Jesaea 19 - সান্তালী বাইবেল

Isor do Misorren koe sạjạikoa

¹ Misor disạm babotre Probhu Isorakʼ katha do nonka kana: Ńelpe, Probhu Isor do mitʼṭecʼ coṭkar rimilte Misor disạmteye hijukʼkana. Uni samaṅre Misorren boṅga murhutʼko doko thar tharaokʼa, ar Misorren hoṛ doko hae nisạsokʼa.

² Probhu Isore meneda, “Iń do Misorren hoṛkoge Misorren hoṛko upạrteń uskurkoa; onate boeha do boeha upạrte, aḍepaseren hoṛ do aḍepaseren hoṛko upạrte, nagraharen hoṛ do nagraharen hoṛko upạrte, ar rajosṭiren hoṛ do rajosṭiren hoṛko upạrteko lạṛhạiya.

³ Misorrenko doko hae nisạsokʼa, ar iń do onkoakʼ goṭawakʼko bạń jo baha ocoytakoa. Ente onko do boṅga murhutʼko ar gocʼ hoṛ ḍakʼkaoko, ar jan guruko ṭhen khon solhako hataoeda.

⁴ Iń do mitʼṭen kurmutạha mạlikakʼ tire Misorrenkoń jimạkoa; mitʼṭen botoranicʼ raj do onko cetanre raje calaoa.” Ar noa kangea phạdkoren Probhu Isorakʼ katha do.

⁵ Nil gaḍa reakʼ dakʼ do ańjetʼ rohoṛokʼa, ar gaḍako do rohoṛte paṛagokʼa.

⁶ Soḍokʼko do seakʼa; Misor reakʼ nalako do ạdhikʼa ar ańjedokʼa; pạṭiol ar chuchi do goso cabakʼa;

⁷ Nil gaḍa aṛe reakʼ sanam dareko hõ rohoṛokʼa. Gaḍa aṛe reakʼ itạ rohoe khetko hõ rohoṛte paṛagokʼa; carako hõ tolmojokʼte jhãorakʼa, ar cetʼge baṅ tahena.

⁸ Jạilạko hõko hae haeyokʼa ar nil gaḍare okoe do bạ̃ṛsiko oḍao onko doko homor halaṅa. Ar okoe dakʼre jhạliko caḍoe onko doko nijorokʼa.

⁹ Ar okoe do mĩhĩ mushnạ sutạmko benaoetʼkan ar okoe do mĩhĩ kicricʼko tearetʼkan onko doko as chuṭạukʼa.

¹⁰ Disạmren kham khunṭi doko kaca kucạkʼa ar din mujuriko do jotoge jiwire dukko ńama.

¹¹ Soanren cetan hudạren kạmiyạko doko bebujgea; Pharaoren ạkilan sosolhako do ạuṛiyakʼ solhako emokʼkana. Ape do cekate Pharaope men daṛeae kana, “Iń do ạkilan hoṛko modren mitʼ hoṛ ar sedaeren raj bõsren kạnạń mente?”

¹² Amren ạkilan hoṛ ńitokʼ do okare menakʼkoa? Misor upạrte phạdkoren Probhu Isor okae ṭhik dohoakatʼ ona do apnarteko baḍaema ar amko metam ma.

¹³ Soanren cetan hudạren kạmiyạko do bebuj lekako hoyakana, ar Memphisren mukhiyạko doko ạnḍicʼakana; ar Misorren khũṭkoren mathako do bạṛicʼ horteko sen akana.

¹⁴ Probhu Isor do onko talare ạulạ jhạulại hoyocoakada, onate bubulicʼ cetʼleka acʼakʼ becʼ cetanreye konḍe manḍekʼkan onkage onko do jotowakʼ kạmire Misorko konḍe manḍe ocoyedea.

¹⁵ Misor talare bohokʼ se canḍbol, khijur ḍạr se pạṭiol, okoe hõ cetʼge bako ceka daṛeakʼa.

Misorrenko do Probhu Isorko sewawaea

¹⁶ Enhilokʼ Misorren hoṛko do maejiu lekako hoyokʼa. Onko upạrte phạdkoren Probhu Isor do tiye rakabtaea ar ona ńelte onko do botorteko thar tharaokʼa.

¹⁷ Ar Jihudạ disạm do Misorrenko lạgitʼ mitʼṭecʼ torasge hoyokʼa. Phạdkoren Probhu Isor do onko upạrte oka cekae lạgitʼe ṭhik akawan ona iạte onko doko botorokʼa.

¹⁸ Enhilokʼ Misor reakʼ mõṛẽ goṭecʼ nagraha do Kanan reakʼ pạrsiteko roṛa ar phạdkoren Probhu Isorre pạtiạrko tahena menteko kiriyạkʼa. Ar ona nagrahako modre mitʼṭecʼ do siń cando reakʼ nagrahako metakʼa.

¹⁹ Enhilokʼ Misor disạm talare Probhu Isor ńutumte mitʼṭecʼ pinḍ ar ona reakʼ simạnare mitʼṭecʼ tham khunṭi tahena.

²⁰ Ar noage hoyokʼa Misor disạmre phạdkoren Probhu Isor ńutumte mitʼṭecʼ cinhạ ar goha do. Onkoakʼ santao iạte onko do tinre Probhu Isor ṭhenko raga unre onko ṭhen mitʼṭen babańcaoicʼ ar rurukhiyạicʼe kolea ar uni do onkoe bańcaokoa.

²¹ Nonkate Probhu Isor do Misorrenko ṭhen apnartetʼe sodorokʼa ar enhilokʼ onko do Probhu Isorko aṅgocea. Onko do janwarko samaṅkoa ar phosolko samaṅa arko sewawaea ar Probhu Isor ṭhen manotakʼko purạutakoa.

²² Ar Probhu Isor do Misorren hoṛkoe ńẽtʼkoa; uni doe ńẽtʼkoa ar boge hõe bogekoa. Onko do Probhu Isor secʼko ạcurokʼa, ar uni do onkoakʼ nehõre ańjomtakoa are bogekoa.

²³ Enhilokʼ Misor khon Ạsur hạbicʼ do mitʼṭecʼ raj ḍaharge hoyokʼa. Ạsurrenko do Misorte ar Misorren do Ạsurteko calao hijukʼa. Unre Ạsurren ar Misorrenko do mitʼ soṅgeteko dewa sewaea.

²⁴ Enhilokʼ Israel do Misor ar Ạsur tulucʼ tesaricʼe lekhakʼa ar dhạrtire onko do bhorankoko hoyokʼa.

²⁵ Phạdkoren Probhu Isor do niạ menteye bhorakoa, “Bhoranko hoyokʼma Misorrenko, ińren hoṛkoge, Ạsurrenko do ińakʼ ti reakʼ kạmige; ar Israelrenko do ińakʼ ạidạrirenkoge”