Jesaea 20 - সান্তালী বাইবেল

Misor ar Kus disạm lạgitʼ cinhạ

¹ Ạsurren raj Sargon do acʼren maraṅ subedar oka bochor Asdodteye kollede uni subedar do senkate ona upạrteye lạṛhạiyente onae hatkeda.

² Ar oka bochore hatketʼ inạ bochorge Probhu Isor do Amosren hopon Jesaeae metade tahẽkana, “Amakʼ hoṛmo khon gõṛẽ kicricʼ ar jaṅga khon panahe bojme.” Onate Jesaea do koṭoge ar eken jaṅgageye dãṛã baṛaekan tahẽkana.

³ Ona tayom Probhu Isore menkeda, “Ińren guti Jesaea do cetʼleka Misor ar Kus upạrte mitʼṭecʼ cinhạ ar tayom daram reakʼ nisạn lekate pe bochor hạbicʼ koṭoge ar eken jaṅgageye dãṛã baṛaketʼ,

⁴ onkage Ạsurren raj do Misor lajao ocoye lạgitʼ Misorren ar Kusren bondi akan koṛakoge cetʼ ar haṛamkoge cetʼ jotoge koṭo ar eken jaṅga ar oṭakʼ dhaṛakateye idikoa.

⁵ Ar okoe Kus disạm cetanreko bhorsakʼkan tahẽkan ar Misor iạteko gorbokʼkan tahẽkan onko do botor arko lajao ocokʼa.

⁶ Enhilokʼ doreão aṛe aṛete tahenkan hoṛ doko mena, ‘ńelpe, nõkʼõe nonkayenako onko do one okoe cetanre goṛo ńam lạgitʼ bon bhorsakʼkan tahẽkan ar Ạsur rajakʼ ti khon rukhiyạ ńam lạgitʼ okoe ṭhen bon senokʼkan tahẽkan. Enḍekhan cekate abo do bon paskao daṛekokʼa?’ ”