Jesaea 3 - সান্তালী বাইবেল

Jihudạ ar Jerusalem reakʼ bicạr

¹ Ńitokʼ ńelme, phạdkoren Probhu Isor do Jerusalem ar Jihudạ khon ṭheṅga ar ṭhesae ocokʼeda. Uni do onkoakʼ sanam jomakʼ ar dakʼkoe ocoga.

² Ona chaḍa uni do birbao hoṛ ar lạṛhại sipạhiko, disạm cakʼlaoko ar nạbiko, gonokko ar murubbiko,

³ mõṛẽgel cetanren subedarko ar manotan hoṛko, jạdu udukʼko ar biń sasapʼkoe sạṅgińkoa.

⁴ Onko cetanre do kom umerren koṛakoge matha lekae benaokoa; ar thoṛa budan koṛako do onkoren cakʼlaokoko hoyokʼa.

⁵ Manwa do manwa, aḍepaseren hoṛko do aḍepaseren hoṛko santaokoa; kạṭicʼko do haṛamko upạrte ar nicạṛ hoṛ do manotan hoṛ upạrteko teṅgona.

⁶ Hoṛko do apnarakʼ bõsren mitʼ hoṛ sapʼkateko mena, “Amakʼ do oyonakʼ menakʼtama, am do aleren ạyuricʼ hoyokʼme, ar niạ jarkhar akan disạm reakʼ bhar do amge hataome.”

⁷ Menkhan enhilokʼ uni hoṛ do roṛ ruạṛateye metakoa, “Disạm bhạlại reakʼ ińakʼ do cetʼge bạnukʼtińạ. Ińakʼ oṛakʼre jãhãn jomakʼ se kicricʼko hõ bạnukʼtińạ; disạmren ạyuricʼ do alope benaoińạ.”

⁸ Jerusalem doe tohotʼ akana ar Jihudạ doe bhindạṛ akana, ente unkinakʼ katha ar kạmi do Probhu Isor birudrege hoyokʼkana; unkin do uni samaṅrege uniyakʼ ṭhonok kin nihạ̃tetʼ akada.

⁹ Unkinakʼ mẽtʼãhãge unkin upạrte gohae emetʼkana; unkin do Sodom reakʼ leka ạkinakʼ ghạṭkin sodoreda, ar bạkin danaṅkakʼ kana. Hae, onko hoṛko do! Onko do apnar cetanrege ghoṭnako paṛao ocoakada.

¹⁰ Dhorom hoṛko metakope, bhạlại hoyokʼtakoa, ente onko do akoakʼ kạmi reakʼ kuṛạiko ńama.

¹¹ Hae hae, bedhorom hoṛko do! Onko cetanre do muhin hijukʼa. Ar okako kạmikan ona reakʼ kuṛại doko ńamgea.

¹² Okoe ińren hoṛko santaoetʼko onko do gidrạko leka, ar okoe onkoko ḍanṭaoetʼko onko do maejiuko leka. E ińren hoṛko, aperen hor udukʼ hoṛkoge bạṛicʼ secʼko idiyetʼpea; onko do ṭhik hor khon bhul horteko idiyetʼpea.

¹³ Probhu Isor do mambla lạgitʼe beretʼ akana; uni do eṭakʼ eṭakʼ jạtrenko bicạrko lạgitʼe teṅgo akana.

¹⁴ Probhu Isor do acʼren hoṛko modre haṛam hoṛko ar mukhiyạko upạrte bicạrkateye meneda, “Ape do ińakʼ darkha bagwanpe nosṭo akada; ar reṅgecʼ hoṛkoakʼ jinisko luṭkate apeakʼ oṛakʼtepe idiakada.

¹⁵ Cetʼ iạte ińren hoṛ dope lebetʼ kucạ akatʼkoa ar reṅgecʼ hoṛ dope lebetʼ gańjao akatʼkoa?” Niạ katha do phạdkoren Probhu Isorgeye meneda.

¹⁶ Probhu Isor do arhõe meneda, “Sionren maejiu do bạḍạiteko perecʼgea. Onko do hoṭokʼ tiạrkateko beraberi baṛae kana arko bijli baṛayeda; ar chamak chamak taṛamate jhamak jhunur pạigạnko saḍe ocoyeda.

¹⁷ Ona iạte Probhu Isor do Sionren maejiuko bohokʼreye ńẽtʼkoa ar onate onko doko ceḍekʼa .”

¹⁸ Enhilokʼ Probhu Isor do onkoakʼ napae napae goena gạṭikoe recʼkoa. Uni do onkoakʼ pạigạnko, cạndi reakʼ rupạ jhạliko, chondro harko,

¹⁹ jhurjhuriko, curiko, ṭuṭuriko,

²⁰ mạ̃ṛko, bạjuko, kạcni piṭiko, jiṭhuyạkʼko, mạndạliko,

²¹ mundạmko ar mũ reakʼ mạ̃kṛiko,

²² porob reakʼ kicricʼko, oyon aṅgropko, sal kicricʼko ar jhola thạilạkʼko,

²³ ạrsiko, mĩhĩ musnạ kicricʼko ar jhińjri ṭuṭurikoge.

²⁴ Mońj so bodolte bạṛicʼ so, ḍanḍa totolakʼ bodolte baber, mońj rokʼ nạkicʼ upʼ bodolte ceḍe, damanakʼ kicricʼ bodolte gõṛẽ kicricʼ, ar mońj rup bodolte lo reakʼ dag tahena.

²⁵ Aperen hoṛko do tarwaṛete ar lạṛhại birko do lạṛhạireko gujukʼa.

²⁶ Sion reakʼ phaṭok duạr doko homor halaṅa; ar Sion do ujạṛ akante otreye duṛupʼkokʼa.