Jesaea 28 - সান্তালী বাইবেল

Ephrayimakʼ bạṛicʼ dosa

¹ Hae, Ephrayimren bul hoṛkoakʼ mukuṭ lekan nagraha, one oka iạte onko doko bạḍạiyetʼ tahẽkan! Hae, ona Ephrayim reakʼ bạḍạite perecʼ ṭhonok reakʼ mosotʼ akan mala, one oka do buru-nala otet reakʼ muthnire menakʼakʼ! Ona buru-nalaren hoṛko do darkha rasateko ńũ oborakana.

² Ńelpe, Probhu Isorren mitʼṭen ektiạran ar daṛean hoṛ menaea. Arel ar jarkharicʼ mitʼṭecʼ birbão hoe lekage, uni do daṛean birbão reakʼ banbạsi dakʼ leka otre ona nagraha doe tawakʼ giḍikakʼa.

³ Ephrayimren bubulkoakʼ ona bạḍạiteakʼ mukuṭ do otre lebetʼ gasmanḍaokʼa.

⁴ Ephrayim reakʼ ṭhonok mosotʼ akan mala oka do buru-nala otet reakʼ muthnire menakʼ, ona do bele loa leka pạhilrege caba utạrokʼa; one jãhãege ona ńelkate hataokateye jomke.

⁵ Enhilokʼ phạdkoren Probhu Isor do acʼren sarecʼ hoṛko lạgitʼ mitʼṭecʼ ṭhonokanakʼ mukuṭ ar mitʼṭecʼ mońj malae hoyokʼa.

⁶ Uni do bikʼcạrkoakʼ ontorre dhorom reakʼ monsubại danakoa. Ar okoe phaṭok-duạr ṭhen khon lạṛhạiko ocog onko do daṛeye emakoa.

⁷ Menkhan Ephrayimren naekeko ar nạbiko do ńitokʼ darkha rasa ńũkateko bul akana arko guṛdạu baṛaekana; onko do kiḍạkaḍe akan tahenrege dorsonko ńela ar inạ dosarege rayko ema.

⁸ Onkoakʼ joto ṭebil do becʼte perecʼ akana; ar oka jaega hõ sapha do bạnukʼa.

⁹ Onkoko mena, “Uni do bidiạ okoeye cetʼakoa? Ar acʼakʼ katha do okoeye bujhạu ocokoa? Okoe ńũńũko bạgi akatʼ ar okoe bạ̃s khonko or chaḍao ocoakan onko ṭhenge cetʼ baṅa?

¹⁰ Ente sikhạuna upạr sikhạuna menakʼa, sikhạuna upạr sikhạunage. Thar upạr thar, ar thar upạr tharge, nonḍe thoṛa hanḍe thoṛa. ”

¹¹ Bhagegea, enḍekhan Probhu Isor do bidisiạkoakʼ moca reakʼ hahaṛa pạrsite onko hoṛko ṭhen kathae roṛa.

¹² Uni do onkoe metatʼko tahẽkana, “Niạ kangea ona jirạukʼ jaega do, laṅga akan hoṛ do nonḍegeko jirạu joṅma. Ńelpe, ona kangea aosan jaega do.” Menkhan onko do ona bako ańjomleda.

¹³ Onatege onko ṭhen Probhu Isorakʼ katha do hoyokʼa, “sikhạuna upạr sikhạuna, sikhạuna upạr sikhạuna. Thar upạr thar, thar upạr thar. nonḍe thoṛa hanḍe thoṛa,” Jemon onko do taṛamle khange sạmbirteko bhindạṛokʼ arko hạnokʼte pạsireko sapʼ ṭarhaokʼ.

¹⁴ Ona iạte E ṭiṭkạrikan hoṛko, okoe do Jerusalemre onko hoṛko cetanre mạlikipe calaoetʼ, ape do Probhu Isorakʼ katha ańjompe.

