Jesaea 21 - সান্তালী বাইবেল

Babel upạrte nạbi katha

¹ Jalapuri-hahaṅkar reaṅ nạbi katha: Dạkhin disạmte birbao hoe sen idikʼkan leka, ona do hahaṅkar khon hijukʼ kana mitʼṭecʼ botoranakʼ disạm khonge.

² Mitʼṭecʼ botoranakʼ dorsongeń ńel ocoyena, luluṭicʼ doe luluṭkana, nonosṭoyicʼ doe nonosṭokana. E Elam, rakapʼ senokʼme, gherao esedme, E Madiạ. Iń do uniye hoyocoakatʼ sanam kurkurạuakʼkoń caba utạra.

³ Iń do lacʼ hasoteń thakao akana, maejiuakʼ bedon leka haso rakapʼ akadińạ. Ar ạḍi jalaregeń paṛao akana, ariń ańjomeda, botorge ańjomokʼkana, menkhan bạń ńel ńameda.

⁴ Ińakʼ ontor do dhak dhakaokʼ kantińạ; botorteń thar tharaokʼ kana. Oka ńindạ lạgitʼ iń koyokʼ horakatʼ tahẽkan ona do ńitokʼ botoranakʼge hoyakantińạ.

⁵ Onko do jomakʼko sajaoeda, ar pạṭiạko beleda arko jom-ńũiyeda. E mukhiyạko, ma beretʼpe, apeakʼ ḍhalko sunumakʼtape.

⁶ Probhu Isor do ińe mitạńkana, “Am do senkate mitʼṭen pahradar dohoyem. Ar jãhãnakʼgeye ńel ona reakʼ sombat uni doe jạhirama.

⁷ Uni do tinre joṛa joṛa aswarikoe ńelkoa ar gadha se ũṭre decʼakan hoṛkoe ńelkoa, unre sontor akane tahenma, purạpuri sontor akaege uni doe tahen ma.”

⁸ Unre uni pahradar do dhạcri kul lekae hohokeda, “E ińren Probhu Isor, iń do goṭa siń jao hilokʼ usul pahra oṛakʼre teṅgo akaniń tahẽnkana; ar goṭa ńindạ dinke dinge ińakʼ pahra ṭhạ̃ireń tahenkana.

⁹ Hanko ńelkom, joṛa joṛa aswarikoko darae kana.” Ona tayom uni doe mena, “Babel do lạnduṛena, lạnduṛena. Onaren sanam boṅga muṭhạnko do otreko tawakʼ posakʼ ocoakana.”

¹⁰ E ińren hoṛko, ape do ińakʼ khạrạire enakʼ ar oṭaṅ saphawakʼ jaṅ kanape. Phạdkoren Probhu Isor ṭhen khon, Israelkoren Isor ṭhen khon iń okań ańjomakatʼ ona do apeń baḍae ocoketʼpea.

Edom upạrte nạbi katha

¹¹ Duma, metakʼme Edom upạrte nạbi katha do nonka: Seyir khon okoe coṅ hohoateye mitạńkana, “E hohorhoyicʼ, tinạkʼ ńindạ akana? E hohorhoyicʼ, tinạkʼ ńindạ akana?”

¹² Hohorhoyicʼ doe roṛ ruạṛkeda, “Setakʼ hijukʼ kana, menkhan ona tayom ńindạ hõ darae kana. Arhõ kulijoṅpe menetʼ khan ruạṛ hecʼkate arhõ kuliyińpe.”

Arob upạrte nạbi katha

¹³ Arob upạrte nạbi katha do nonka: E Dedanren hortenko, ape do Arob reakʼ birrepe aṅga hạṭińokʼa,

¹⁴ Ape do aperen tetaṅetʼko hoṛ lạgitʼ dakʼ ạguiype. E Ṭema disạmren girobasokʼkan hoṛko, ape do dạdạṛkan hoṛko lạgitʼ jomakʼ ạguiype.

¹⁵ Onko do tarwaṛe samaṅ khon, bocʼ akatʼ tarwaṛe samaṅ khon, ṭuniạu akatʼ akʼ sar khon ar botoranakʼ lạṛhại khonko dạṛ hecʼakana.

¹⁶ Probhu Isor do ińe metadińạ, “Rikit akade guti cetʼleka bochore lekhae onkage mitʼ bochor bhitrite Kedar reakʼ sanamakʼ ṭhonok do caba utạrokʼa.

¹⁷ Kedarren dhinkiạko modre thoṛa hoṛge jiwetʼko tahena. Israelren Probhu Isor do niạ kathageye meneda.”