtʼtege unipe ńelea.

²¹ Etom se kõńe jãhãtegepe calakʼ ape do tayom khon uniyakʼ niạ kathape ańjom ńama, “Niạ kangea hor do; niạ hortege taṛam idipe.”

²² Unre ape do aperen rupạ ar sonatepe muṛạu akatʼko boṅga murhutʼpe bhõnḍ ocokoa; ar mạilạ kicricʼ lekape giḍikakoa arpe mena, “Men nonḍe khon do sạṅgińokʼpe!”

²³ Uni dor dakʼe kolapea jemon otre itạpe er daṛeakʼ ar jumi khon oka phosolpe ńam ona do mońj ar purṭhạge hoyokʼa. Enhilokʼ aperen ạsul janwarko do maraṅ maraṅ ạtiń ṭạnḍireko ạtińa.

²⁴ Aperen cacas ḍaṅgrako ar gadhako do buluṅ akawatʼ danako joma one oka do haṭakʼ supticʼteko tear akatʼ.

²⁵ Enhilokʼ ḍher hoṛko gocʼ ocokʼa ar gaṛko do lạnduṛokʼa unre sanam buru boṭkocʼko khon dakʼko ạtu pheḍokʼa.

²⁶ Unre Probhu Isor do acʼren hoṛkoakʼ ghạlkoe bedhaotakoa ar ńẽtʼ ghaokoe bogeytakoa ar enhilokʼ ńindạ cando do siń cando leka marsale emokʼa, ar siń cando reakʼ marsal do eae dobṛa hoyokʼa.

²⁷ Ńelpe, Probhu Isor do jolokʼkan edre ar dạriạ dhũạ reakʼ rimilte sạṅgiń khone hijukʼkana; uniyakʼ mẽtʼãhã do edrete perecʼ ar uniyakʼ alaṅ do jojom seṅgel leka.

²⁸ Uniyakʼ sahẽtʼ do tạpiste ạtu hijukʼkan dakʼ leka oka do manwakoakʼ hoṭokʼ hạbicʼ rakabokʼkan. Uni do sanam jạtrenko nonosṭo reakʼ calateye calakoa ar mocare jhinkate maraokʼ secʼe or idikoa.

²⁹ Ar ape do sonot porob ńindạpe manaoetʼ lekape sereńa. Ar hoṛko do tinre tiriạwante Probhu Isorakʼ burure rakapʼkate Israel reakʼ asray buru ṭhenko hijukʼa ar unre cetʼleka rạskạ hoyokʼ onkage apeakʼ ontor hõ rạskạkʼtapea.

³⁰ Probhu Isor do acʼakʼ botoranakʼ kurkurạukʼ, jojom seṅgel reakʼ lepʼ, hoe dakʼ ar arel ńurokʼ hotete acʼakʼ ṭhonokanakʼ aṛaṅe ańjom ocokoa ar sạjại reakʼ tiye udukʼakoa.

³¹ Probhu Isorakʼ aṛaṅte Ạsur doe keklesedokʼa; ar acʼakʼ ṭheṅgate uni do Ạsurrenkoe hạnkoa.

³² Probhu Isor do onko sãote lạṛhại jokhecʼ tinre acʼakʼ niṭ akatʼ ṭheṅgate onkoe hạnkoa unre tobla ar peṛesaṅ do banamokʼa.

³³ Ente jolokʼkan jaega do laharege tear ṭhik akana; ona do raj lạgitʼ sapṛao akana. Ona jaega do khạndri ar osarge benao akana, ar onare seṅgel lạgitʼ ḍher sahanko menakʼa. Probhu Isorakʼ sahẽtʼ do jolokʼkan gondhok ạtukʼ leka onare seṅgele jereda.