Jesaea 2 - সান্তালী বাইবেল

Jaejug reakʼ suluk

¹ Jihudạ ar Jerusalem babotre Amosren hopon Jesaea okae ńelletʼ ona do niạ kana:

² Mucạtʼ dinre sanam buruko modre ona buruge joto khon usulteye rakapʼ ocokʼa one okare Probhu Isorakʼ oṛakʼ menakʼ. Huḍiń buru boṭkocʼko khon uni do usulteye rakapʼ ocokʼa, ar sanam jạtrenko do ạtukʼ dakʼ leka uni secʼko ạtu calakʼa.

³ Jạt jạtren hoṛ do hecʼkateko mena, “Dela, abo do Probhu Isorakʼ burute bon rakapʼlenge, dela, Jakobren Isorakʼ oṛakʼte bon calakʼa. Uni do acʼakʼ hor reaṅe cetʼabona ar uniyakʼ horte bon taṛama.” Onko do noa kathako mena, ente Sion khon do hukum emogokʼa ar Jerusalem khon do Probhu Isorakʼ kathage.

⁴ Uni do boṅgan hoṛ jạtrenko talareye bicạra; ar aema jạtrenko talare hok reakʼe bicạr chinḍạutakoa. Onko do akoakʼ tarwaṛe rạputʼkate nahel reakʼ phalko benaojoṅa ar borlom rạputʼkate do datromkoge. Mitʼ jạtrenko do eṭakʼ jạtrenko upạrte tarwaṛe ar bako rakaba; onko do lạṛhại hõ ar bako lạṛhạiya.

⁵ E Jakob bõsrenko, dela hijukʼpe; dela, Probhu Isorakʼ marsalre bon dãṛãnma.

Probhu Isorakʼ din

⁶ Am do amren hoṛko, metakʼme Jakobren hoponkom bạgi giḍi akatʼkoa. Onko do purub disạmren ojhakoteko perecʼ akana; Philisṭiko leka onko do jạdu biddạko kusiyakʼ kana ar eṭakʼ jạtrenko sãote tiko milạu akada.

⁷ Disạm do sona ar rupạte perecʼgea, onkoakʼ dhon durib do asambheṛgea. Onkoakʼ disạm do sadomkote perecʼgea ar rãt gạḍi hõ alekha menakʼtakoa.

⁸ Ona chaḍa disạm do boṅga murtikote perecʼgetakoa. Onko do akoakʼ tite benaoakʼ jinisko sewawakʼ kana, ar kạṭupʼte okako benaoetʼkan onageko ḍobokʼakʼ kana.

⁹ Onatege hoṛko doko tumbutʼ ocokʼa ar sanamkogeko copotʼ ocokʼa. Onko do alogem ikạkoa.

¹⁰ Probhu Isorakʼ botoranakʼ edre ar uniyakʼ ṭhonok reakʼ malkaokʼ khon rukhiyạ ńam lạgitʼ maraṅ maraṅ dhiri paṛakʼkore bolokʼpe, ar otre okokʼpe.

¹¹ Ar gorbokʼkan hoṛakʼ beṅgetʼ do tumbutʼ hape ocokʼa hoṛkoakʼ bạḍại do copotʼ ocokʼa.

¹² Phạdkoren Probhu Isor do gorbokʼ ar bạḍại udukʼetʼ hoṛko ar cetanre menakʼko onko sanamko lạgitʼ mitʼṭecʼ dine ṭhik dohoakada; enhilokʼ do jotogeko tumbutʼ ocokʼa.

¹³ Lebanon reakʼ sanam jeleń ar usul debdạru dareko ar Bason reakʼ sanam Elon dareko do copotʼ ocokʼa;

¹⁴ ona chaḍa sanam maraṅ maraṅ buruko,

¹⁵ mitʼke mitʼ usul pahra oṛakʼko, mitʼke mitʼ keṭecʼ pạcriko,

¹⁶ sanam Tạrsis-jahajko ar mitʼke mitʼ jakjomok jahajko do copotʼ ocokʼa.

¹⁷ Manwakoakʼ gorbokʼ do copotʼ ocokʼtakoa ar hoṛkoakʼ bạḍại hõ copotʼ ocokʼa. Enhilokʼ do eken Probhu Isorgeye manot ocokʼa,

¹⁸ ar boṅga murtiko doko marao utạrokʼa.

¹⁹ Probhu Isor do tinre dhạrtiren hoṛko botor udukʼako lạgitʼe hijukʼa unre uniyakʼ botoranakʼ edre ar uniyakʼ ṭhonok reakʼ jhalkaokʼ khon rukhiyạ ńam lạgitʼ hoṛko do buru dander ar ot reakʼ bhugạkʼteko bolokʼa.

²⁰ Enhilokʼ hoṛko do oneko pujạwako kan sona ar rupạte benao murtiko do cũd ar bạduṛ ṭhenko giḍikakoa.

²¹ Probhu Isor do tinre dhạrtiren hoṛko botor udukʼako lạgitʼe hijukʼa unre uniyakʼ botoranakʼ edre ar uniyakʼ ṭhonok reakʼ malkaokʼ khon bańcaokʼ lạgitʼ maraṅ maraṅ dhiri ciritʼre ar buru reakʼ paṛakʼreko bolokʼa.

²² Manwako cetanre do alope bhorsakʼa. Uniyakʼ jiwi ma uniyakʼ mũ reakʼ sahẽtʼ chaḍa ar cetʼge baṅkan; uniyakʼ do cetʼ damge bạnukʼtaea.