Jesaea 18 - সান্তালী বাইবেল

Kus disạm upạrte nạbi katha

¹ Hae! Kus disạm reakʼ gaḍako hanasare nonkan mitʼṭecʼ disạm menakʼa one onḍe phạ̃kṛạ̃kʼko reakʼ san san saḍe ańjomokʼkan.

² Ona disạm do dakʼ cetante pạṭiolte benaoakʼ lạukạte pathaonakoe koletʼkoa. E coṭkar paṭhaonako, okoe jạtren hoṛko doko usulge arko cĩkạ̃ṛge ar boṅgan jạtrenkanko, ar okoe jạtrenko do sor ar sạṅgińren hoṛko botorako, ar okoe daṛean jạtrenko do eṭakʼkoko lebetʼ gasmanḍaoetʼko ar okoekoakʼ disạm do gaḍa ar soḍokʼkote hạṭińge, ape do onko ṭhen ruạṛ calakʼpe.

³ E dhạrtiren hoṛko, E dhạrtire girobasokʼ kanko, ape do tinre buru boṭkocʼ cetanre jhạnḍi rakabokʼa ona ńelpe, ar tinre sakwa saḍekʼa ona ańjompe.

⁴ Probhu Isor do ińe mitạń kana, “Iń do Sapha serma reakʼ jaratʼ jaratʼ setoṅ reakʼ dãk leka, lolo dinre phosol samṭao oktere kuṛhạ reakʼ rimil leka ińakʼ tahen ṭhạ̃i khon hape hapeteń beṅgeda.”

⁵ Phosol samṭao ạurire tinre baha baṅ tahena ar ona baha do darkha jokate belekʼa unre uni do kạidạte kahle ḍạrkoe hesea ar cap capa ḍạrko doe kaman giḍikakʼa.

⁶ Ar onko do jotokoge bururen gidi ar bir janwar ṭhenko giḍi ocokʼa; ar kũṛĩtʼ ar gidi do onakote niron dinko ṭalaoa ar bir janwarko do onakote rabaṅ dinko khemaoa.

⁷ Unre phạdkoren Probhu Isor ṭhen do onko usul ar cĩkạ̃ṛ jạtrenko ṭhen khon sandesko hijukʼa. Onko do boṅgan hoṛ jạtren kanako okoe do sor ar sạṅgińren hoṛko botorakokan. Onko do noko daṛean jạtren kangeako okoe do eṭakʼko jaṅgateko lebetʼ gańjaoetʼko ar okaṭakʼ disạm do gaḍa soḍokʼkote hạṭiń akantako. Onko jạtrenkoakʼ dan sandes do Sion burure, phạdkoren Probhu Isorakʼ tahen ṭhạ̃ite ạgukʼa.