Jesaea 23 - সান্তালী বাইবেল

Tur upạrte Probhu Isorakʼ katha

¹ Tur babotre Probhu Isorakʼ katha do nonka: E maraṅ maraṅ tạrsis jahajko, hae haeyokʼpe, ente Tur do jarkhar akana; onḍe do oṛakʼ hõ bạnukʼa, bondor hõ bạnukʼa. Ape do Kuprus disạm khon niạ sombatpe ańjomakada.

² E ḍhip aṛe aṛete tahenkan hoṛko, E Sidonren bạnij bepariko, thirokʼpe. Aperen nạbikko do jalapuriko parom akada.

³ Sihon gaḍa, metakʼme nil gaḍa ḍhip aṛeteakʼ anaj do maraṅ jalapuri cetante hijukʼkan tahẽkana; ar Tur reakʼ arjaowakʼ do ona gaḍa aṛe reakʼ phosolge tahẽkana, ar Tur do sanam jạtkoren beparigeye tahẽkana.

⁴ E Sidon, lajaokʼme, ente jalapuri, ona jalapuri reakʼ gaṛ do niạ kathae meneda, “Iń do bedon baṅ rakapʼ akawạdińa, ar janam hõ bạń janam akatʼkoa. Iń do juạn koṛako bạń ạsul hara akatʼkoa ar juạn kuṛiko hõ bạń joton akatʼkoa.”

⁵ Misorre niạ khobor seṭerlen khan Misorrenko do Tur reakʼ sombat iạte monre ạḍi kosṭoko ńama.

⁶ E jalapuri aṛe aṛete girobasokʼ kan hoṛko, ape do hae haeyokʼpe; ar Tạrsiste parom senokʼpe.

⁷ Noage baṅ rạskạteakʼ nagrahatape do, ona mare nagraha, one ạḍi marege, one onaren hoṛko sạṅgiń disạmte girobasokʼ lạgitʼko calakʼkan tahẽkan?

⁸ Okoe Tur do eṭakʼko mukuṭe horokʼako kan tahẽkan, ar okoeren bạkʼnijko doko rapajko kan ar bekʼpariko do dhạrtiren manotanko kan, uni upạrte niạ do okoeye goṭakeda?

⁹ Uniyakʼ sanam bạḍạiko maraotae lạgitʼ ar dhạrtiren manotan hoṛko bemanotko lạgitʼ phạdkoren Probhu Isorge niạ doe goṭa doholetʼ tahẽkana.

¹⁰ E Tạrsisren hoṛko, nil gaḍa dakʼ cetʼ leka chạplạu rakabokʼ onkage ape hõ disạmrepe chirchạturokʼa; ape aṭkao dohope leka do ar celege bạnukʼkoa.

¹¹ Probhu Isor do jalapuri cetanre acʼakʼ tiye tiyạr akatʼtaea ar rajosṭikoe daldalao akada. Uni do Kanan disạm babotre mitʼṭecʼe hukum akada jemon ona reakʼ gaṛkoe marao giḍikakʼ.

¹² Uni doe menkeda, “E Sidonren hoṛko, apeakʼ rạskạ do caba akantapea, ente ape dope santao ocokʼkana. Ma beretʼpe, ar Kuprus dipte parom calakʼpe; onḍehõ jirạu do bape ńama.”

¹³ Kạldikoakʼ disạm beṅgetʼakʼpe; mitʼ okte uniren hoṛko do celege bako baḍaeyetʼko tahẽkana. Ạsurrenko Babel do hahaṅkarren janwarkoakʼ ṭhạ̃iko hoy ocoakada, menkhan Babelrenko do Tur upạrte jhãp em lạgitʼ pahra oṛakʼ leka usul usul rãt gạḍiko benao akada, ar uniyakʼ maraṅ maraṅ oṛakʼko luṭ akada ar dhaṅ dhaserakʼ ḍạṅ lekako hoyocoakada.

¹⁴ E maraṅ maraṅ tạrsis jahajko, ape do hae haeyokʼpe, ente apeakʼ asray bondor do dhaṅ dhaser akantapea.

¹⁵ Ona jokhecʼ mitʼṭen rajakʼ dinko leka, metakʼme eaegel bochor hạbicʼ Tur doe hiṛiń ocokʼa. Menkhan eaegel bochor purạulen khan Tur do kusumbi kuṛiyakʼ sereń lekae hoyokʼa.

¹⁶ E hiṛiń ocoakan kusumbi kuṛi, peṛesaṅ banamate nagrahare dãṛã baṛaeme. Napaete peṛesaṅ banamme; ar ḍher sereń sereńme jemon arhõm disạ ocokʼ.

¹⁷ Eaegel bochor paromlen khan Probhu Isor do Tur secʼe moneyakʼa. Unre uni do acʼakʼ bekʼpari kạmire ruạṛ senkate dhạrtiren sanam rapajko sãoteye bạnij bepara.

¹⁸ Menkhan uniyakʼ lab ar rojgar do Probhu Isor ńutumte begar dohokʼa; se jogaokʼa ona do baṅa. Ar okoe do Probhu Isor samaṅreko dãṛã baṛae onkoakʼ ḍher jomakʼ ar mońj kicricʼko lạgitʼge uniyakʼ ona labtetʼ do khorocokʼtaea.