Jesaea 24 - সান্তালী বাইবেল

Dhạrti maraokʼ reaṅ

¹ Ńelpe, Probhu Isor do dhạrtiye ujạṛ utạr are marao lạgidokʼ kana. Uni do ona reakʼ cetantetʼe ulṭạu giḍikakʼa ar onare girobasokʼ kan hoṛkoe chirc hạturkoa.

² Enhilokʼ naeke ar disạm hoṛko, kisạ̃ṛ ar gutiko, kisạ̃ṛ erako ar kạ̃ṛmĩko, kiriń ar ạkhrińko, dhar emokʼko ar hataoko ar rin emokʼko ar rin hataoko onko jotokoakʼ dosa do mitʼ lekage hoyokʼtakoa.

³ Dhạrti do ujạṛ utạrokʼa, ar purạtege luṭ ocokʼa. Probhu Isor do niạ kathageye meneda.

⁴ Dhạrti do hińjrạukʼ kana ar boraokʼ kana ar pirthimi do loraokʼ kana ar boraokʼ kana.

⁵ Dhạrti do uniren hoṛko besonot akada. Onko do ạn-ạriko bemanot akada; ạnko rạputʼ akada ar Probhu Isorakʼ bondobos leka do bako taṛam akada.

⁶ Ona iạte mitʼṭecʼ sarap do dhạrtiye utʼ cabaea; ar uniren hoṛko do dusikoko hoyokʼa. Ona iạte dhạrtire okoeko girobasokʼ kan onko doko atar giḍi ocokʼa ar thoṛa hoṛge jiwetʼko tahena.

⁷ Nãwã darkha rasa do baṅ tahena ar darkha nạ̃ṛĩ hõ hińjrạukʼa; ar okoeko hulạsokʼkan tahẽkan onko do jotoge duk iạteko kuhrạukʼa.

⁸ Toblako reakʼ saḍe ar andoṛetʼko reakʼ sabad ar peṛesaṅ reakʼ rạskạ do caba utạrokʼa.

⁹ Onko do sereńate darkha rasa do ar bako ńũiya; ar bul hoṛkoakʼ mocare bubulakʼ do haṛhatʼge ạikạukʼa.

¹⁰ Nagrahako do dhaṅdhaser akan tahena. Sanam oṛakʼ duạr do huṛkạṛokʼa; ar bhitrite do bako bolo daṛeakʼa.

¹¹ Darkha rasa lạgitʼ hor horteko kikiạu baṛaea. Rạskạ bodolte duk hoyokʼa, ar dhạrti khon hulạs do sạṅgińokʼa.

¹² Nagraha do dhaṅdhaser ḍạṅ leka hoyokʼa ar phaṭok duạrko do kuṭạm lạnduṛ ocokʼa.

¹³ Jạitun dare ruku tayom ar darkha jo gotʼ tayom cetʼleka darere thoṛa jo tahen, onkage dhạrtiren jạtkoakʼ dosa hõ hoyokʼtakoa.

¹⁴ Onko do rạskạteko andoṛa arko sereńa. Onko do pạchim secʼ khon ãṭ aṛaṅte Probhu Isorakʼ ṭhonokko sarhaotaea.

¹⁵ Ona iạte purub secʼrenko do Probhu Isorko sarhaoema ar sạṅgiń disạmren hoṛko do Israelren Probhu Isorko õṛhẽ sereńaema.

¹⁶ Dhạrti reakʼ ses simạ khon ale do niạ sereńle ańjom ńameda, “Dhoromicʼ Isorakʼge sarhao baṛe hoyokʼtae ma!” Menkhan ińiń meneda, “Hae! Iń do sorbonasreń paṛao akana, ente bepạtiạrko doko bepạtiạreda; hẽ onko do ạḍitetʼko bepạtiạr akada.”

¹⁷ E dhạrtiren hoṛko, ape lạgitʼ botor, ghaḍlakʼ ar pạsi doe koyokʼ hor akada.”

¹⁸ Okoe hoṛ botoranakʼ saḍe ańjomkateye ńirjoṅ uni do ghaḍlakʼreye khańjokʼa, ar okoe ghaḍlakʼ khone rakabokʼ uni do pạsireye sapʼ ocokʼa. Serma reakʼ khiṛkiko jhijokʼa ar dhạrti reakʼ rehetʼ do dal dalaokʼa.

¹⁹ Dhạrti do kaṭra kuṭrạ cabakʼa, dhạrti do oṛejokʼa ar dhạrti do botorge dal dalaokʼa.

²⁰ Dhạrti do ńũ bul hoṛ leka konḍe manḍekʼa, ar hoete lewer lewerokʼkan oṛakʼ leka lewer lewerokʼa. Uniyakʼ kại reakʼ bojha do nunạkʼ hamal hoyokʼtaea, uni do ar tisge bae teṅgo ruạṛ daṛeakʼa.

²¹ Enhilokʼ Probhu Isor do sermaren phạdkoe sạjạikoa, ar dhạrtire do rapajkoe sạjạikoa.

²² Jelkhana reakʼ khạndṛuṅre bondi akan hoṛko cetʼleka mitʼ ṭhenko doho ocokʼ onkage onko do mitʼ ṭhenko doho ocokʼa. Onko do Jelkhanareko bond ocokʼa ar ḍher din hạbicʼko sạjại ocokʼa.

²³ Ńindạ cando doe nak kaṭakʼa ar siń cando doe lajaokʼa, ente phạdkoren Probhu Isor do Sion buru ar Jerusalemreye rajokʼa, ar onaren murubbiko do uniyakʼ ṭhonokko ńela.