Jesaea 26 - সান্তালী বাইবেল

Sarhao sereń

¹ Enhilokʼ Jihudạ disạmre niạ sereńko sereńa: Jihudạ disạmre kajak nagraha menakʼ tabona; Isorakʼ babańcaoge hoyokʼa ona reakʼ pạcri ar gaṛko do.

² Ape do phaṭok-duạrko jhijpe jemon dhorom ar pạtiạrko dohoyetʼ jạtrenkoko bolo daṛeakʼ.

³ Okoeyakʼ mon amre tahẽ uricʼ akan uni do purạ suluktem dohoyedekana, ente uni do am cetanreye bhorsakʼ kana.

⁴ Ape do Probhu Isorre jaejug bhorsa akan tahenpe, ente Probhu, Isor do jaejugren asray buru kanae.

⁵ Okoe usul ṭhạ̃ireko girobasokʼ kan onko doe copotʼ akatʼkoa; uni do ona cetan nagrahakoe copotʼ ocoyeda. Ona do ot hạbicʼgeye copotʼeda, ar dhuṛireye milạueda.

⁶ Santaokʼko ar reṅgecʼko do jaṅgate onako lebetʼ gańjaoa.

⁷ Isor botorae hoṛkoakʼ hor do somangea; E dhoromicʼ, am do Isor botoraekoakʼ horem somaneda.

⁸ Hẽ, Probhu Isor, ale do amakʼ dhorom hortele taṛametʼkante am koyokʼ horre menakʼlea; aleakʼ khojokʼakʼ do amakʼ kạmi hotete sodorokʼme baṛe.

⁹ Ińakʼ jiwi do ńindạ am lạgitʼe rakʼeda. ińren jiu do am lạgitʼe ahkaokʼ kana. Dhạrtire amakʼ hok bicạr hecʼlenre prithimiren hoṛ do dhorom reakʼ cecetʼakʼ ko ńama.

¹⁰ Bedhorom hoṛko daya udukʼakore hõ onko do dhorom bako ceda; hokakʼ disạmre onko do dusṭạmiko kạmiya ar Probhu Isorakʼ mạhima hõ bako aṅgoca.

¹¹ E Probhu Isor, amakʼ ti do coṭte tul akan tahen kana, menkhan onko do ona bako ńeleda. Amren hoṛko lạgitʼ amakʼ ãṭ baṛeko ńelma arko lajaokʼma; ar seṅgel do amren bạirikoe jom cabakoma.

¹² E Probhu Isor, suluk baṛe teṅgo aleme; ente okale ceka daṛeakatʼ ona sanamakʼge am do ale lạgitʼem kạmi akatʼa.

¹³ E Probhu, aleren Isor, am chaḍa eṭakʼ Probhuko hõ ale cetanre mạlikiko calaoleda, menkhan ale do eken amgele aṅgocetʼmea.

¹⁴ Gocʼ akanko do ar bako jiwedokʼa; onkoren jiu do ar bako beretʼa. Onko do sạjạikatem meṭao giḍi akatʼako; onkoakʼ disạ hõm marao akatʼtakoa.

¹⁵ E Probhu Isor, am do onko jạtrenkom baḍhao akatʼkoa; ar onko jạtrenkom baḍhao akatʼkote sarhaoem ńamakada; am do disạm reakʼ sanam simạkom phaelao akada.

¹⁶ E Probhu Isor, kosṭokʼre onko do amko ńam baṛaketʼmea; ar amakʼ sạjại paṛaoatʼkore onko do nehõrate khae khoe koejoṅko phuṭạuatʼmea.

¹⁷ Bhạrti hoṛmo maejiu do janame oktere cetʼleka bedonteko eṛseń toṛseń baṛae, E Probhu Isor, ale hõ am samaṅre onkagele hoyakana.

¹⁸ Ale dole bhạrti hoṛmo akana, ar bedontele eṛseń toṛseń baṛaekana, menkhan ale do hoegele janam akada. Ar ale hotete disạm do baṅ rukhiyạlena, dhạrtiren hoṛ hõ ale hotete jion do bako ńamleda.

¹⁹ Menkhan amren gocʼakan hoṛ doko bańcaokʼa; onkoakʼ hoṛmo do jiwetʼ ruạṛokʼtakoa. Ape okoe do dhuṛirepe girobasokʼ kan, ape do dela ebhenokʼpe ar rạskạte andoṛpe. Setakʼ reakʼ sisir dakʼ cetʼleka dhạrtiye purṭhạ ocoyetʼ onkage am do gocʼko jiwiyem danakoa.

²⁰ E ińren hoṛko, do calakʼpe, apeakʼ kandhate bolokʼ bayokʼpe ar duạr sińkakʼpe; ar thoṛa ghạṛicʼ lạgitʼ oko hataṛokʼpe, one khĩs ạuri cabakʼ hạbicʼ.

²¹ Ńelpe, dhạrtiren hoṛko kại reakʼ sạjại emako lạgitʼ Probhu Isor do acʼakʼ tahen ṭhạ̃i khone oḍok hijukʼ kana. Dhạrti do acʼre joro akan mãyãme sodora; ar acʼre khũn akanko do bae dapalkoa.