¹⁵ Ape do bạḍạitepe meneda, “Ale do moron ar Sheol sãote mitʼṭecʼ bondobosle bandhao akada. Maraokʼ reakʼ cạbuk pheḍ hecʼlenre hõ ale do bae tiyokʼlea, ente eṛeteakʼ do aleakʼ hirlạ ar phikir do aleakʼ asraygele benao akawana.”

¹⁶ Onatege Probhu Isor do niạ kathae meneda, “Ńelpe, biḍạu aṭkarkate mitʼṭecʼ dhiriyiń bachao akawana; ona do Sion reakʼ konac dhiri lekateń bạisạu akada. Okoe onareye pạtiạukʼ uni do ṭarhao akane tahena.

¹⁷ Hok reakʼ bicạr do jokha baber ar dhorom do sạhul baberiń benaoa; arel do apeakʼ eṛeteakʼ hirlạkoe marao tapea, ar ḍubạ dakʼ do apeakʼ okoakʼ asraye cape iditapea.

¹⁸ Moron tulucʼ okaṭakʼpe bondobos akatʼ ona do bạtilokʼa; ar Sheol sãote oka bondobospe bandhao akatʼ ona hõ baṅ ṭikạukʼtapea. Maraokʼ reakʼ cạbuk pheḍ hijukʼre, ape do onatepe dal ocokʼa.

¹⁹ Ar tinạkʼ dhao ona pheḍ hijukʼa unạkʼ dhaogepe dal ocokʼa; aṅga marsalokʼ khon setakʼ hạbicʼ, siń ar ńindạ ona do kajakte pheḍ hijukʼa. Niạ kathape bujhạule khan torasge hoyokʼtapea.”

²⁰ Ar apeakʼ gitijokʼakʼ aṭetʼ hõ khaṭokʼtapea, ar oyokʼ lạgitʼ kombol hõ sakṛakʼtapea.

²¹ Probhu Isorgeye lạṛhạiya, cetʼleka uni do Perasim buru ṭhene kạmiletʼ. Uni doe raṅgaokʼa, cetʼleka Gibeon buru ṭhene raṅgaolen. Nonkate uni do acʼakʼ kạmi, acʼakʼ hahaṛa kạmiye sạta.

²² Onate ńitokʼ apeakʼ ṭiṭkạri katha do thirtape, ar baṅkhan apeakʼ totolakʼ do arhõ urijokʼtapea; ente phạdkoren Probhu Isorakʼ mocare goṭa dhạrti jarkharokʼ reakʼ kathageń ańjomakada.

²³ Ańjompe, ar ińakʼ katha luturakʼpe; ar okań roṛetʼkan monte ona ańjompe.

²⁴ Casokʼicʼ do itạ erokʼ lạgitʼ cacastegeye tahena? Uni do cetʼ jaoge ḍhelake gejera are ãṛgom somana?

²⁵ Hasae somanlere uni do cetʼ kạliạ jirạ ar jirạ bae eretʼ kana? Uni do cetʼ sạr sạrte guhum ar ṭhik jaegare jao ar phạ̃kṛạ̃kʼ guhumko simạnare bae rohoeyeda?

²⁶ Uniren Isorge uni doe hukumaea ar ṭhik hor reakʼe cetʼaea.

²⁷ Kạliạ jirạ do paṭate bako ena, se sagaṛ reakʼ pạ̃ihạ̃ hõ bako guṛgạu baṛaea, bickom ṭheṅgatege kạliạ jirạ ar jirạ doko ena.

²⁸ Okoehõ ḍher din hạbicʼ guhum do bako manḍaea, onate ona do bạṛijokʼa; manḍae jokhecʼ ona cetante pạ̃ihạ̃ se sadom nonkako calao koa jemon ona alo nosṭokʼ.

²⁹ Niạko ạkil do phạdkoren Probhu ṭhen khonge hijukʼa. Uniyakʼ sopolha do hahaṛagea ar uniyakʼ ạkil do sorosgea.